Rauh ka Bali, Wisatawan Prasida Ngrasayang Kharisma Event Nusantara

  • 15 April 2022
  • 23:04 WITA
  • News
Kepala Dinas Pariwisata Provinsi Bali, Tjok Bagus Pemayun

DENPASAR, Balitopnews.com - Pariwisata Bali mawali katangiang sasampune wenten pelonggaran sana kamedalang olih pemerintah. Minakadi Visa on Arrival, tan madaging karantina, miwah tan madaging Swab PCR majeng sane sampun vaksin ping tiga utawi booster. Makudang wisatawan dura negara taler sampun kakantenang rauh masesanjan ring Pulo Seribu Pura puniki. Nyantenang kaluihan palemahan, kawentenan kramane sane ramah, wiadin kawibuhan  budaya sane kapisuguhang.

 

Negepin konsep pariwisata budaya sane kamargiang ring Pulo sane kabaosang The Last Paradise in The World puniki, Pemerintah Provinsi Bali nyiagayang parikrama-parikrama budaya unggulan ring Bali mangda karanjingang sajeroning daftar parikrama Budaya Nasional sane ketah kabaosang Kharisma Event Nusantara. 

 

Saking makudang parikrama budaya sane wenten ring Bali wenten 7 (pitu) parikrama sane prasida karanjingang sajeroning daftar Kharisma Event Nusantara Kementerian Pariwisata dan Ekonomi Kreatif 2022 minakadi:  Bali Spirit Festival, Pesta Kesenian Bali, Ubud Village Jazz Festival, Sanur Village Festival, Pemuteran Bay Festival, Denpasar Festival, miwah Penglipuran Village Festival.


Indik galah pamargin parikrama punika minakadi:

 

1. Bali Spirit Festival 29 Mei - 10 Juni 2022, ring Ubud

2. Pesta Kesenian Bali 12 Juni - 10 Juli 2022, ring Denpasar

3. Ubud Village Jazz Festival 12 -13 Agustus 2022, ring Ubud

4. Sanur Village Festival 19 -21 Agustus 2022, ring Sanur.

5. Pemuteran Bay Festival 11 - 13 November 2022, ring Buleleng

6. Denpasar Festival  ring panguntat November -24 Desember 2022 ring Denpasar

7. Penglipuran Village Festival 7 - 10 Desember 2022, ring Bangli.

====Atraksi Wisata Budaya===

 

Malarapan Kharisma Event Nusantara (KEN), parikrama puniki jagi kasobyahang ring jagate kasarengin antuk parikrama saking wewidangan tiosan ring Indonesia.


Cutetnyane, majeng wisatawan sane rauh ka Bali, tiosan prasida nyantenang kaluihan palemahan wiadin budaya Bali, taler jagi prasida nyantenang makudang festival nganutin sareng jadwal sane wenten, mawinan jagi wenten makatah atraksi budaya ri kala wisatawan wenten ring Bali. 


Malarapan antuk pamargin pitung festival puniki, kaaptiang prasida nyihnayang majeng dunia internasional yening pariwisata Bali sampun katangiang malih saha sayaga karauhin. 


Katreptian wiadin kenyamanan nenten sandang takenang malih, saantukan samian krama Bali dahat eling sajeroning nyaga katreptian wewidangan wiadin kenyamanan wisatawan pamekas risampune katiben pandemi.


==Pilihan Jadwal Liburan ===


Kepala Dinas Pariwisata Provinsi Bali, Tjok Bagus Pemayun nlatarang, pitung festival puniki dados pilihan majeng para calon wisatawan sane jagi masesanjan ring Bali. 


"Wisatawan prasida madue pangrencana saha milih bulan napi jagi rauh ka Bali miwah festival napi sane jagi katonton. Saantukan satunggil sasih wenten festival sane jagi kapisuguhang," Baosnyane.   


Ring galahe punika, Tjok Bagus taler maosang akeh pangrauh wisatawan dura negara sane masesanjan ka Bali. Baosnyane kantos tanggal 5 April 2022 sampun wenten 14.430 diri sane sampun ngawigunayang pelayanan VoA.


