Pelaku Pariwisata miwah General Manager Hotel  Nyokong Koster - Ace Kalih Periode 

  • 03 Juni 2022
  • 14:06 WITA
  • News
Nyoman Sugiartha pinake Owner Pondok Nyoman

DENPASAR,Balitopnews.com - Ketua Aliansi Pelaku Pariwisata Marginal Bali (APPMB), Wayan Puspa Negara rumasa bagia risampune Gubernur Bali, Wayan Koster ngicen arahan majeng Pelaku Pariwisata ring Bali sajeroning nglaksanayang pariwisata Bali sane nguratiang kalestarian palemahan, pawongan miwah kabudayan Bali antuk sinarengan nguratiang kahanan Niskala-Sakala ngardi tata titi kauripan, idup sane ngidupin, Urip sane nguripin, becik sinarengan, tumbuh sinarengan, maurip sinarengan, nglimbak sinarengan, kuat sinarengan miwah mawiguna antuk sinarengan ring rahina Anggara Paing Sungsang 31 Mei 2022 ring Gedung Ksirarnawa, Art Center, Denpasar. 

Parikrama taler karauhin olih Wakil Gubernur Bali, Tjokorda Oka Artha Ardhana Sukawati, miwah Kepala Dinas Pariwisata Provinsi Bali, Tjokorda Bagus Pemayun. 

Puspa Negara maosang napi sane kabaosang  Gubernur Koster indik program pewangunan galahe mangkin miwah ri kapungkur madasar visi Nangun Sat Kerthi Loka Bali malarapan Pola Pembangunan Semesta Berencana ngulati Bali Era Baru prasida tinas kakantenang,  faktual saha komfrehensif. “Bapak Gubernur sampun midabdabin tonggak sane utama ngutsahayang pewangunan  pariwisata Bali sane nglantur sane madasar budaya Bali. Titiang pinaka pelaku usaha marginal banget ngajiang parindikan punika. Saantukan Bapak Wayan Koster pinaka manggalaning daerah sane sampun makarya regulasi dahat mabuat marupa Peraturan Daerah Provinsi Bali Nomor 5 Warsa 2020 indik Standar Penyelenggaran Kepariwisataan Budaya Bali sane ring galahe mangkin manados jiwatman kepariwisataan ring Bali sane patut kamargiang becik,” baos anak lanang saking Kabupaten Badung puniki sinambi nguningayang rasa bangga, Gubernur Koster sampun mautsaha ageng melanin pabuat Bali ring Pemerintah Pusat mangda  status Bali mauwah saking pandemi ngruruh endemi madasar antuk Bali Era Baru, mangda pangrauh Wisatawan Mancanegara (Wisman) ka Bali sayan akeh.

Puspa Negara taler maosang  Gubernur Koster sampun nyawis pikobet-pikobet sane nibenin Pelaku Pariwisata. Malarapan antuk reopening border tanggal 4 Februari 2022 puniki. Ri kala reopening border,  maskapai penerbangan Garuda kakantenang nglaksanayang penerbangan direct flight saking Narita Tokyo ka Denpasar makta  Wisman miwah Biro Perjalanan Pariwisata saking Jepang. “puniki dahat ngangobin. Utsaha Pak Gubernur saking perspektif regulasi miwah eksekutor mabukti dahat mawiguna, krama banget ngajiang. Napi malih kasanggra malih olih maskapai penerbangan luar negeri sane tiosan sakadi Singapore Airlines ping pitu ngaminggu, wenten taler Jet Star Asia, Garuda saking Melbourne ka Denpasar sane taler makta penumpang. Puniki pinaka pamidabdab saking Bapak Gubernur Bali, ring kahanan faktual Titiang ngrasayang malarapan antuk pangrauhnyane 17 maskapai asing ring Bali, majanten cihna becik majeng pariwisata Bali sane sampun maurip malih,” baos pecak Anggota DPRD Badung puniki sinambi maosang ngawit libur lebaran pelaku pariwisata akeh sane nadak muka layanan pariwisata. Wenten sane kamarnyane durung resik nanging tamu sampun ngranjing. "Pamuputne, prasida kapanggihin okupansi hotel ri kala libur lebaran sampun wenten sane full booking, napi malih wenten sane kantos ngingsirang tamu ka genah tiosan, " baosnyane. 

Manut data sane wenten, akeh wisatawan asing sane sampun ngranjing ring Bali kantos panguntat Maret 2022 wenten 14.622 diri, rumasuk sane mawit saking Bandara Ngurah Rai wiadin saking Pelabuhan Benoa. “Puniki pinaka panglimbak sane karasayang saha rauh mangkin titiang ngrasayang panglimbak pariwisata ring Bali,” baos Puspa Negara sinambi maosang rasa bangganyane majeng Gubernur Koster antuk capaian kinerja kantos ring panguntat masa jabatannyane ring warsa 2023 sampun namiang 9 program infrastruktur fundamental (Program Pelindungan Kawasan Suci Pura Agung Besakih, Kawasan Pusat Kebudayaan Bali, Pelabuhan Segitiga Emas Sanur ring Denpasar, Sampalan ring Nusa Penida, miwah Bias Munjul ring Nusa Ceningan, Klungkung, Bali Maritime Tourism Hub, Shortcut Mengwi – Singaraja, Jalan Tol Jagat Kerthi Bali Gilimanuk – Mengwi, Bendungan Sidan, Bendungan Tamblang, miwah Turyapada Tower KBS 6.0 Kerthi Bali, red). Dahat ngangobin napi sane sampun kawangun ring Bali sajeroning nabdabin kepariwisatan Bali nyujur krama Bali sane bagia. "Sangkaning punika titiang nguningayang pariwisata Bali Bangkit, Koster – Ace amazing, lanturang, " Baosnyane. 

