Pogram Reforma Agraria ring Kapamucukan Gubernur Bali Wayan Koster miwah Wagub Tjokorda Oka Sukawati kalanturang malih ring Desa Sumberklampok, Buleleng
- 22 Juni 2022
- 12:06 WITA
- News
Risampun puputnyane 61 warsa Konflik Agraria, sane mangkin Kepala Staf Presiden kasarengin Lintas Kementrian nyukserahang 21 Program Pemberdayaan majeng Desa Sumberklampok
BULELENG, Balitopnews.com - Program Reforma Agraria ring Pulo Bali ring kapamucukan Gubernur Bali, Wayan Koster miwah Wakil Gubernur Bali, Tjokorda Oka Artha Ardana Sukawati mawali kalanturang ring Desa Sumberklampok, Kecamatan Gerokgak, Kabupaten Buleleng maprakanti sareng Pemerintah Pusat pamekas Kepala Staf Presiden, Jenderal TNI (Purn) Moeldoko kasarengin Menteri Pertanian RI, Menteri Koperasi dan UKM RI, miwah Wakil Menteri ATR/BPN.
Prakanti utawi sinergi punika kakardinin sajeroning nglanturang arahan Presiden Republik Indonesia, Bapak Ir. Joko Widodo daweg tanggal 22 September warsane sampun lintang miwah kantos mangkin kaicen program marupa Panyukserahan 21 Program Pemberdayaan Hasil Integrasi Lintas Kementerian sajeroning Reforma Agraria ring Desa Sumberklampok sane karauhin langsung olih Kepala Staf Presiden, Jenderal TNI (Purn) Moeldoko kasarengin Menteri Pertanian RI, Menteri Koperasi dan UKM RI, Wakil Menteri ATR/BPN miwah Wakil Gubernur Bali, Tjok. Oka Artha Ardhana Sukawati sane kasarengin Sekretaris Daerah Provinsi Bali, Dewa Made Indra daweg , Anggara (21 Juni 2022) ring Balai Desa Sumberklampok, Kecamatan Gerokgak, Kabupaten Buleleng.
Risampun sadurungnyane Gubernur Wayan Koster kasarengin Kementerian ATR/BPN, miwah Kantor Wilayah BPN Provinsi Bali muputang prakara agraria sane panjang pisan kantos 61 warsa utawi ngawit warsa 1960 saha prasida kapuputang ring kapamucukan Gubernur miwah Wakil Gubernur Bali (Wayan Koster - Cok Ace, red) melarapan antuk redistribusi tanah sane jimbarnyane 458,7 hektar marupa nyukserahang 1.613 sertifikat sane kalaksanayang ring kalih paletan, minakadi, 800 sertifikat ring tanggal 18 Mei 2021 miwah 813 sertifikat ring tanggal 21 September 2021.
Wakil Gubernur Bali, Prof. Tjok. Oka Artha Ardhana Sukawati sane ngangganin Gubernur Bali, Wayan Koster sajeroning sambrama wacanannyane, ngaturang suksmaning idep risampune Desa Sumberklampok kapikukuhang pinaka desa percontohan sepisanan pinaka desa sane ngamolihang wantuan pemberdayaan hasil integrasi lintas Kementerian sajeroning Reforma Agraria. "Paletan kapertama reforma agraria ring Desa Sumberklampok sampun kamargiang antuk muputang redistribusi aset minakadi ngicen hak atas tanah miwah sepisanan ngicen sertifikat tanah majeng krama Desa Sumberklampok antuk gratis sane manados subyek reforma agraria minakadi 1.613 sertifikat hak milik majeng 912 KK," Baos Cok Ace sane setata uleng makarya kasarengin Gubernur Bali, Wayan Koster ring Pemprov Bali, saha maosang sesampune paletan kapertama puput, ring rahinane mangkin kalanturang antuk redistribusi akses majeng sumber daya perekonomian mawinan krama sane sampun ngamolihang hak atas tanah prasida nglimbakang usaha-usaha produktif sajeroning nincapang kasukertan kramane.
