Gubernur Bali Nyaggra Becik Pangrauh Relawan Kemanusiaan sajeroning Ngarepin Bancana
- 05 Desember 2022
- 21:12 WITA
- News
DENPASAR, Balitopnews.com - Pangupaya ngirangin risiko bencana muatang kasumekenan sane ageng saking samian angga, minakadi pemerintah, krama/komunitas, dunia usaha, akademisi, media massa utawi sane ketah kabaosang unsur pentahelix bencana. Pangrauh relawan pinaka perwakilan saking unsur krama/komunitas pinaka sumber daya sepisanan aset sane kaduwenang bangsa saantukan pinaka silih tunggil garda terdepan sajeroning ngicen layanan majeng krama sane keni bancana. Sakadi punika sambrama wacana saking Gubernur Bali Wayan Koster sane kawacen olih Kepala Pelaksana BPBD Provinsi Bali I Made Rentin ri kala mungkah Festival Nasional Relawan Kesehatan dan Public Safety Center 119 ring Harris Hotel & Convention, Denpasar, Soma (5 Desember 2022)
“Karumaketan pantaraning Pemerintah sareng relawan sampun kawangun saking dumun utaminipun sajeroning ngarepin tanggap darurat bencana utawi krisis kesehatan. Titiang ngaptiang, sinergitas puniki prasida rumaket melarapan antuk parikrama nyata, sajeroning nyujur ketangguhan bencana,” baos Rentin ngwacen sambrama wacana saking Gubernur.
Dane ngawewehin, sajeroning ngarepin risiko bencana sane wenten, relawan kesehatan kabuatang ring satunggil paletan siklus manajemen bencana saantukan kompetensinyane sane nenten prasida kagentosin olih profesional tiosan.
“Sangkaning punika Titiang nyanggra becik kawentenan komunitas Relawan Kesehatan sakadi KREKI saantukan madue komitmen sane anut sareng Visi Pemerintah Provinsi Bali minakadi Nangun Sat Kerthi Loka Bali melarapan Pembangunan Semesta Berencana Menuju Bali Era Baru. Ring Visi puniki kaunggahang indik nilai sane dahat mabuat, nyujur krama bali sane sehat miwah aman saking gageem bancana,” baosnyane.
Nepet ring Hari Relawan Internasional puniki, Dane ngaturang suksma majeng samian relawan kemanusiaan ring samian wewidangan Indonesia sane sampun antuk kalascaryan nyarengin ngaremba ngarepin kawentenan bancana. Dane ngaptiang, para relawan prasida dados pelopor penanggulangan bencana sane tangguh ring suang-suang wewidangan miwah setata nincapang kawagedannyane miwah antuk setata nginggilang Panca Darma Relawan Penanggulangan Bencana minakadi Mandiri, Profesional, Solidaritas, Sinergi miwah Akuntabel.
Parikrama Festival Nasional Relawan Kesehatan miwah Public Safety Center 119 ngunggahang unteng “Tingkatkan Solidaritas Melalui Kerelawanan” sane karamianin antuk Kompetisi Poster (Penanganan Emergency Pra Hospital Inovasi wiadin Penanganan), Kompetisi CPR (Tatalaksana RJP – perorangan) miwah Deklarasi komitmen sajeroning maingkupan ring tenaga cadangan kesehatan. (Rls/Btnc)
Komentar