Gubernur Bali, Wayan Koster Ngaturang Rahajeng ring Dewa Nyoman Rai Pinaka PAW Anggota DPRD Bali
- 17 Mei 2022
- 22:05 WITA
- News
DENPASAR,Balitopnews.com - Gubernur Bali, Wayan Koster ngaturang rahajeng ngamong tugas anyar majeng Dewa Nyoman Rai, SH pinaka Pengganti Antar Waktu (PAW) Anggota DPRD Bali ring sisa masa jabatan 2019-2024.
Parindikan punika kauningayang langsung olih Gubernur Bali, Wayan Koster ri kala ngrauhin Rapat Paripurna ka-12 DPRD Provinsi Bali Masa Persidangan II Warsa 2022 ring rahina Anggara Pon, Warigadean, tanggal 17 Mei 2022 antuk parikrama pamikukuhan Pergantian Antar Waktu (PAW) DPRD Provinsi Bali majeng Dewa Nyoman Rai, SH sane ngentosin Anggota Fraksi PDI Perjuangan DPRD Bali, Nyoman Adnyana saking Dapil (daerah pemilihan, red) Kabupaten Bangli sane palatra daweg tanggal 19 Pebruari 2022 sane sampun lintang.
Pamikukuhan Pengangkatan Pergantian Antar Waktu (PAW) DPRD Provinsi Bali puniki kacihnayang antuk pengambilan sumpah/janji miwah pemasangan insigne olih Ketua DPRD Provinsi Bali, I Nyoman Adi Wiryatama majeng Dewa Nyoman Rai miwah kasaksiang langsung olih Gubernur Bali, Wayan Koster rauhing ring Manggala wiadin Anggota DPRD Bali tiosan ring Ruang Sidang Utama Gedung DPRD Provinsi Bali.
Sajeroning sambrama wacanannyane, Gubernur Bali jebolan ITB puniki ngaptiang majeng Dewa Nyoman Rai pinaka PAW Anggota DPRD Bali ring sisan masa jabatan 2019-2024 mangda makarya sabecik-becikne, profesional, tertib, disiplin saha setata ngutamayang kesantunan. “Anggota Dewan ngamolihang predikat terhormat. Sangkaning punika, baos miwah parilaksana majanten patut kauratiang mangda prasida dados tetuladan kramane. Puniki dados parindikan dahat mabuat sajeroning ngwangun kinerja dewan," Baos Ketua DPD PDI Perjuangan Provinsi Bali puniki sinambi maosang ring kawentenan anggota sane anyar ring DPRD Bali kaaptiang prasida nincapang angga sajeroning ngwangun jagat Bali madasar antuk visi Nangun Sat Kerthi Loka Bali malarapan Pola Pembangunan Semesta Berencana nyujur Bali Era Baru.
Malarapan antuk pengambilan sumpah/janji Dewa Nyoman Rai pinaka PAW Anggota DPRD Bali, Gubernur Bali saking Desa Sembiran, Buleleng puniki taler ngaturang suksma majeng Ketua DPRD Bali mawinan gelis kalaksanayang parikrama PAW. "Risampune SK Mendagri tedun daweg tanggal 13 Mei wengine, Titiang nguningayang langsung mangda pamikukuhan digelis kalaksanayang. Titiang naler ngajiang becik angga KPU, saantukan sampun nglaksanayang antisipasi malarapan regulasi mawinan prasida kalaksanayang PAW lintas Dapil," Baos Gubernur Bali sinambi maosang pamikukuhan Dewa Nyoman Rai majanten pinaka jalan idup. Saantukan, Dewa Nyoman Rai pinaka kader PDI Perjuangan saking Dapil Buleleng sane mapilih ngentosin Nyoman Adnyana sane sampun palatra saking Dapil Bangli. Dadosne jalan idup majanten nenten prasida manarka. Saking Dapil Buleleng ngamolihang galah nagingin PAW saking Dapil Bangli. Puniki wiwilanipun saantukan sane ring Bangli sampun nenten dados kaunggahang dados PAW, saantukan ipun nenten malih pinaka anggota PDI Perjuangan. (Rls/Btnc
Komentar