Wakil Gubernur Bali saking Puri Agung Ubud puniki ngaptiang majeng krama wiadin Perbekel Desa Sumberklampok mangda prasida nyaga, ngelola miwah mretenin reforma agraria puniki sajeroning nincapang kasukertan wiadin ekonomi krama irika, saantukan Desa Sumberklampok kapilih pinaka Desa Percontohan Program Pemberdayaan majeng reforma agraria, saha sampun katentuang makudang pamargi mangda program pemberdayaan melarapan 21 program terpadu sayan gelis, antuk nyarengang makudang-kudang Kementerian. 21 program punika minakadi 11 program kegiatan sane kapucukin KKP inggih punika 4 parikrama saking Kementerian Koperasi UKM, 5 parikrama Kementerian Pertanian, 1 parikrama Kementerian Desa Pembangunan Daerah Tertinggal dan Transmigrasi, kantos pemetaan sosial olih Kementerian ATR/ BPN melarapan antuk program marupa pelatihan, pendampingan, wiadin bantuan. Wantuan punika wenten marupa 100 ekor sapi Bali, pewangunan sarana & prasarana perikanan, miwah pelatihan digital
marketing majeng pelaku usaha mikro.
Kepala Staf Presiden, Jenderal TNI (Purn) Moeldoko maosang yening Desa Sumberklampok kautamayang mangda program pemberdayaan ring Desa Sumberklampok prasida digelis kamargiang. Pamikolihnyane kacumpuin 21 program sane kalaksanayang terpadu antuk nyarengang lintas Kementerian. “Pemerintah nenten nyukserahang sertifikat tanah kewanten, nanging taler prasida kasalurang wantuan-wantuan marupa modal, bibit, pupuk, pelatihan mangda tanah sane kagarap sayan produktif saha prasida mapikolih. Risampune dipetakan, program pemberdayaan reforma agraria puniki miwah samian sampun anut sareng pabuat kramane, antuk dana bantuan kantos Rp 10 Milyar Rupiah,” baosnyane.
Reforma Agraria taler kabaosang pinaka silih tunggil program prioritas Presiden RI, Bapak Ir. Joko Widodo saking warsa 2015 kantos mangkin. Wenten 28 yuta sertifikat sampun kasukserahang Presiden melarapan Kementrian ATR BPN ring samian provinsi.
Panyokong Kementerian Kelautan dan Perikanan sajeroning Program Pemberdayaan Masyarakat Reforma Agraria ring Lokasi Prioritas Desa Sumberklampok miwah Program Pemberdayaan Masyarakat Kelautan dan Perikanan ring Kabupaten Buleleng Warsa 2022 taler sampun wenten 16 parikrama antuk total anggaran Rp. 4,63 miliar minakadi :
a) Pemberdayaan Masyarakat Desa Sumberklampok wenten 8 parikrama antuk anggaran Rp. 371,36 yuta minakadi Pelatihan Budidaya Rumput Laut miwah Lobster majenh 30 diri, 1 unit wantuan Budidaya Ikan Bioflok, 1 paket Pakan benih, miwah bahan pendukung bioflok, Pelatihan budidaya bioflok majeng 10 diri krama, Operasional 1 Penyuluh majeng 4 kelompok pelaku utama kelautan wiadin perikanan, Pendidikan Vokasi DIII Politeknik Kelautan dan Perikanan Jembrana kantos lulus majeng adiri krama, Distribusi Kartu Kusuka majeng 46 diri, wantuan benih ikan kakap putih 11.500 ekor;
b) Kementerian Kelautan dan Perikanan taler nglaksanayang parikrama sajeroning nyokong Program Pemberdayaan Masyarakat Kelautan dan Perikanan ring Kabupaten Buleleng wenten 8 parikrama antuk anggaran Rp 4,25 miliar minakadi Operasional 14 penyuluh sajeroning ngicen tuntunan 274 kelompok pelaku utama KP, Pelatihan Masyarakat Kelautan dan Perikanan wenten 100 diri, Pendidikan Vokasi DIV Politeknik AUP miwah DIII Poltek Kelautan dan Perikanan Jembrana kantos lulus majeng 36 diri, 1 paket Sarpras wisata bahari, Permodalan sakinh Badan Layanan Umum Lembaga Pengelola Modal Usaha Kelautan dan Perikanan majeng 3 unit usaha kelautan dan perikanan, 1 unit Sarana peralatan pengolahan non pangan (kerajinan kekerangan), 1 paket Bantuan Budidaya Ikan Bioflok, miwah wantuan Bibit Rumput Laut akehnyane 5 ton. (Rls/Btnc)
Komentar