Ketua TP PKK Provinsi Bali Kunjungan Kerja ring Kabupaten Buleleng Nyukserahang Wantuan Majeng Lansia
- 04 Juni 2022
- 16:06 WITA
- News
SINGARAJA Balitopnews.com - Ketua TP PKK Provinsi Bali Putri Koster nyukserahang wantuan beras majeng para lanjut usia (lansia) ring Kantor Desa Banyuatis, Kecamatan Banjar, Kabupaten Buleleng, Sukra, 3 Juni 2022.
Sajeroning piteketnyane sane cendet ring ajeng sawetara 80 diri lansia, anak istri sané ketah kabaosang Bunda Putri puniki maosang yening wantuan beras sané kasukserahang ring galah semeng puniki akehnyane 2 ton sinarengan sareng pidabdab nyanggra pangrauh rahina Galungan miwah Kuningan.
Bunda Putri ngaptiang wantuan sané kaicen prasida ngwantu krama sajeroning nyanggra rerahinan jagat.
Pangrauh Bunda Putri rahina semeng ring tengahing para panglingsir taler mangda nguningin langsung kawentenan para panglingsire irika. Bunda Putri ngaptiang mangda para lansia setata nureksain kesehatan miwah digelis ngrauhin fasilitas kesehatan ri kala karasayang wenten pinungkan, mangda para lansia setata kenak rahayu dirgayusa, setata prasida ngrastitiang pianak cucunnyane ring kauripan puniki.Ring galahe punika taler kasukserahang wantuan marupa 100 bibit taru duren miwah 100 bibit taru manggis sané kasukserahang olih Kepala Dinas Kehutanan miwah Lingkungan Hidup Provinsi Bali I Made Teja majenh Kepala Desa Banyuatis Gede Muliartha.
Risampune nyukserahang wantuan majeng ring para lansia, Putri Koster kasarengin rombongan ngamolihang galah ngrauhin Sekaa Gong Wanita Gita Keswara sané anggotanyané mawit saking Ibu PKK ring wewidangan Desa Banyuatis.
Makapanguntat kunjungan kerjanyane ring Kabupaten Buleleng, istri saking manggalaning jagat Bali puniki taler nyelehin kawentenan Pengelolaan Luu Berbasis Sumber sane kaolah olih Bumdes Tirta Amerta sané genahnyane nampek sareng Kantor Desa Banyuatis, (Rls/Btnc)
Komentar