Kamiletin 137 Panegara, Gubernur Koster Nyanggra Becik Pangrencana Conference of Parties Minamata Convention on Mercury ring Bali
- 14 Januari 2022
- 20:01 WITA
- News
DENPASAR,Balitopnews.com - Gubernur Bali Wayan Koster nyanggra becik pangrencana Conference of Parties Minamata Convention on Mercury ring Bali. Konferensi sane kapertama kalaksanayang ring Indonesia (Bali) puniki jagi kalaksanayang ring tanggal 21 - 25 Maret 2022 sane jagi rauh, antuk sistem bubble saantukan rauh mangkin kantun wenten pandemi Covid-19.
Parindikan punika kabaosang Gubernur Bali Wayan Koster ri kala nyanggra pangrauh audiensi Dirjen Pengelolaan Sampah, Limbah dan Bahan Berbahaya Beracun Kementerian Lingkungan Hidup dan Kehutanan, Rosa Vivien Ratnawati kasarengin Novrizal Tahar, Direktur Penanganan Sampah, Ditjen PSLB3-KLHK miwah Ni Nyoman Santi, Plt. Kepala Pusat Pengendalian Pembangunan Ekoregion Bali dan Nusa Tenggara (P3E Bali Nusra), Sukra semeng (14 Januari 2022) ring Jaya Sabha, Denpasar.
Dirjen PSLB3 Kementerian LHK Rosa Vivien Ratnawati ring galahe punika maosang yening Indonesia (Bali) patut rumasa bangga saantukan puniki pinaka pamargin Conference of Parties Minamata Convention on Mercury sane ketahnyane kalaksanayang ring Swis (genah sekretariatnyane).
"Puniki wantah kapertama kamargiang ring Indonesia pinaka tuan rumah. Parikrama jagi kamiletin olih 137 panegara antuk akeh pamilet siu diri," baosnyane.
Konferensi puniki jagi maosang indik ngirangin wiadin ngicalang kawentenan mercury ring widang kesehatan, manufaktur, energi wiadin pertambangan emas. Dane ngaptiang, pangrauh pamilet konferensi jagi prasida nangiang ekonomi ring Indonesia utaminipun ring Bali sane pungkuran puniki pariwisata ipun kaon sangkaning pandemi.
"Majanten protokol kesehatan (Prokes) jagi setata kauratiang melarapan antuk sistem bubble. Pitegesnyane selami parikrama kalaksanayang, pamilet wantah wenten ring genah sane sampun kasediayang. Risapune konferensi puput, pamilet mawali ngamiletin tes swab, saha yening asilnyane negatif jagi kaicen masesanjan ngrasayang pariwisata Bali. Saantukan para pamilet sampun saking doh rauh ka Bali, majanten parindikan puniki jagi kapidabdabin becik," baosnyane.
Gubernur Bali Wayan Koster sane kasarengin olih Kepala Dinas Kehutanan dan Lingkungan Hidup Provinsi Bali I Made Teja ngaturang suksma saantukan Bali kaanggen genah pamargin konferensi puniki. Gubernur saking Desa Sembiran, Tejakula, Buleleng puniki maosang yening konferensi jagi prasida nangiang ekonomi Bali.
"Matur suksma saantukan Bali kaanggen genah pamargin parikrama puniki. Ring warsane puniki, rumasuk makeh parikrama internasional sane jagi kalaksanayang ring Bali. Titiang ngaptiang mangda prasida nangiang ekonomi Bali," baosnyane.
Ring galahe punika, Gubernur sane taler pinaka Ketua DPD PDI Perjuangan Provinsi Bali puniki setata ngelingang indik protokol kesehatan mangda dahat kauratiang, mangda nenten raris ngawetuang kasus Covid-19 sane anyar.
Pinaka pamuput, Gubernur Koster ngaptiang ring para pamilet konferensi ring salanturnyane taler prasida rauh ring pameran IKM Bali Bangkit sane jagi kalaksanayang ring Taman Budaya, Art Center, Denpasar. (Gix)
Komentar