Nyokong Gotong Royong Sad Kerthi, KBS Kuta Selatan Nglaksanayang Penanaman Pohon ring Tahura Ngurah Rai
- 28 Januari 2023
- 23:01 WITA
- Village
BADUNG, Balitopnews.com – Pinaka panglantur saking arahan Gubernur Bali Wayan Koster indik Program Kerja Pembangunan 2023 miwah Gotong Royong Sad Kerthi, Desa Kerthi Bali Sejahtera (KBS), Kuta Selatan taler nglaksanayang Penanaman/Pemulihan Kawasan Hutan Tahura Ngurah Rai, Benoa, Kuta Selatan, Badung, ring rahina Saniscara (28/1/2023).
Koordinator KBS Kuta Selatan sane sepisanan pinaka Asisten Pemerintahan dan Kesejahteraan Rakyat I Gde Indra Dewa Putra maosang, tiosan pinaka panglantur saking instruksi Gubernur indik program kerja warsa 2023, parikrama puniki taler matetujon ngicen pangweruhan ring kramane indik Pergub Nomor 29 Warsa 2020 indik Pelestarian Tanaman Lokal Bali pinaka Taman Gumi Banten, Puspa Dewata, Usada, wiadin Penghijauan. “Mawinan Titiang nyarengang kramane, pamekas ring lingkungan KBS mangda sareng-sareng nglestariang palemahan wiadin tanaman khas Bali manut ring visi Provinsi Bali Nangun Sat Kerthi Loka Bali,” baosnyane.
Dane taler nlataranang, yening ring salantur ipun parikrama sakadi puniki kaaptiang prasida kalanturang. Wiwilanipun saantukan program Pemprov Bali sane kapucukin Gubernur Wayan Koster sayuwakti uleng sajeroning nyayubin saha nglestariang palemahan Bali miwah sadaginyane. “Dadosne puniki pinaka silih tunggil pamargin program bapak Gubernur sajeroning nyayubin jagat Bali miwah sadagingnyane,” maka atur pamuputnyane.
Parikrama sane kalaksanayang rahina semeng punika taler karauhin olih Kepala UPTD Taman Hutan Raya Ngurah Rai I Ketut Subandi, Lurah Benoa, Kuta Selatan I Wayan Karang Subawa, Managing Director The Nusa Dua Indonesia Tourism Development Corporation, Sahabat Mangrove Ranger Indonesia miwah anggota Desa KBS Kuta Selatan.(Rls/Btnc)
Komentar