Gubernur Bali Wayan Koster Nganikain Kakanwil Bali Kemenkumham RI Deportasi WNA Sane Mapoto Tan Pabusana ring Taru Pingit ring Genah Wisata Kayu Putih, Tabanan
- 06 Mei 2022
- 22:05 WITA
- News
DENPASAR, Balitopnews.com - Gubernur Bali, Wayan Koster nganikain Kantor Wilayah Bali Kementrian Hukum dan Hak Asasi Manusia (HAM) Republik Indonesia nglaksanayang deportasi majeng Warga Negara Asing (WNA) sane mapoto nenten nganggen busana ring taru pingit sane magenah ring genah wisata Kayu Putih, Banjar Dinas Bayan, Desa Tua, Kabupaten Tabanan.
Parindikan punika kauningayang langsung ring ajeng Kepala Kanwil Bali Kemenkumham RI, Jamaruli Manihuruk ring rahina Sukra Paing, Gumbreg tanggal 6 Mei 2022 ring Jayasabha.
Gubernur Bali, Wayan Koster nuekang pariwisata ring Bali majanten madasar antuk budaya sane katuekang wantah kaluihan budaya saha nitenin becik tetamian budaya Bali.
Sangkaning punika, Pemerintah Provinsi Bali antuk kapamucukan Gubernur Wayan Koster kantun midabdabin pariwisata Bali malarapan antuk makarya Peraturan Daerah Provinsi Bali Nomor 5 Warsa 2020 indik Standar Penyelenggaraan Kepariwisataan Budaya Bali miwah Peraturan Gubernur Bali Nomor 28 Warsa 2020 indik Tata Kelola Pariwisata Bali sane matetujon nyaga saha nginggilang budaya kalih dresta sane wenten ring Bali. "Budaya, tradisi sane wenten ring Bali patut kawangiang olih sapa sira ugi, rumasuk olih wisatawan sane wenten ring Bali, olih wisatawan domestik wiadin wisatawan mancanegara," Baos pecak Anggota DPR-RI 3 Periode saking Fraksi PDI Perjuangan puniki sapisanan nguningayang yening galah sasampune pandemi puniki patut kaanggen galah sajeroning ngardi visi Nangun Sat Kerthi Loka Bali malarapan Pola Pembangunan Semesta Berencana nyujur Bali Era Baru, mawinan sangkaning punika kepariwisataan Bali patut kalaksanayang malarapan antuk tatanan Era Baru.
Sajeroning tatanan Era Baru, sapunapi pariwisata Bali sayuwakti kalaksanayang madasar antuk budaya sane dahating utama. Sangkaning punika, Gubernur Bali nenten jagi ngicen pangaksama majeng wisatawan sane sampun ngaonang kalih ngaletehin budaya Bali. "Iraga sane pinih utama wantah nyaga budaya rauhing ring kaluihan Bali, imbangang ring ngaksamayang parindikan-parindikan sane ngaonang budaya Bali, saha ngaonang citra Bali ring undagan nasional wiadin internasional," baos Gubernur Bali saking Desa Sembiran, Buleleng puniki.
Bali pinaka genah wisata utama pariwisata dunia, mawinan patut kajaga saha katitenin becik. "Sampun akeh kahanan wiadin parilaksana kaon sane kalaksanayang olih wisatawan, wenten sane malinggih ring genah suci kantos wenten nenten mabusana ring taru sane kapingitang. Puniki majanten kaon pisan, saha patut katiwakang pamidanda. Sangkaning punika, Titiang nganikain Bapak Kanwil Menkumham Provinsi Bali mangda digelis nglaksanayang deportasi majeng wisatawan punika, mangda parindikane puniki prasida taler dados paplajahan majeng wisatawan," Baos Wayan Koster sinambi maosang, durusang rauh ka Bali, nanging mangda setata nginggilang budaya Bali, nginggilang Wangsa Indonesia malarapan antuk budaya ipun, pamekas tetamian budaya Bali.
Kadasarin antuk punika, Gubernur Bali lulusan ITB puniki ngambil pamutus marupa pamidanda majeng sane mamurug, mawinan parindikan kaon sakadi puniki nenten kapanggihin malih ring benjang pungkur, kaanggen paplajahan majeng para wisatawan, minakadi wisatawan domestik wiadin wisatawan mancanegara sane mamurug. "Salami puniki akehan pamurug sane wenten wantah kalaksanayang olih wisatawan mancanegara," Baos Gubernur Koster.
Ring pamuput siaran pers-nyane, Gubernur Bali maosang yening wisatawan asing sane mapesengan Alina Fazleeva miwah Amdrei Fazleeva kewarganegaraan Rusia sampun nglungsur pangampura saha sampun misadia nglaksanayang upacara 'Guru Piduka' utawi Pabersihan Niskala. "Nanging parindikan punika kantun kirang. Titiang iwau sampun ngulemin Kepala Desa, Bendesa Adat, Camat, Danramil, Polsek, miwah Anggota DPRD Kabupaten Tabanan, dadosne nenten prasida antuk nglungsur iwang kewanten wiadin upacara 'Guru Piduka'. Nanging mangda taler kaicen pamidanda marupa deportasi, saantukan puniki mapaiketan sareng kautaman tetamian budaya Bali sane patut kainggilang olih samian angga," Baos Gubernur Bali sinambi maosang yening wengine mangkin jagi kadeportasi, nenten prasida antuk pangampura wiadin ngaturang Guru Piduka, nanging patut katiwakang pamidanda, saha wengine mangkin kadeportasi.
