Manut Arahan Gubernur Bali, Desain Anyar Pelabuhan Benoa Ramah Lingkungan, Nukung Ekonomi Inklusif
- 02 November 2019
- 21:58 WITA
- News
Balitopnews.com,Denpasar
PT. Pelindo III sampun prasida muputang desain anyar Pelabuhan Benoa Denpasar pinaka tindak lanjut surat Gubernur Bali Wayan Koster sasampune rusak sebagian hutan utawi alas bakau rikala ngamargiang proses ngalinggahang pelabuhan punika.
Sajeroning desain anyar, langkung ring atenga lahan reklamasi pacang kadadosang paru-paru kota, tur sisannyane pacang kaanggen fasilitas perikanan miwah penyediaan energi. Desain anyar puniki taler ngicenin ruang utawi genah anggen ngamargiang parikrama desa adat tur peluang pemerataan ekonomi ring jaba wawidangan pelabuhan utawi ekonomi inklusif.
Indik puniki kasobyahang sajeroning konfrensi pers Gubernur Bali Wayan Koster sareng Deputi Infrastruktur Kemenko Maritim Ridwan Djamaluddin lan Dirut Pelindo III Doso Agung magenah ring rumah jabatan Gubernur Bali Jaya Sabha, Denpasar, rahina Saniscara (2 November 2019).
"Saking dudonan parum sane sampun makudang-kudang kamargiang, ahina mangkin parumnyane sampun mawastu final, sampun nyihnayang desain pemanfaatan Dumping I lan Dumping II miwah areal bekas Akame punika sampun karencanayang marupa desain pemanfaatan sane sayan ramah lingkungan," baos Gubernur Bali, Wayan Koster.
Dane ngawewehin, jimbar wawudangan Dumping I sane akehnyane 25 hektar, 13 hektar-nyane (51%) pacang kawigunayang pinaka hutan kota tur 12 hektar (49%) sane tiosan pacang kaanggen genah ngawangun fasilitas perikanan sakadi 'cold storage' sane sida nagingin kebutuhan kapal cruise miwah pesanan utawi permintaan ekspor.
Nanging, areal Dumping II sane jimbarnyane 45 hektar, 23 hektar-nyane (51%) pacang kaanggen hutan kota lan sisannyane 22 hektar (49%) anggen fasilitas curah cair, inggih ounika terminal BBM, gas, miwah avtur. Manut Gubernur, terminal BBM perlu kawangun mangda Indonesia prasida nagingin bahan bakar kapal cruise sane salami puniki kamargiang ring Singapura.
"Malih terminal gas paiketannyane sareng Bali energi bersih. Sami ngangge energi terbarukan, dadosnyane irika pacang kakaryanang terminal gas anggen mensuplai ke PLN," baos Gubernur sane taler pinaka Ketua DPD PDI Perjuangan Provinsi Bali.
Punika taler terminal avtur, baos dane ngalanturang, kaperluang anggen negepin kebutuhan Bandara Ngurah Rai, inggin punika terminal sane wenten mangkin bas nampek saking bandara, doning punika patut kagingsiran anggen ngutsahayang keamanan.
Desain Pelabuhan Benoa sane anyar puniki taler mengeliminasi makasami akomodasi pariwisata ring wawidangan punika. Sajaba nenten ngalanturang pangrancana pawangunan akomodasi pariwisata manut pangaptin Gubernur, taler makudang-kudang fasilitas minakadi restoran, water sport, miwah helipad sane kanjekan mangkin sampun mamargi, pacang kawusang kerjasamannyane ngawit saking akhir warsa 2020. Inggian lahan bekas akomodasi punika pacang mawali kaanggen hutan kota.
"Iraga ngawangun komunitas ring luar. Saking riin makasami pacang kawangun ring dalam, sane mangkin pacang kakedeng mangda sida ke jabayan," baos Deputi Infrastruktur Kemenko Maritim Ridwan Djamaluddin, nyawisang.
Manut Ridwan, tatujon ageng utawi besar saking pawangunan Pelabuhan Benoa wantah ngawangun Indonesia saking Bali. Antuk malabuhnyane kapal cruise sane ageng-ageng ring Pelabuhan Benoa, pacang ngicenin bobot utawi pikenoh ekonomi sane taler ageng majeng ring Bali.
"Antuk target 10 Bali anyar, Bali sane asli malah prasida mamargi sayan gelis yening saihang ring sane tiosan. Mogi-mogi krama Bali nyanggra becik," baos Ridwan nuturang saha mapangapti.
Dirut Pelindo III Doso Agung maosang, sampun akeh kapal cruise sane sampun nyobyahang minatnyane malabuh ring Pelabuhan Benoa. Wawu-wawu puniki, wenten kapal kapasitas 2000 penumpang sampun malabuh ring Bali. Antuk nyimbarang darmaga kapungkur Pelabuhan Benoa prasida kalabuhin kapal cruise antuk kapasitas 4000 penumpang.
"Kapungkur pacang kakaryanang rute pemargi, mangda prasida namtamin kalewihan alam Bali lan numbas kerajinan rakyat ring Pulo Dewata," baos Gubernur Bali Wayan Koster ngawewehin. (Balitopnews.com/DW/Rls)
Komentar