Becik Majeng Kesehatan Sepisanan Ngrumaketan Pasemetonan, Wagub Cok Ace Ngajiang Becik Indonesia Heart Bike 2022

  • 18 September 2022
  • 18:09 WITA
  • News
Wagub Cok Ace Ngajiang Becik Indonesia Heart Bike 2022

DENPASAR,Balitopnews.com - Kacihnayang antuk pengibaran bendera Start, Wakil Gubernur Bali, Tjok. Oka Sukawati mungkah Indonesia Heart Bike Bali 2022, rahina Redite Paing, Ugu tanggal 18 September 2022 magenah ring Civic Centre Renon Denpasar.

Indonesia Heart Bike kalaksanayang sajeroning makelingin World Heart Day sane kapakelingin ring tanggal 29 September 2022. Parikrama sane kapikamkam olih Yayasan Jantung Indonesia (YPI) puniki kalaksanayang antuk online miwah offline.

Parikrama bersepeda offline kalaksanayang ring kutus kota minakadi: Medan, Jakarta, Bandung, Malang, Denpasar, Semarang, Surabaya miwah Makasar. Parikrama online minakadi dudonan parikrama daring YPI sane sampun kalaksanayang saking tanggal 2 September kantos 3 Oktober 2022 sane jagi rauh.

Ketua Yayasan Jantung Indonesia Bali, dr. I Ketut Rina nlatarayang yening krama Bali dahat ageng kedehnyane sajeroning ngamiletin Indonesia Heart Bike 2022. “Akeh pamilet 300 kantos 400 diri saking kramane,". Dane taler ngawewehin yening ring salanturnyane satunggil denyut jantung pamilet Indonesia Heart Bike jagi kakonversi dados rupiah mangda kaanggen  prabea operasi anak-anak antuk Penyakit Jantung Bawaan (JPB) saking keluarga pra-sejahtera.

Antuk tagline ‘Siapkan Dirimu, Siapkan Sepedamu dan Donasikan Denyut Jantungmu’, parikrama Indonesia Heart Bike kaaptiang nyokong kramane mangda maparilaksana sehat melarapan nganggen sepeda.

Wakil Gubernur Bali, Cok Ace dahat ngajiang parikrama puniki sane kapikamkam olih YPI puniki. Dane nureksain yening puniki nenten pinaka parikrama sajeroning nyaga kesehatan kewanten, nanging taler pinaka genah sajeroning nincapang karumaketan, genah mapupul nukar pengalaman. (Rls/Btnc)


TAGS :

Komentar