Ketua TP PKK Provinsi Bali Ny. Putri Koster Sosialisasi indik Penanggulangan Rabies Berbasis Keluarga ring Kabupaten Buleleng.
- 24 Januari 2023
- 10:01 WITA
- News
SINGARAJA,Balitopnews.com - Kantun agengnyane kasus rabies ring makudang Kabupaten ring Bali saha kantun kirangnyane rasa eling krama sajeroning nglaksanayang vaksinasi rabies majeng ingon-ingonnyane pamekas majeng asu, bojog, sampi wiadin meong, saha nenten eling ring agengnyane baya rabies sane prasida ngawetuang baya yening kasepan katambanin. Sangkaning punika, ngawinang Ketua TP PKK Provinsi Bali Ny. Putri Koster nglaksanayang sosialisasi Penanggulangan Rabies Berbasis Keluarga ring Kabupaten Buleleng. Antuk ngrauhang tigang diri narawakya minakadi Penjabat Bupati Buleleng Ketut Lihadnyana, Kepala Dinas Kesehatan Provinsi Bali Nyoman Gede Anom miwah Kepala Dinas Pertanian dan Ketahanan Pangan Provinsi Bali I Wayan Sunada, nglaksanayang sosialisasi ring RRI Singaraja miwah Radio Semeton Takdir, Seririt, Buleleng, Anggara (24 Januari 2023)
Ring pangawit arahannyane, Ny. Putri Koster maosang yening pinyungkan rabies sane kaawinang olih ingon-ingon utawi wewalungan sakadi asu wiadin meong, sampunang katureksain sepele saantukan yening kasepan majanten prasida ngawetuang baya. Kantun kirangnyane sosialisasi ring tengahing krama, minakadi mapaiketan sareng pangupaya nees pinyungkan rabies wiadin napi sane patut kalaksanayang yening kantos cegut asu, ngawinang kawentenan kasus meninggal sangkaning rabies nincap,napi malih tigang kabupaten minakadi Buleleng, Jembrana miwah Karangasem ngranjing ring Zona Merah .
Sangkaning punika, anak istri sane ketah kabaosnag Bunda Putri puniki ngaptiang mangda Kader PKK saking undagan Provinsi kantos dasa wisma mangda nyarengin nglaksanayang sosialisasi ring tengahing krama mapaiketan sareng mabuatnyane vaksin rabies yening ring kulawarga madue ingon-ingon, saha ngwantu krama yening wenten ring wewidangannyane cegut asu utawi meong, mangda kairingang ka pusat kesehatan saha ngamolihang vaksin anti rabies .
Bunda Putri taler ngaptiang mangda kader PKK tedun nyemput bola, tedun langsung ngruruh kulawarga sane madue ingon-ingon mastikayang kavaksin saha nenten nglepas ingon-ingonnyane. Antuk ngwangun kanti sareng makudang angga, kader PKK taler kaaptiang mangda nglaksanayang edukasi mapaiketan sareng baya rabies saantukan prasida dados baya ageng yening nenten kapidabdabin becik.
Parindikan sane pateh taler kabaosang olih Pj. Bupati Buleleng yening pangupaya nambakin rabies kalaksanayang antuk sinergitas saha nyarengang samian angga. Tiosan punika panyarengan krama dahat mabuat sajeroning nees kasus rabies. Tiosan punika, desa adat taler prasida makarya geguat utawi pararem sane midabdabin kramane sane madue ingon-ingon, pamekas ingon-ingon sane kalepas. Melarapan sinergitas pemerintah, krama, wiadin desa adat, anggannyane optimis kasus rabies ring Bali prasida katambakin. Penjabat Bupati Lihadnyana taler ngawewehin yening ring galahe mangkin ring Kabupaten Buleleng sawetara 90,80% ingon-ingon kramane sampun kavaksin. Melarapan antuk punika, Kabupaten Buleleng jagi lepas saking zona merah rabies saha prasida nyujur kabupaten bebas rabies.
Kepala Dinas Pertanian dan Ketahanan Pangan Provinsi Bali maosang yening pinyungkan rabies utawi sane ketah kabaosang pinyungkan anjing gila nglahlah olih binatang berdarah panas sakadai asu, meong, wiadin bojog. Pinyungkan puniki nglahlah ring manusane saha yening nenten kapidabdabin becik prasida ngawetuang baya. Sangkaning punika, pangupaya nambakin rabies, minakadi melarapan gebyar vaksinasi rabies ring asu sane kapiara wiadin ring asu liar. Tiosan punika, pemerintah taler makarya tim siaga rabies ring desa desa mangda vaksin digelis kalaksanayang, saha kramane kauningayang mangda nenten nglepas ingon-ingonnyane saha digelis mapriksa ring fasilitas kesehatan yening cegut asu utawi ingon-ingon tiosan, mangda digelis ngamolihang suntikan vaksin anti rabies.
Parindikan sane pateh taler kabaosang Kepala Dinas Kesehatan Provinsi Bali yening pinyungkan rabies prasida nglahlah, nenten sangkaning cegutan keras manten, cegutan sane akidik wiadin kanin sane kajilat antuk asu prasida nularin virus. Sangkaning punika, punika dahat mabuat yening miara ingon-ingon mangda nglaksanayang vaksinasi saha mangda nenten kalepas. Kadiskes taler nlatarang yening wenten sane kanin sangkaning cegut asu, mangda digelis kabersihin antuk toya mengalir saha sabun utawi detergen, raris katambanin antuk betadine utawi alkohol saha digelis rauh ka fasilitas kesehatan mangda ngamolihang suntikan virus anti rabies.(Rls/Btnc)
Komentar