Berbakti miwah Berbagi ring Sajebag Bali, Katuekang olih Ketua TP PKK Provinsi Bali ring Kabupaten Gianyar
- 11 Mei 2022
- 23:05 WITA
- News
GIANYAR,Balitopnews.com - Sasampune sampun prasida kamargiang ring 9 Kabupaten/Kota, sane mangkin TP PKK Provinsi Bali sane kamanggalain Putri Koster mawali nglaksanayang program Berbakti miwah Berbagi sane kakawitin saking Kabupaten Gianyar.
Matiosan sareng sadurungnyane sane wantah ngrauhin siki desa ring suang-suang Kabupaten/Kota, sane mangkin Ketua TP PKK Provinsi Bali Putri Koster ngrauhih kalih desa. Parikrama kalaksanayang ring Wantilan Pura Penataran Sasih, Desa Pejeng miwah Griya Taksu-Desa Kemenuh, Gianyar nemonin rahina Buda (11 Mei 2022)
Ring sambrama wacanannyane, Putri Koster maosang yening parikrama sosial berbakti miwah berbagi sane kalaksanayang ring sajebag Kabupaten/Kota ring Bali, tiosan matetujon ngicen wantuan taler sane mabuat wantah tedun langsung ka lapangan nyantenang kauripan kramane, ngwantu kramane mawit ring Balita Gizi buruk / kurang gizi, ibu hamil kekurangan energi kronis (KEK) , para lansia , penyandang disabilitas miwah kader PKK.
Anak istri sane ketah kabaosang Bunda Putri puniki ngawewehin yening PKK ring tengahing krama madue kalih parikrama utama minakadi sosialisasi miwah parikrama sosial. Kader PKK mawit ring undagan pusat, provinsi, kabupaten /kota, kecamatan, desa rauhing ring dasa wisma antuk sinarengan ngardi kasukertan kramane sane kakawitin saking undagan kulawarga.
Bunda Putri taler ngaptiang mangda para kader PKK sajeroning parikramanipun kalaksanayang madasar antuk kalascaryan, ngayah majeng wangsa panegara ngwantu pemerintah masikian sajeroning ngardi kasukertan krama miwah nyarengin ngaremba ngulati visi Pemerintah Provinsi Bali 'Nangun Sat Kerthi Loka Bali".
Kader PKK taler ngaptiang sayuwakti makarya nglaksanayang 10 Program Pokok PKK sekadi HATINya PKK, Posyandu, miwah program pemerintah sakadi ngirangin luu plastik, pengelolaan sampah berbasis sumber wiadin program nambakin stunting. Sangkaning punika, Bunda Putri nyarengang samian kader PKK mangda urati ring palemahan miwah ngayah majeng wangsa panegara.
Dane ngawewehin yening Pemeritah Pusat miwah Pemerintah Provinsi Bali sane mangkin sumeken pisan sajeroning nambakin kawentenan stunting. Bali wenten ring peringkat pinih alit mapaiketan ring angka stunting. Malarapan antuk pangremba saking PKK Desa, angka stunting kaaptiang prasida ring angka nol utawi zero. Putri Koster ngaptiang para calon ibu mangda nguratiang becik kandungannyane, ngajeng ajeng-ajengan bergizi saha nglaksanayang pola idup sehat. Antuk punika anak alit sane embas prasida kenak. “Titiang ngaptiang kader PKK sane wenten ring Desa sumeken ngarepin pikobet puniki, mawit ring sosialisasi kalih pendampingan majeng ibu hamil wiadin ring posyandu mawinan ring slaanturnyane anak alitnyane prasida kenak rahayu saha pradnyan, prasida luput ring kawentenan stunting”, baosnyane.
Putri Koster taler ngaptiang ring Kepala Desa wiadin Perbekel sane ngarauhin parikrama punika, ngulengang pamargin Pergub Nomor 47 Warsa 2019 mapaiketan ring Pengelolaan Sampah Berbasis Sumber. Manut Bunda Putri pikobet luu patut kakawitin saking wit utawi sumbernyane mangda nenten nyemerin wewidangan tiosan. Yening parindikan puniki sayuwakti kalaksanayang majanten Bali manados resik luput saking kawentenan luu.
Parindikan tiosan sane kauningayang majeng kader-kader PKK ring Desa wantah mangda sayuwakti ngwantu Kepala Desa ngaremba program-program Desa. “ TP PKK miwah Kepala Desa sakadi kakalih kampid sane ngawinang paksine mangumbara. Punika taler pangremba PKK ring pemerintahan. Sareng-sareng nglaksanayang visi misi ngardi pewangunan ring Bali,” baosnyane.
Sajeroning parikrama sosial ring kalih desa punika, suang-suang desa kaicen wantuan 1 ton beras kaicen majeng 50 diri krama, suang-suang kaicen 20 kg antuk pawilanganipun, 10 diri majeng balita gizi buruk/ kurang gizi, 10 diri ibu hamil kekurangan energi khusus (KEK) , 10 diri lansia, 10 diri penyandang disabilitas miwah 10 diri kader PKK. Taler kasukserahang 80 kotak susu (suang-suang kaicen 2 kotak susu) majeng 10 balita gizi buruk/kurang gizi miwah 80 kotak susu majeng lansia, ibu hamil, difabel miwah kader PKK. Wantuan marupa adeng 50 krat @ 1 krat majeng lansia, difabel, ibu hamil, balita miwah kader PKK.
Parikrama punika karauhin olih Ketua TP PKK Kabupaten Gianyar Surya Adnyani Mahayastra, Wakil Ketua 1 TP PKK Kabupaten Gianyar Ida Ayu Diana Dewi Agung Mayun, Ketua DPD Forum Pemberdayaan Perempuan Indonesia (FPI) Provinsi Bali Ni Made Rahayuning , Kepala Dinas Pemberdayaan Masyarakat Desa, Kependudukan dan Pencatatan Sipil Provinsi Bali Putu Anom Agustina miwah kasukserahang Buku Hasil Rakernas IX PKK Warsa 2021 majeng Ketua TP PKK Kabupaten Gianyar minakadi Buku Rencana Induk Gerakan PKK Warsa 2021-2024, Buku Strategi Gerakan PKK miwah Buku Juknis Tata Kelola Kelembagaan PKK. (Rls/Btnc)
Komentar