Wagub Cok Ace ngrauhin Pencanangan Reformasi Birokrasi Tematik ring Istana Wapres

  • 05 Desember 2022
  • 15:12 WITA
  • News
Wagub Cok Ace ngrauhin Pencanangan Reformasi Birokrasi Tematik ring Istana Wapres

JAKARTA, Balitopnews.com - Wakil Gubernur Bali Prof. Tjokorda Oka Artha Ardhana Sukawati ngrauhin parikrama Pencanangan Reformasi Birokrasi Tematik sane karuntutin antuk Peresmian Mal Pelayanan Publik sane kalaksanayang ring Istana Wakil Presiden RI Jalan Medan Merdeka Selatan No. 6, Jakarta Pusat, Soma (5/12/2022). Ring galahe punika, pamilet sane rauh taler ngamolihang pengarahan saking Wakil Presiden RI K.H. Ma’ruf Amin.

Wapres Ma’ruf Amin sajeroning arahannyane nuekang indik mabuatnyane kawentenan  Mal Pelayanan Publik (MPP) sane ring galahe mangkin akehnyane 103, wenten ring kabupaten/kota. Manutnyane, kawentenan MPP nyihnayang kasumekenan samian angga sajeroning nincapang kualitas pelayanan masyarakat. “Kawentenan 103 MPP puniki, tiosan nyihnayang pamikolih nagingin target warsa 2022, nanging taler dados cihna kolaborasi antar sektor nyujur integrasi penyelenggaraan pelayanan publik berkualitas majeng kramane,” baosnyane.
Wapres Ma’ruf Amin nlatarang limang parindikan ring arahannyane majeng lembaga sane mapaiketan sajeroning nglimbakang MPP, kawentenan kualitas layanan publik mangda sayan kabecikang. Kapertama, Kementerian PANRB kaaptiang digelis makarya rumusan wiadin terobosan MPP sane sayan dinamis melarapan platform digital. Kaping kalih, Wapres ngaptiang Kementerian Investasi maripurnayang Sistem Perizinan Berusaha Terintegrasi Secara Elektronik (OSS). Wapres taler nuekang indik mabuatnyane pemberian tambahan anggaran majeng daerah antuk kapasitas fiskal sane rendah. “Bappenas miwah Kementerian Keuangan mangda nyokong anggaran sajeroning nincapang kualitas pelayanan publik majeng Pemerintah Daerah, pamekas wewidangan antuk kapasitas fiskal sane rendah,” baos Wapres.
Wapres taler maosang, para manggala ring daerah kaaptiang mangda prasida nglaksanayang integrasi makudang-kudang layanan Organisasi Perangkat Daerah (OPD) dados asiki ring MPP sane sampun kawangun. “Para Gubernur, Bupati miwah Sekda madue kasumekenan sajeroning ngintegrasiang makudang-kudang layanan OPD ring siki penyelenggaraan MPP,” baos Wapres. Ring pamuput arahannyane, Dane ngaptiang mangda Menteri Pendayagunaan Aparatur Negara dan Reformasi Birokrasi (PANRB) wiadin Menteri Dalam Negeri kasarengin Sekretaris Eksekutif KPRBN  muputang Desain MPP Digital mawinan prasida kaadopsi ring makudang-kudang daerah. “Risampune ujicoba ring makudang wewidangan sane kapilih, pangaptine mangda digelis katulad ring wewidangan tiosan, mawinan target capaian MPP ring samian kabupaten/kota warsa 2024 kapastikayang prasida kadagingin,” baosnyane.
Mapaiketan sareng Program RB Tematik, Wapres nlatarang yening program puniki patut kasokong sajeroning ngukuhang kawentenan birokrasi nyokong agenda prioritas nasional. “Kementerian PANRB kasarengin Kementerian miwah Lembaga tiosan,  rauhing ring samian Pemerintah Daerah, kapatutang mangda nyokong pamargin komitmen RB Tematik,” baosnyane.
Sadurungnyane, Menteri PANRB Abdullah Azwar Anas nlatarang yening pencanangan Program RB Tematik pinaka pangupaya ngardi birokrasi sane prasida nyawis isu strategis ring tengahing krama, minakadi isu kemiskinan, kemudahan investasi, digitalisasi pemerintahan, wiadin prioritas aktual Presiden. “RB ring galahe mangkin ketahnyane uleng sajeroning midabdabin kawentenan sistem wiadin manajemen internal sajeorning muputang pikobet birokrasi. Ring salanturnyane jagi kawewehin antuk uleng majeng isu-isu program pemerintah utawi problem hilir,” baosnyane.(Rls/Btnc) 


TAGS :

Komentar