Sekda Dewa Made Indra Nyukserahang Penghargaan Paritrana Awards 2024 Provinsi Bali
Jumat, 09 Agustus 2024
DENPASAR, Balitopnews.com -Sekretaris Daerah Provinsi Bali, Dewa Made Indra, nyade linggih Pj. Gubernur Bali, nyukserahang Penghargaan Jaminan Sosial Ketenagakerjaan (Paritrana Awards) Tahun 2024 Provinsi Bali ring Wiswa Sabha Utama, Kantor Gubernur Bali, Wraspati (8 Agustus 2024). Pangargan puniki katur majeng ring pemerintah daerah miwah pelaku usaha sane sampun becik ngamargiang program jaminan sosial ketenagakerjaan.
Ngawitin sambrama wacanannyane, Dewa Made Indra ngaturang apresiasi majeng ring makasami stakeholder sane sareng ngrombo sajeroning ngwetuang tur ngamargiang Jaminan Sosial Ketenagakerjaan. Manut dane, program puniki mabuat pisan majeng ring tenaga kerja sajeroning nepasin risiko kerja.
Salanturnyane, Birokrat saking Singaraja puniki ngentenin kawigunan Jaminan Sosial Ketenagakerjaan nenten wantah majeng ring pekerja kemanten, bilih-bilih majeng ring para pekerja perorangan sane sifatnyane individual miwah madue tingkat pendapatan relatif rendah.
”Indik punika kasorohang pekerja rentan, manut fisiknyane sampun janten rentan santukan pakaryanipun prasida ngawinang kecelakaan kerja. Tiosan punika ekonominyane taler rentan, santukan upahnyane wantah prasida kaanggen pangupa jiwa kemanten tur nenten prasida ngromromin padewekan antuk jaminan kesejahteraan sosial inggian punika jaminan kesehatan yadin ketenagakerjaan. Dadosnyane, puniki sane dados perhatian pemerintah kasarengin antuk Tim sane sampun karekaang,” baos Dewa Made Indra.
Sekda Dewa Made Indra taler ngaturang suksma majeng ring badan usaha sane ngamolihang pangargan warsa mangkin. Dane maosang pangargan puniki pinaka cihna perusahaan-perusahaan sampun ngicen perhatian majeng ring tenaga kerja ipune antuk ngwehin jaminan sosial ketenagakerjaan.
“Indik puniki pinaka silih tunggil instrumen sane nyokong iraga sareng sami inggian punika pemerintah ya ta badan usaha mangda setata nincapang peran sajeroning ngicen perlindungan sosial ring tenaga kerja," baos dane sinambi maosang realisasi Jaminan Sosial Ketenagakerjaan per bulan Juli 2024 ring sektor formal wau nyantos 52%. Duaning asapunika, kirang langkung 47% tenaga kerja sampun terdata, sane durung karomrom antuk jaminan sosial.
”Ring sektor informal kirang langkung wau 26 % persen langkung sane sampun karomrom, dadosnyane kantun wenten 73% persen tenaga kerja sane durung karomrom. Indik puniki wantah pikobet iraga sareng sami, yening karyawan tetap punika dados tanggung jawab perusahaan/badan usaha sane nawengin. Tiosan punika sane wenten ring sektor informal sane dados tanggung jawab iraga sareng sami,” tinas dane.
Kepala Dinas Ketenagakerjaan dan Energi Sumber Daya Mineral (ESDM) Provinsi Bali, Ida Bagus Setiawan, nlatarang Paritrana Award pinaka pangargan majeng ring pemerintah daerah miwah pelaku usaha sane sampun becik ngamargiang program jaminan sosial ketenagakerjaan. Antuk pangargan puniki kaaptiang prasida nyokong pemerintah daerah miwah pelaku usaha mangda nincapang cakupan kepesertaan nasional.
Inggian para jayanti sane ngamolihang Penghargaan Jaminan Sosial Ketenagakerjaan (Paritrana Award) Tahun 2024 Provinsi Bali, inggih punika : Kategori Pemerintah Kabupaten Kota, Jayanti I kapolihang olih Kabupaten Gianyar, Jayanti II Kabupaten Badung, Jayanti III Kota Denpasar; Kategori Pemerintah Desa, Jayanti I kapolihang olih Desa Lebih / Kabupaten Gianyar, Jayanti II Desa Gunaksa / Kabupaten Klungkung, Jayanti III Desa Tegal Harum / Kota Denpasar; Kategori Perusahaan Skala Menengah Besar/ Sektor Jasa Keuangan kapolihang olih BPR Sukawati Pancakanti, BPR Lestari, miwah BPR Artha Budaya; Kategori Perusahaan Skala Menengah Besar/ Sektor Pendidikan soang-soang maruntunan saking Jayanti I, II, III kapolihang olih Itb Stikom Bali, Elizabeth International Hotel And Business School, miwah Bali International School; Kategori Perusahaan Skala Menengah Besar/ Sektor Pertanian/Peternakan/Perkebunan Dan Perikanan kapolihang olih Cendana Indopearls; Kategori Perusahaan Skala Menengah Besar/Sektor Perdagangan Dan Jasa, Bali Safari And Marine Parks pinaka Jayanti I, Angkasa Pura Support pinaka Jayanti II, miwah Jayanti III kapolihang olih Awahita Indonesia Putra; taler Kategori Usaha Kecil Mikro kapolihang olih Nekhawa, Delicacao Bali, miwah Inbi Nusantara Sejahtera.
Tim Panureksa sajeroning panureksan puniki kamanggalanin olih Sekretaris Daerah Provinsi Bali, Dewa Made Indra, kasarengin antuk anggota sane mawit saking manggala perangkat daerah ring wewidangan Pemprov Bali, unsur serikat pekerja, miwah akademisi. (Rls/Btnc)
Komentar