Wagub Cok Ace Ngaptiang Kendaraan Listrik Dados Inspirasi Kendaraan Ramah Lingkungan
- 09 Januari 2022
- 14:01 WITA
- News
DENPASAR, Balitopnews.com - Wakil Gubernur Bali Tjokorda Oka Artha Ardana Sukawati nglepas konvoi kendaraan listrik sane kalaksanayang olih Komunitas Deva (Dewata Electric Vehicle Association ) ring Lapangan Timur, Niti Mandala Renon Denpasar, Redite (9 Januari 2022)
Wagub Bali Cok Ace dahat ngajiang parikrama konvoi kendaraan listrik sane pinaka silih tunggil cihna pamargin daging Pergub 45 Warsa 2019 indik Bali Energi Bersih miwah Pergub 48 Warsa 2019 indik Penggunaan Kendaraan Bermotor Listrik Berbasis Baterai.
Parikrama puniki kaaptiang mangda adopsi kendaraan listrik sayan gelis kamargiang punika taler ring pemanfaatan energi surya ngardi Bali energi ramah lingkungan.
"Titiang banget ngajiang kawentenan parikrama puniki, parikrama puniki Titiang aptiang mangda prasida dados tetuladan iraga sareng sami, mangda sakakedik ngirangin wiadin nilarin kawentenan bahan bakar fosil saha magentos dados energi bersih ramah lingkungan, " pawewehnyane.
Konvoi kendaraan listrik sane ngambil rute saking Lapangan Timur Niti Mandala Renon - Gedung Dharma Negara Alaya miwah puput ring Plaza Renon puniki taler kamiletin olih Anggota DPR RI Gde Sumarjaya Linggih, Bupati Jembrana I Nengah Tamba miwah Wakil Bupati Jembrana I Gede Ngurah Patriana Krisna, kasarengin olih krama.(gix)
Komentar