BBTF ka-8, Cok Ace Nlatarang Pangrencana Anyar Kepariwisataan Bali
- 16 Juni 2022
- 14:06 WITA
- News
DENPASAR,Balitopnews.com - Bali and Beyond Tourism Fair (BBTF) mawali kalaksanayang ring tanggal 15-17 Juni 2022. Kamanggalain olih ASITA Bali, BBTF ka-8 puniki prasida nemuang 181 seller, 273 buyer saking 30 panegara ring jagate. Nenten panegara-panegara langganan BBTF kewanten nanging acara pameran pariwisata puniki taler kasarengin makudang panegara anyar, silih tunggilnyane panegara Nigeria.
Antuk ngunggahang unteng Balancing in Harmony, pangaptine melarapan antuk pamargin BBTF ka-8 puniki industri pariwisata nenten ngutamayang pangrauh wisatawan kewanten, nanging taler sapunapi ngardi pariwisata berkelanjutan saha prasida ngicen multiflyer impact sane sayan akeh majeng kramane.
Parindikan puniki taler kabaosang olih Wakil Gubernur Bali, Prof. Tjokorda Oka Artha Ardana Sukawati, “Pewangunan ring Bali selami puniki sampun lempas saking kaidah filosofi sane katamiang olih leluhur krama Bali. Nenten imbang pantaraning Bali utara, selatan, timur miwah Bali barat. Pemerintah Provinsi Bali sane mangkin mautsaha ngimbangang pewangunan ring Bali minakadi pewangunan Tol Denpasar Gilimanuk. Yening nenten nganggen jalur umum, saking Denpasar ngruruh Bali Barat utawi Gilimanuk muatang galah 4 kantos 5 jam, melarapan antuk Tol Denpasar -Gilimanuk wantah muatang galah kirangan ring 2 jam. Puniki taler jagi nyokong industri perikanan sane wenten ring Bali Barat”, baos Cok Ace.
Tiosan punika, Pemerintah Provinsi Bali taler nglimbakang health tourism minakadi pewangunan rumah sakit internasional sane wenten ring wewidangan wisata Sanur. Melarapan antuk kawentenan rumah sakit internasional puniki WNI kaaptiang nenten malih matamba ring duranegara, nanging prasida milih Bali pinaka genah matamba sinambi nyantenang kaluihan palemahan wiadin budaya Bali. Parindikan puniki kasokong antuk makudang-kudang proyek infrastruktur sakadi pewangunan ‘sanur harbour’ miwah Bali Mangusadi sane pinaka Asosiasi Herbal Bali.
Cok Ace ring salanturnyane ngaptiang mangda kepariwisataan Bali prasida nyujur kepariwisataan sane sayuwakti becik. Nenten wantah nguratiang akeh wisatawan kewanten nanging sapunapi pariwisata ngicen pawesana ageng majeng kramane.
Komentar