Ms. Katya Herting, GM Raffles Bali ngaturang suksma saha ngajiang becik regulasi sane sampun kakaryanin Gubernur Bali, Wayan Koster indik Peraturan Gubernur Bali Nomor 79 Warsa 2018 indik Hari Penggunaan Busana Adat Bali, "Titiang jagi nglaksanayang becik ring Raffles Bali. Sajeroning nyokong program Bapak Gubernur Koster, Titiang ring Raffles Bali taler jagi ngawigunayang produk – produk lokal Bali manut daging Peraturan Gubernur Bali Nomor 99 Warsa 2018 indik Pemasaran wiadin Pemanfaatan Produk Pertanian, Perikanan kalih Industri Lokal Bali, Peraturan Gubernur Bali Nomor 1 Warsa 2020 indik Tata Kelola Minuman Fermentasi utawi Destilasi Khas Bali, miwah Surat Edaran (SE) Gubernur Bali Nomor 17 Warsa 2021 indik Pemanfaatan Produk Garam Tradisional Lokal Bali mangda kaanggen ring dapur utawi kitchen pinaka lakaran dapur sane becik saking Bali. 

Titiang taler gargita pisan antuk kabungkahnyane airport, pangaptin titiang miwah panruwe hotel sane tiosan prasida nglaksanayang parikrama kepariwisataan, antuk kawenten kawijakan sane becik puniki. Titiang taler jagi ngamargiang becik samian kawijakan Bapak Gubernur Bali, "baos Ms. Katya Herting, GM Raffles Bali.

Nyoman Sugiartha pinaka Owner Pondok Nyoman maosang, sareng sami sampun mirengang Gubernur Bali, Wayan Koster ngawedar programnyane sane dahating utama. Wenten silih tunggil komitmen miwah pangapti anyar, ri sampune Bapak Gubernur Koster ngamargiang Bali reopening border mawinan iraga tancap gass langsung," baos Sugiartha sinambi ngiringang pelaku pariwisata tepuk tangan majeng Pak Gubernur Wayan Koster. Saantukan punika, Titiang jagi setata nyokong program Pak Gubernur Bali, patut kaangkenin yening Bali maurip sangkaning pariwisata. Punika taler sahananing program kerja saking Gubernur Koster, ngiring sareng-sareng nyokong, sinah napi sane kaaptiang, napi sane dados target utawi goal majeng Bali prasida kapolihang, saantukan iraga sareng sami ring visi miwah misi sane pateh, mamargi antuk sinarengan.

Mr. Kevin Girard, GM Conrad Bali ngaturang parama suksma majeng Gubernur Bali, Wayan Koster, saantukan sampun micayang genah miwah galah sajeroning miarsayang pangrencana miwah program utama Gubernur Bali, sajeroning nyujur - era baru pariwisata Bali. "Titiang pacang ngwangun kanti nyokong tetujon Bapak Gubernur Wayan Koster sane becik puniki, mangda bisnis sayan nglimbak. "Kaluihan palemahan Bali jagi setata ngadautin kayun tamune, punika taler palemahan kalih para dewata sane nuntun iraga ring Bali, antuk punika iraga patut nyarengin ngaremba mangda prasida ngwantu ngruruhang pamargi majeng pikobet ageng sane sampun ngaonang pariwisata Bali, ngiring samian masikian memanajemen destinasi antuk ngaresikang tukad, segara miwah pasisi, prasida nyanggra wisatawan sane rauh ka Bali antuk kahanan sane lestari," Baosnyane sinambi maosang Recover Together, Recover Stronger, ladba karya, sidakarya, Om shanti, shanti, shanti Om.

Owner Toya Devasya, Ketut Marjana maosang, banget nginggilang miwahbrumasa bangga ring Gubernur Wayan Koster kasarengin Wakil Gubernur, Cok Ace. "Titiang bangga miwah ngajiang becik, taler titiang angob manggihin program pewangunan Bapak Gubernur Koster sane sampun mamargi ring galah puniki. Nenten wantah samaya politik kewanten, nanging sampun mabukti saha prasida kakantentenang olih iraga sareng sami.

Napi sane kawedar Pak Gubernur, majanten digelis kamargiang, suksma Pak Gubernur Bali," baos anak lanang saking Bangli puniki.

Salanturnyane dane maosang pinaka krama sane meneng ring bongkol Gunung Batur utawi wewidangan Geopark Batur ngrasayang yening nenten wantah Jalan Tol Jagat Kerthi Bali Gilimanuk - Mengwi, Pelindung Kawasan Suci Pura Agung Besakih, ngantos Kawasan Pusat Kebudayaan Bali, nanging taler rauh ring wewidangan Bangli, minakadi pewangunan Pasar Bangli. "Titiang taler miragiang jagi wenten program pelestarian Geopark Batur. Puniki dahat utama. Suksma antuk kawijakana Pak Gubernur, nenten wantah pewangunan infrastruktur fisik, nanging taler ring parindikan budaya, ngawit saking busana Bali, aksara Bali, ngresikang luu, nangiang Desa Adat, puniki dahating utama." cutetnyane.

Makapanguntat, Ketut Murjana maosang pinaka krama Kintamani, Batur banget ngajiang parindikan puniki. Miwah nureksain ri kala puniki kaandegang kantos 1 periode, sinah pewangunan Bali sane utama puniki prasida nentennkalanturang. "Punika mawinan, titiang pinaka krama Bangli matueling, manawi Koster - Ace prasida malih ngamanggalain pemerintahan ring Provinsi Bali puniki." Baosnyane raris kasanggra antuk andup-andup utawi tepuk tangan. (Rls/Btnc) 


TAGS :

Komentar