Dane nuekang, panincap pangrauh wisatawan taler nenten lempas saking herd immunity sane sampun kawangun. Pamargin vaksinasi nglangkungin target 30 persen saking akeh samian krama Bali sawetara  4 yuta diri.  


Saking data Satgas Covid-19, ring tanggal 14 April 2022, vaksinasi booster ring Provinsi Bali kantos 57,49 %. Samian wewidangan sampun langkungan ring 40 %. Pinih ageng ring Denpasar kantos 76,32 %. "Krama Bali dahat disiplin sajeroning ngamargiang protokol kesehatan," Baosnyane. 

 

Kepala Dinas Pariwisata Provinsi Bali, Tjok Bagus Pemayun nlatarang, pitung festival sane jagi kalaksanayang ring Bali. Festival puniki, baosnyane taler jagi nyarengang pelaku UMKM.


Ring pamargin Bali Spirit Festival wantah pinaka festival sane ngadungang yoga, musik, miwah sesolahan manados asiki sane majanten ngaledangin kayun. Kalaksanagang satunggil warsa ring Ubud, mawinan prasida ngadautin kayun para wisatawan saking sakancan wewidangan. 

 

Salanturnyane, Pesta Kesenian Bali (PKB) pinaka parade utawi festival kesenian nyabran warsa sane kapikamkam Pemerintah Provinsi Bali, saha kadadosang genah aktivitas kalih kreativitas para seniman sajeroning nyokong program pemerintah mapaiketan sareng upaya penggalian, pelestarian, kalih pengembangan nilai-nilai seni budaya Bali.

 

Ubud Village Jazz Festival pinaka festival musik sane kakuubannyane ring  lingkungan artistik Ubud Bali, Indonesia. Mawit warsa 2010, Yuri Mahatma, silih tunggil musisi/komposer/guru musik, miwah pendiri Underground Jazz Movement kasarengin  Anom Darsana, direktur wiadin panruwe  ANTIDA Music Productions, sampun maprakanti makarya makudang-kudang proyek rutin konser jazz, antuk unteng sane matios-tiosan.

 

 Sanur Village Festival (SVF) pinaka pesta rakyat nyabran warsa sane kalaksanayang  olih Yayasan Pembangunan Sanur (YPS) sane magenah ring wewidangan Pasisi  Sanur. "SVF pinaka gabungan saking makudang parikrama ageng mapaiketan sareng festival makanan, pameran ekonomi kreatif, makudang kontes kalih lomba, atraksi seni budaya, musik, wiadin makudang soroh parikrama sane nguratiang kalestarian palemahan. Punika makudang parikrama sane kalaksanayang satunggil warsa," Baosnyane. 


Mapaiketan ring Pemuteran Bay Festival, Tjok Bagus maosang yening festival puniki nyayubin kawentenan sakancan kasenian, budaya wiadin kalestarian palemahan sakadi pelestarian terumbu karang berbasis masyarakat antuk teknologi biorock, heritage culture gebug ende , beach art parade, lomba-lomba seni wiadin budaya, pameran produksi seni kalih kerajinan sajeroning nincapang  kualitas pariwisata berbasis masyarakat, berbudaya, berwawasan lingkungan.

 

Dane nlatarang, Denpasar Festival utawi Denfest pinaka festival seni budaya sane kalaksanayang pinaka genah misuguhang sakancan ekspresi seni budaya, inggian sane  tradisional, modern wiadin avant-garde sane madaging makudang aspek minakadi: display, menjual, menginspirasi, mentransformasi, menghibur miwah mendidik.

 

"Salanturnyane Festival Desa Penglipuran magenah ring Desa Penglipuran antuk ngunggahang unteng Green Destination berbasis kebersihan, kesehatan, keselamatan kalih lingkungan (CHSE) sane kalaksanayang  malarapan antuk prakanti sareng makudang angga sane mapaiketan antuk setata nguratiang protokol kesehatan. Festival puniki misuguhang kaluihan seni, budaya wiadin kearifan lokal Desa Adat Penglipuran," Baosnyane. Sobyahang Event Daerah malarapan Kharisma Event Nusantara.


TAGS :

Komentar