Gubernur Koster Ngiringang Menteri Energi, Iklim dan Lingkungan Inggris miwah Menteri LHK RI Tanam Mangrove ring Simbar Segara
- 23 Oktober 2022
- 23:10 WITA
- News
DENPASAR,Balitopnews.com - Gubernur Bali Wayan Koster, ngiring pangrauh Menteri Negara majeng Asia, Energi, Iklim dan Lingkungan Inggris Lord Goldsmith kasarengin Menteri Lingkungan Hidup dan Kehutanan RI Siti Nurbaya Bakar ka Obyek Wisata Mangrove Kelompok Usaha Bersama (KUB) Simbar Segara, Suwung Kauh, Desa Pemogan, Denpasar Selatan ring rahina Redite Paing Sinta (23 Oktober 2022)
Pangrauh rombongan, tiosan nyelehin genah pelestarian mangrove taler ngamolihang galah nandur bibit mangrove kasarengin dasaan sisia SMAK Soverdi Tuban. Gubernur Koster, kasarengin Menteri Goldsmith miwah Menteri LHK RI Siti Nurbaya, tedun langsung ring genah pembibitan sajeroning nandur bibit mangrove.
Ring galahe punika, Menteri Goldsmith sane rauh ring kunjungan resmi kapertama ka Indonesia maosang anggannyane ngajiang becik kawijakan sane kalaksanayang Pemerintah Indonesia miwah provinsi Bali, sajeroning nyaga kalestarian mangrove. “Napi sane kalaksanayang dahat kaajiang becik, saha dahat bagia nyarengin nandur mangrove kasarengin Ibu Menteri miwah Bapak Gubernur Bali,” baos Goldsmith.
Gubernur Bali Wayan Koster ring galahe punika nuekang yening Provinsi Bali ring kapamucukannyane setata mautsaha nyimbarang genah nandur mangrove ring makudang-kudang wewidangan sakadi ring Denpasar, Badung, Klungkung, Buleleng miwah Jembrana. “Titiang taler nganikain Kepala Dinas Lingkungan Hidup dan Kehutanan Provinsi Bali (mangda nyimbarang wewidangan genah nandur mangrove, red), sane kasokong taler olih Menteri Lingkungan Hidup dan Kehutanan RI miwah makudang-kudang krama sane urati ring kawentenan mangrove,” baosnyane.
Gubernur saking Sembiran, Kabupaten Buleleng puniki, taler nangiang pangupaya sajeroning nandur alas mangrove, Pengaturan tata ruang wilayah pesisir, Penegakan hukum majeng pamurug widang kehutanan miwah pembersihan wiadin pembebasan mangrove saking kawentenan luu plastik sane mialangin kawentenan mangrove.
Pangupaya nglestariang kawasan mangrove manut Gubernur Koster taler adung sareng Peraturan Gubernur Bali Nomor 24 Warsa 2020 indik Pelindungan Sungai, Mata Air, Danau miwah Laut. “Titiang ring Bali kawiaktiannyane madue kearifan lokal minakadi pakeling Tumpek Wariga, minakadi nginggilang kawentenan tetanduran wadin kalestarian palemahan Bali. Ring widang teknis taler sampun kanikain Kepala Dinas Kehutanan dan Lingkungan Hidup Provinsi Bali mangda makarya roadmap rencana reboisasi ring makudang-kudang alas sane wenten ring Bali. Targetnyane pinih alit mangda kawasan hijau 30%, prasida kadagingin,” baosnyane.
Kawijakan punika kasokong antuk Perjanjian Kerja Sama pantaraning Kementerian Pekerjaan Umum dan Perumahan Rakyat (PUPR) melarapan Ditjen Cipta Karya dan Ditjen Bina Marga wiadin Pemerintah Provinsi Bali sajeroning nyokong Penguatan Fungsi Kawasan Tahura Ngurah Rai melarapan pewangunan Infrastruktur miwah sarana marupa Wisata Alam mapaiketan ring pamargin KTT G20 ring Bali, sane kalinggatanganin medio Agustus sane sampun lintang.
Tiosan punika, Direktur Konservasi Tanah dan Air Kementerian LHK RI, Muhammad Zainal Arifin nlatarang majeng rombongan yening pelestarian mangrove pinaka pahan saking kebijakan prioritas Pemerintah Indonesia antuk kapamucukan Presiden Joko Widodo. Presiden madue target rehabilitasi hutan mangrove ring tanah air prasida kantos tigang atak tali hektare ring tigang warsa sane jagi rauh. “ Indonesia madue hutan mangrove pinih jimbar ring jagate, minakadi 3,36 yuta hektar. Rumasuk ring wewidangan Tahura Ngurah Rai, Bali minakadi 1.300 hektar mangrove antuk ekosistem sane eksotis,” baos Zainal.
Mapaiketan sareng pamargin G20, Zainal taler nlatarang yening sane mangkin Bali sampun nglaksanayang rehabilitasi kawasan Mangrove Conservation Forest, sane karencanayang jagi manados silih tunggil genah tetujon kepala negara sane rauh ring KTT G20. Kawasan puniki pinaka bukti kasumekenan Indonesia sajeroning nees gatra utawi isu perubahan iklim. “Kawasan puniki pinaka kapertama miwah wenten asiki, kawasan hutan wiadin persemaian mangrove modern ring jagate,” baosnyane.
Pangerauh Lord Goldsmith saha angga ka Indonesia miwah Bali, sajeroning mligbagang indik kerja sama bilateral pantaraning Inggris sareng Indonesia indik iklim miwah lingkungan, pamekas widang kehutanan wiadin penggunaan lahan berkelanjutan (FOLU).
Makakalih panegara cumpu ngalinggatanganin kerja sama ring widang lingkungan miwah iklim, Indonesia's FOLU Net Sink 2030 sane kaunggahang ring MoU sane kalinggatanganin olih Menteri LHK dan Menteri Negara majeng Asia, Energi, Iklim, miwah Lingkungan Hidup Inggris. Melarapan MoU puniki, makakalih angga matetujon ngwangun prakanti mangda sayan becik, pinaka aksi iklim sane sayuwakti mabukti. "Indonesia madue amongan ageng sajeroning mastkyang yening samian kasumekenan sane kapikukuhang ring parikrama G20 prasida kadagingin, rumasuk transisi energi, saantukan samian majanten mautsaha nees pawesana sangkaning perubahan iklim saha mapangapti mangda target suhu Perjanjian Paris prasida kadagingin," baosnyane.
Parikrama punika taler karauhin olih Duta Besar Inggris majeng Indonesia, Owen Jenkins, miwah Kepala Dinas Lingkungan Hidup dan Kehutanan Provinsi Bali, I Made Teja. (Rls/Btnc)
Komentar