Ring salanturnyane, Gubernur Bali, Wayan Koster jagi sumeken sajeroning ngicen pidanda majeng wisatawan, minakadi wisatawan domestik wiadin wisatawan mancanegara sane maparilaksana kantos ngaonang tetamian budaya Bali, mangda Bali pinaka genah wisata dunia, madue citra sane becik luih ring undagan nasional wiadin internasional. Mawinan anut sareng visi Nangun Sat Kerthi Loka Bali, Pariwisata katitenin sajeroning ngukuhang kawentenan budaya, berkualitas, kalih bermartabat, malarapan antuk ngajiang becik kawentenan dresta, seni, wiadin budaya lokal. "Yening nenten trepti ngamargiang punika, sampunang rauh ka Bali," Baosnyane.
Kepala Kanwil Bali Kemenkumham RI, Jamaruli Manihuruk maosang viralnyane gatra puniki ring media sosial ngawinang Warga Negara Asing sane mapoto tanpa busana ring genah wisata Kayu Putih Banjar Dinas Bayan, Desa Tua, Tabanan ngamolihang uratian ageng saking kramane saantukan lempas saking budaya Indonesia pamekas budaya Bali sane setata ngutamayang adat kalih norma Agama. Ring rahina Buda, 4 Mei 2022, Kanwil Kemenkumham Bali malarapan Kantor Imigrasi Kelas I TPI Denpasar nganikain Tim Seksi Inteldakim Kanim Denpasar sajeroning nyelehin gatra punika malarapan antuk nureksain ring sistem Keimigrasian saha rauh kagenahe punika.
Salanturnyane , ring rahina Wraspati tanggal 05 Mei 2022 galaj 13.00 WITA, kalaksanayang panureksan miwah ngambil keterangan saking WNA punika. Sadurungnyane sampun kalaksanayang serah terima olih Angga Driektorat Kriminal Khusus Polda Bali. Saking panureksan sane kalaksanayang majeng WNA punika kapolihang panlataran sakadi puniki :
Wasta : ALINA FAZLEEVA alias AF (Pr)
Kewarganegaraan : RUSIA
Galah Embas : 04 September 1994
Izin Tinggal : KITAS INVESTOR
Wasta : AMDREI FAZLEEV (Lk)
Kewarganegaraan : RUSIA
Galah embas : 22 Mei 1986
Izin Tinggal : KITAS INVESTOR
Penjamin : PT Art Planet Evolution
Pasangan puniki ngranjing kapertama ka Indonesia ring warsa 2020 miwah sane kaping kalih ring Bulan November warsa 2021. Tetujonnyane rauh ka Indonesia wantah masesanjan miwah investasi. Pasangan puniki pinaka investor sane ngwangun PT. Art Planet Evolution sane uleng ring widang busana kalih alat musik.
Pasangan puniki ngangkenin yening poto viral sane kaunggah ring akun Instagram duen AF wantah ipun sane kalaksanayang daweg tanggal 1 Mei 2022 ring Genah Wisata Kayu Putih Banjar Dinas Bayan, Desa Tua, Tabanan saha nenten uning yening tarune punuka kapingitang olih krama Bali. Pasangan puniki taler ngangkenin yening nenten madue manah ngaonang budaya ring Bali, saantukan manah ipune wantah poto sane madue tema menyatu dengan alam. Manutnyane punika wantah seni saha kadadosang dokumentasi Pribadi nenten Komersil. Tiosan punika, ipun taler ngangkenin ri kala nglaksanayang parilaksanane punika kantun eling saha madasar antuk manahnyane tan madaging paksaan saking anak tiosan. Sangkaning punika, WNA sareng kalih kapatutang nglaksanayang upacara adat ring rahina Sukra 6 Mei 2022 ring Desa Tua, Tabanan manut awig irika.
Saking panureksan sane kalaksanayang, WNA punika sampun mabukti nglaksanayang parikrama sane ngaonang katreptian umum saha nenten nginggilang geguat sane wenten mawinan kakeniang Tindakan Administratif Keimigrasian marupa Pendeportasian saha ipun ngranjing ring Daftar Tangkal sakadi sane kaunggahang ring Pasal 75 ayat (1) Undang- Undang Nomor 6 warsa 2011 indik Keimigrasian.
Kepala Kanwil Bali Kemenkumham RI, Jamaruli Manihuruk ngelingang ring krama ring sakancan wewidangan Bali mangda nyarengin nureksain saha nguningayang yening wenten pamurug sane kalaksanayang Warga Negara Asing mawinan prasida digelis katiwakang pamatut kalih pamidabda. "Majeng samian WNA sane rauh ka Bali mangda setata trepti saha nginggilang hukum kalih nilai budaya krama Bali, durusang nyantenang kaluihan Pulo Bali, nanging yening nglaksanayang pamurug majanten keni pamidanda, saantukan satunggil pamurug jagi wenten pawesana ipun manut ring daging geguat sane wenten," Baos Jamaruli Manihuruk.(Rls/Btnc)
Komentar