Ketua Dekranasda Bali Nyokong Parikrama Miss Global Ka-8 Kalaksanayang ring Bali Nyarengang 85 Negara
- 11 April 2022
- 19:04 WITA
- News
DENPASAR,Balitopnews.com - Ketua Dekranasda Provinsi Bali Putri Koster kasarengin Kepala Dinas Perindustrian dan Perdagangan ( Disperindag) Provinsi Bali, I Wayan Jarta nrima audiensi saking Director Miss Global saking PT Mahakarya Duta Pesona Indonesia Dr.Kishanty Hardaningtyas MBiomed AAM , ring Rajapala Snack Bar, Inna Grand Bali Beach ,Sanur , Redite (11 April 2022)
Ring galahe punika, Ibu Kishanty nlatarang mapaiketan sareng kawentenan Bali sane munggah pinaka genah pamargin Miss Global ka 8 sane karencanayang kalaksanayang ring BNDCC, Nusa Dua tanggal 31 Mei - 11 Juni 2022. Pamargin Miss Global karencanayang jagi kamiletin antuk sawetara 85 panegara. Sangkaning punika, anggannyane ngaptiang panyokong wiadin tetimbang mapaiketan sareng parikrama sane jagi kalaksanayang.
Ketua Dekranasda Putri Koster ngajiang saha nyokong kawentenan pangrencana pamargin Ms Global ring Provinsi Bali. Malarapan antuk pamargin makudang-kudang parikrama ring Bali kaaptiang digelis nangiang ekonomi Bali sepisanan nyihnayang ring ajeng internasional mapaiketan ring kawentenan pariwisata Bali sane sampun sayan becik .
Putri Koster ngaptiang mangda prawartaka acara prasida nyihnayang kawentenan budaya, basa wiadin adat ring Bali majeng para pamilet. Sangkaning punika, Dane ngaptiang mangda nguningayang ring dinas sane mapaiketan,sakadi ri kala jagi misuguhang sesolahan Bali mangda nguningayang ring Dinas Kebudayaan Provinsi Bali mawinan sesolahan sane kapisuguhang sayuwakti becik. Punika taler ring parikrama tiosan, titiang ring Pemprov Bali sayaga nyokong miwah ngaremba mangda parikrama puniki mamargi antar labda karya .
Putri Koster taler nyarengang para pamilet Ms Global mangda prasida rauh ring Pameran IKM Bali Bangkit sajeroning manggihin asil kerajinan para pelaku UMKM Bali , mawinan pamargin parikrama ring Bali prasida ngicen pawesana becik, majeng widang pariwisata wiadin majeng UMKM Bali. (Rls/Btnc)
Komentar