Gubernur Bali : Kantos April 2022, Akeh Penerbangan Internasional ka Bali Nincap, 269 Pesawat Antuk Akeh Wisman 58.630 Diri
- 29 April 2022
- 16:04 WITA
- News
DENPASAR,Balitopnews.com – Gubernur Bali Wayan Koster maosang kantos tanggal 27 April 2022, akeh penerbangan internasional ka Bali nincap dados 269 pesawat (nincap 118% saihang ring bulan Maret), antuk akeh penumpang wisatawan mancanegara 58.630 diri (nincap ageng 240% saihang bulan Maret), antuk rata-rata akehnyane 2.171 diri ngarahina (nincap pisan 277% saihang bulan Maret).
Parindikan punika kabaosang olih Gubernur Koster ri kala nyanggra pangrauh penerbangan kapertama Pelita Air ring Bandar Udara I Gusti Ngurah Rai, Wraspati ( 28 April 2022) .
Koster ngawewehin, akeh penerbangan internasional ka Bali ring tanggal 1 kantos 30 Maret 2022 akehnyane 123 pesawat, antuk akeh penumpang wisatawan mancanegara wenten 17.250 diri, antuk rata-rata 575 diri ngarahina.
“Mapaiketan ring akeh penerbangan domestik ka Bali tanggal 1 kantos 30 Maret wenten 2.188 Pesawat, antuk akeh penumpang 276.619 diri, rata-rata 9.220 diri ngarahina. Nanging akeh penerbangan domestik ka Bali ring tanggal 1 kantos 27 April 2022 kajantenang nedunang dados 1.669 pesawat, antuk akeh penumpang 194.910 diri, rata-rata 7.218 diri ngarahina, “baos Gubernur Koster.
Manutnyane, penumpang domestik ka Bali ngirangang saantukan kantun wenten ibadah puasa.
Indik kawentenan Covid-19 ring Bali sampun sayan becik, kasus anyar taler ngirangang saha degdeg kawentenane ring angka kalih digit, pantaraning 18 kantos 30 diri ngarahina. Ring tanggal 27 April 2022, akeh kasus anyar wenten 22 diri, sane kenak wenten 17 diri, saha nenten wenten sane kantos padem. Yadiastun wenten kawijakan nenten madaging karantina saking tanggal 7 Maret 2022, nenten wenten kasus anyar sane kapanggihin, napi malih kasus sane anyar nedunang kawentenanipun.
Mapaiketan ring pencapaian vaksin booster sampun langkungan ring 60% rauh ring tanggal 27 April 2022. Mawinan Bali sampun aman pisan karauhin olih wisatawan domestik wiadin wisatawan mancanegara. Gubernur Bali mastikayang penanganan Covid-19 prasida mamargi becik saha krama Baline prasida trepti nglaksanayang protokol kesehatan, mawinan Bali sampun nyaman kalih aman karauhin sajeroning masesanjan. Sangkaning punika Titiang ngolemin para wisatawan mangda rauh ka Bali, nyantenang kaluihan palemahan, kasanggra antuk ramahnyane krama Bali, saha antuk kaluihan Budaya Bali.
Indik penerbangan kapertama Pelita Air ka Bali, Gubernur Koster ngaturang suksma majeng Menteri BUMN RI, Bapak Erick Thohir,
Menteri Perhubungan RI, Bapak Budi Karya Sumadi, Direktur Utama Pertamina RI, Ibu Nicke Widyawati antuk kawijakannyane mapaiketan ring kawentenan Maskapai penerbangan ka Bali
Antuk kawentenan penerbangan anyar saking Pelita Air jagi nincapang ayah-ayahan majeng penumpang regular miwah wisatawan, wisatawan domestik wiadin mancanegara ka Bali. Parindikan puniki dahat mabuat sajeroning nincapang kawentenan Pariwisata Bali sane madasar antuk budaya saha ngutamayang kualitas, antuk pangapti prasida ngwaliang malih pariwisata miwah ekonomi Bali sane kaon pisan sangkaning Pandemi Covid-19 ri g kalih warsa pungkuran puniki.
“Sane mangkin sampun wenten galah nangiang pariwisata Bali, saantukan saking tanggal 7 Maret 2022 sampun kamargiang kawijakan anyar majeng wisatawan mancanegara minakadi nenten wenten karantina wiadin Visa on Arrival (VoA) majeng 43 Panegara,” baos Gubernur Koster.
Manutnyane, rauh mangkin sampun wenten 11 Maskapai sane nglaksanagang penerbangan Internasional ka Bali, saha jagi maweweh malih antuk penerbangan olih Maskapai Emirates, tanggal 1 Mei 2022..
Direktur Utama PT. Pelita Air Service Dendy Kurniawan, sane taler nyarengin parikrama inagura flight saking Jakarta ngruruh Bali maosang dahat bagia saantukan pendaratan kalertama penerbangan komersil Pelita Air ring Bali sampun mamargi antar. Dane taler ngaptiang penerbangan punika prasida nglantur kawentenanipun kantos kapungkur wekas.
“Titiang naler kabuatang mangda setata misuguhang destinasi – destinasi sane anyar, mawinan prasida nyokong program pemerintah, ngardi konektivitas transportasi udara sane becik,” baosnyane.
Pelita Air sane sampun mayusa 52 warsa, kasub pinaka maskapai sane madue kredibilitas kalih reputasi ring sektor charter utawi penerbangan tidak terjadwal, minakadi VVIP, marupa pelayanan kepresidenan majeng Wakil Presiden, Kementrian , wiadin klien – klien Pelita sane tiosan.
“Saking pengalaman punika titiang nyantenang selah ageng ring penerbangan nasional, purun raris ngambil segmen sane rumasuk anyar minakadi segmen penerbangan komersial,” baosnyane sinambi ngaturang suksma antuk sokongan sane kaicen saking samian angga majeng kawentenan Pelita Air. (Rls/Btnc )
Komentar