Nglanturang Arahan Gubernur Koster, Pemprov Bali Nyiagayang Mekanisme Gas LPG 3 Kg Murah ring Tengahing Krama
- 24 Januari 2023
- 11:01 WITA
- News
DENPASAR, Balitopnews.com - Nglanturang arahan Gubernur Bali, Wayan Koster mapaiketan sareng kawentenan Disparitas pangarga Gas LPG 3 Kg pinaka pawesana saking Peraturan Gubernur Bali No. 63 Warsa 2022 indik Perubahan Ketiga atas peraturan Gubernur Bali No. 48 Warsa 2014 indik Harga Ecer Tertinggi (HET) Liquefied Petroleum Gas (LPG) Tabung 3 Kilogram, Pemerintah Provinsi Bali kasarengin Hiswana Migas Bali nglaksanayang rapat koordinasi sane kapucukin olih Sekretaris Daerah Provinsi Bali, Dewa Made Indra (24 Januari 2023) ring Ruang Rapat Sekda, Kantor Gubernur Bali.
Sadurungnyane, akeh wenten gatra yening LPG 3 Kg jagi nincap kantos 25 tali ring pengecer. Nanging parindikan puniki katampenin olih Kepala Dinas Ketenagakerjaan dan ESDM Provinsi Bali, I.B. Setiawan. Dane maosang yening manut Peraturan Gubernur ring panguntat sampun kapikukuhang yening HET LPG 3 Kg ring tingkat pangkalan wantah plekutus tali. “Yening ring pangkalan sampun kapikukuhang plekutus tali majanten ring pengecer wenten panincap kalih tali punika kantun masuk akal,” baos Setiawan. Dane taler maosang yening Pemerintah Provinsi Bali ngaptiang wenten stabilitas pangarga Gas LPG 3 Kg mangda nenten banget nincap, saha harga eceran ring kramane nenten langkungan ring kalih dasa tali rupiah.
Ketua Himpunan Wiraswasta Nasional Minyak dan Gas (Hiswana Migas) Provinsi Bali, Dewa Ananta ngaptiang kramane mangda numbas gas LPG 3 Kg langsung ring pangkalan utawi ring SPBU pinih nampek. Dane mastikayang yening nenten wenten permainan harga ring pangkalan, kapastikayang anut sareng HET sane sampun katentuang. “ Yening wenten pangkalan kantos ngadol langkungan ring plekutus tali majanten jagi katiwakang pamidanda saantukan sampun wenten panyayub hukumnyane,”Baosnyane. Penyesuaian HET LPG 3 Kg manutnyane nenten lempas saking beban biaya operasional distribusi tabung Gas LPG 3 Kg sane katureksain muatang penyesuaian.
Sekretaris Daerah Provinsi Bali, Dewa Made Indra ngaptiang mangda kalaksanayang monitoring wiadin pembinaan, minakadi ring tingkat pangkalan kantos ring pengecer. “Yening wenten pamurug jagi kakeniang surat peringatan saha yening wenten pamurug jagi kalaksanayang tindakan hukum,” baos Dewa Made Indra ngicen arahan majeng Ka Satpol PP Bali. Dane taler ngaptiang mangda kawentenan pangkalan Gas LPG 3 Kg kasobiahang ring samian kramane. “Yening kabuatang mangda kakaryanang surat majeng Bupati/Walikota mangda kalanturang ring Camat miwah Kepala Desa indik kawentenan pangkalan puniki. Sakadi ngicen edukasi ring kramane, yening wenten pangkalan, saha numbas ring pangkalan sane wenten,” baos Made Indra.
Tiosan punika, Pemerintah Provinsi Bali kasarengin Hiswana Migas Bali jagi nglaksanayang inventarisasi sebaran pangkalan Gas LPG 3 Kg mawinan prasida kauningin olih samian kramane. Pangaptine mangda kauningin indik kawentenan pangkalan Gas LPG 3 Kg, saha ngamolihang pangarga sane murah, minakadi plekutus tali rupiah manut Pergub sane kamedalang.(Rls/Btnc)
Komentar