Ketua TP PKK Provinsi Bali Dados Narawakya Dialog Interaktif  ‘Pola Asuh Anak wiadin  Remaja ring Era Digital

Putri Koster dados narawakya sajeroning  dialog interaktif sane ngunggahang unteng Pola Asuh Anak dan Remaja di Era Digital (PAAREDI)

DENPASAR,Balitopnews.com - Ketua TP PKK Provinsi Bali Putri Koster dados narawakya sajeroning  dialog interaktif sane ngunggahang unteng Pola Asuh Anak dan Remaja di Era Digital (PAAREDI) ring Radio Flamboyan Bali Indah, Denpasar, Wraspati tanggal 19 Mei 2022

Ring pangawit panlatarannyane, Putri Koster maosang yening pandemi Covid 19 ngamatutang akeh parindikan ngawigunayang dunia digital. Kawentenan media digital majanten ngicen pawesana becik, komunikasi sayan dangan. "Nanging tiosan punika, kawentenan media digital majanten taler madue pawesana kaon sane patut katambakin pamekas majeng anak alit wiadin yowana, " Baos Putri Koster. 

Anak istri sane ketah kabaosang Bunda Putri ngawewehin yening nuntun anak alit ring era digital puniki majanten dados pakibeh majeng yayah rena.  Panglimbak teknologi digital  sane dahating ageng mawesana kaon majeng panglimbak para yowana wangsa, inggian ring fisik wiadin psikologis, yening yayah renanipune nenten nguratiang pawesana sangkaning panglimbak teknologi punika . Ring fisik , kawentenan gadget prasida ngirangin parikrama fisik anak alit ipun sane taler mawesana majeng kesehatan sangkaning radiasi sane kaawinang. Tiosan punika, gadget yening nenten kawatesin taler mawesana majeng psikis anak alit, prasida ngicalang rasa percaya diri, anak alit dados osah utawi gelisah , ngaptiang napi napi  mangda dangan saha anak alit dados gelis nyerah.

Bunda Putri ngawewehin, sajeroning nambakin pawesana kaon sane kaawinang olih panglimbak digital puniki ,pangremba saking yayah rena dahating mabuat. Patut kaangkenin yening yayah rena wiadin anak alit puniki embas ring jaman sane matiosan. Sangkaning punika pinaka yayah rena patut ngutamayang nyihnayang kapitresnan, ngicen tuntunan, nureksain kalih ngicen tetuladan sajeroning nganggen gadget. Sakadi antuk ngwatesin nganggen gadget saha ngenterang parikrama pianak ipun majeng parikrama sane  produktif. Yayah rena mangda taler prasida ngicen tetuladan sajeroning nglaksanayang geguat sane sampun kacumpuin ring kulawarga.

Putri Koster taler maosang , PKK sajeroning parikrama ipun setata mautsaha nglaksanayang sosialisasi malarapan antuk ngrauhang para wagmi utawi pakar sajeroning ngicen pangweruhan ring krama pamakes ring yayah rena, yowana wiadin anak alit mapaiketan sareng pawesana kaon  saking dunia digital wiadin pangupaya sane prasida kalaksanayang sajeroning nambakin parindikan punika. 

Ketua STMIK Primakara I Made Artana sane taler ngrauhin pinaka narawakya maosang, yayah renanipun mangda eling ring angga yening pianak ipune embas ring jaman sane matiosan, utawi alit-alite mangkin majanten embas ring jaman digital. " Iraga pinaka yayah rena patut ngwangun titi utawi jembatan mawinan prasida nyambung sareng anak alit ipune saha prasida ngicen tuntunan manut ring kahanan sane wenten, " Baosnyane. 
Pangremba saking yayah rena dahating mabuat sajeroning nees pawesana maon sangkaning media digital, silih tunggilnyane antuk ngicen alit-alitnyane pangweruhan  indik sastra agama, ngenterang mangda ngambil parikrama sane produktif miwah sane taler mabuat  cumponin indik geguat ngawigunayang gadget sane patut kamargiang olih anak alit wiadin yayah rena. "Anak  alitnyane mangda taler kauningayang indik geguat marupa etika ri kala wenten ring dunia maya miwah milihin gatra sane kapolihang, mawinan penglimbak teknologi digital sane dahating ageng prasida ngicen pawesana becik  wiadin kaon, prasida katambakin, "baosnyane. (Rls/Btnc)


TAGS :

Komentar