Gubernur Koster Nyukserahang DIPA 2020 Majeng ring Makasami Bupati miwah Walikota Sajebag Bali
- 20 November 2019
- 00:46 WITA
- News
Balitopnews.com, Denpasar
Gubernur Bali Wayan Koster nyukserahang DIPA (Daftar Isian Pelaksanaan Anggaran) 2020 majeng ring makasami Bupati miwah Walikota se-Bali. Gubernur Koster taler nyukserahang DIPA 2020 punika majeng ring kutus Kabupaten/Kota miwah Kementerian/Lembaga sane tiosan ring Bali, rahina Anggara (19 November 2019) magenah ring Wiswa Sabha Utama Kantor Gubernur Bali.
Panyukserahan DIPA punika kasaksiang olih Kakanwil DjPB Bali Tri Budhianto, Forkompinda Provinsi Bali, para Perangkat Daerah ring wawidangan Provinsi Bali, Instansi Vertikal miwah BUMD tur majeng ring para awak media, inggian punika media cetak utawi elektronik.
Ring acara punika Gubernur Koster taler nyobyahang parikrama puniki wantah tindak lanjut saking panyukserahan DIPA secara Nasional olih Bapak Presiden RI majeng ring makasami Mentri, Gubernur miwah sane tiosan ring rahina Wrahaspati, 14 November 2019 ring Istana Negara.
Gubernur Koster ngawewehin, antuk kamargiangnyane panyukserahan DIPA ring bulan November 2019 puniki kaaptiang makasami instansi miwah kelembagaan ring soang-soang daerah prasida langsung ngamargiang pelelangan pekerjaan sane prasida nangiang programnyane ngawit awal januari warsa 2020.
"Selehin ring kawentenan substansiannyane DIPA madrue kasukseman pinaka penjabaran program pawangunan pelayanan majeng ring krama sane patut kalaksanayang antuk penuh tanggung jawab. Panureksan kinerja warsa sane lintang patut kacawis antuk akselerasi pencapaian kinerja malarapan langkah-langkah inovatif miwah kreatif ring warsa 2020 sane jagi rauh puniki," baosnyane negesang.
Koster ngawewehin, manut laporan Kakanwil DjPb Bali, warsa 2020 Provinsi Bali polih alokasi TKTD miwah Dana Desa akehnyane Rp. 12,24 Triliun antuk rincian, transfer daerah akehipun Rp. 11,8 Triliun miwah dana desa sane akehipun Rp. 658 Miliar. Sajabaning punika, alokasi belanja satuan kerja vertikal lan organisasi perangkat daerah akehipun Rp. 11 Triliun.
"Antuk dukungan dana APBN punika, miwah antuk ngamargiang arahan Bapak Presiden, titiang mapikeling para semeton sami mangda jakti-jakti ngamargiang piteket Bapak Presiden RI sane dahat mabuat rikala acara Rakornas Indonesia Maju, tanggal 13 November 2019 sane sampun lintang ring Sentul," baos dane.
Malih Gubernur Koster ngalanturang, yening nyelehin anggaran sane kaalokasiang ring sajeroning APBN majeng ring Bali malarapan saking dana satker inggih punika Rp. 11 Triliun, miwah dana transfer lan dana desa akehipun Rp. 12 Triliun, dadosnyane total sami Rp. 23 Triliun. Tur sampun kasungkemin puniki wantah jumlah sane ageng majeng ring Bali warsane sane mangkin, durung malih anggaran APBN sane kaalokasiang olih Kementerian majeng ring wilayah Bali, pamekas utamanipun ring widang infrastruktur.
"Titiang mapangapti yening puniki kamargiang becik, indike punika pacang ngawe peran sane mabuat sajeroning ngelisang utsaha pawangunan ring wilayah Provinsi Bali," baos Koster nalatarang.
Anggen nulusang indike punika, Gubernur Koster nuekang pisan dahating mabuat rikala pacang ngawangun hubungan sane becik pantaraning instansi tur hubungan sane harmonis patut kawerdiang ring sajeroning pemerintahan sajeroning utsaha ngawangun daerah manut arahan Bapak Presiden RI. Tur sampunang ngaryanang akeh-akeh peraturan tur sane lian-lianan. "Indik puniki sayuwakti polih penekanan saking Presiden," baos dane nerangang.
Gubernur Koster nyobyahang saparindikan kebiasaan makarya ngawit awal warsa sajeroning ngalola APBD puniki durung prasida mamargi gelis ring Daerah. Kapungkur, dane maosang pacang maparilaksana tegas majeng ring OPD sane pamarginnyane lambat sajeroning ngalola tur nitenin anggaran. "Kahyun jagi maju terus napi nenten," baos Gubernur Koster.(Balitopnews.com/DW/rls)
Komentar