Nyokong Panincap Wisman China, Wagub Cok Ace Ngusulang Penambahan ‘Direct Flight’
- 24 Januari 2023
- 21:01 WITA
- News
DENPASAR, Balitopnews.com - Ngarepin mawalinyane pangrauh wisatawan saking Tiongkok ka Bali, Wakil Gubernur Bali Prof. Tjokorda Oka Artha Ardhana Sukawati (Cok Ace) ngaptiang mangda akeh penerbangan langsung (direct flight) saking Negeri Tirai Bambu kawewehin. Penambahan direct flight kaaptiang ngingkupin makudang kota ring China pinaka titik keberangkatan miwah maskapai sane ngicen pelayanan penerbangan langsung ke Bali. Pangapti punika kauningayang majeng Menteri Pariwisata dan Ekonomi Kreatif RI Sandiaga Salahuddin Uno melarapan acara ‘The Weekly Brief with Sandi Uno’ sane kalaksanayang virtual, rahina Anggara (24 Januari 2023).
Wagub Cok Ace sane ngamiletin acara saking Ruang Kerja ring Kantor Wakil Gubernur Bali ngaptiang mangda direct flight kawewehin. “Titiang banget ngaptiang mangda direct flight saking 20 kota ring China antuk 15 maskapai prasida kawaliang sakadi kahanan normal sakadi daweg sadurung pandemi,” pangaptinnyane. Parindikan puniki mabuat, saantukan Tiongkok pinaka negara potensial pemasok wisman ka Bali.
Ring galahe punika, Wagub Cok Ace sane taler pinaka Ketua BPD PHRI Bali nguningayang apresiasi saha suksma majeng jajaran Kemenparekraf antuk pidabdab sane kalaksanayang mawinan wisman Tiongkok prasida mawali rauh ka Pulo Dewata. Dane sane taler nyarengin Gubernur Wayan Koster ring prosesi penyambutan ring Bandara Ngurah Rai 22 Januari 2023 sane sampun lintang, ngrasayang agengnyane kedeh rombongan wisman China sane nganggen pesawat charter saking Kota Shenzhen. “Titiang nyaksiang parindikan sane matiosan yening saihang daweg nglepas wisman China daweg tanggal 5 Pebruari 2020 sane nyihnayang penutupan akses masuk saantukan pandemi dawege punika,” baosnyane. Dawege punika, baos Cok Ace, wisman China sane kalepas dahat kalangen saha nenten uning malih pidan jagi mawali rauh ka Bali. Salanturnyane ring pangrauh kapertama sesampune pandemi, wisman China kajantenang antuk pikedeh ageng rauh ka Bali.
Guru Besar ISI Denpasar maosang, wenten makudang parindikan sane ngawinang agengnyane kapitresnan krama China majeng Bali. Dane nlatarang, Bali miwah China madue kedekatan historis. Parindikan puniki kacihnayang saking akehnyane peninggalan pinaka bukti sejarah akulturasi budaya Bali-Tiongkok saking panyiuan warsa sane sampun lintang. “Sangkaning punika, rumasa seneng pisan rauh ka Bali,” baosnyane. Tiosan punika, kawentenan palemahan Bali taler ngawinang wisman China milih Bali pinaka objek wisata. “Panegara China jimbar pisan, mawinan yening mapikayun nyantenang pasisi segara, doh pisan. Punika taler sane ngawinang wisman China seneng rauh ka Bali,” pawewehnyane.
Menparekraf Sandiaga Uno maosang yening pangrauh perdana wisman China kaunggahang pinaka unteng utama sajeroning parikrama sane nyarengang wartawan wiadin stakeholder pariwisata. Pangapti Wagub Cok Ace mapaiketan ring penambahan direct flight sane ngingkupin akeh kota wiadin penerbangan jagi dados uratian saking Kemenparekraf. Sane mangkin, anggannyane kantun midabdabin tiga kota potensial sane dados kantong wisman China minakadi Beijing, Shanghai miwah Guangzhou. Mapaiketan ring akeh penerbangan, Kemenparekraf taler nglaksanayang pendekatan sareng maskapai ring Indonesia miwah China. Sandiana Uno ngawewehin, wisman China patut kapidabdabin becik saantukan pinaka silih tunggil pasar potensial pendongkrak wisman ring Indonesia. Ring undagan nasional, warsane puniki anggannyane madue target 255.300 wisman China. “Tiosan Bali pinaka pintu utama, wisman saking China taler kaaptiang rauh ring genah tiosan ring Indonesia sakadi Manado,” pangaptinnyane.
Ring galahe punika, Sandiaga Uno nguningayang yening Bali wenten ring peringkat kalih ngaonang London miwah Paris versi travelers choice award for destination. “Nincap kalih peringkat, saantukan ring awarsa sadurungnyane Bali wenten ring undagan kaping pat. Warsane puniki Bali wenten ring peringkat kalih, peringkat kapertama kapolihang Dubai,” baosnyane. Capaian puniki majanten ngawinang bangga, saantukan sane dados indikator penilaian wantah ring kualitas saha kuantitas ulasan periode bulan November 2021 kantos November 2022.(Rls/Btnc)
Komentar