Dispar Bali Nyarengang Samian Industri Pariwisata, Nyarengin Sajeroning Program Kontribusi Wisatawan
- 03 Februari 2023
- 18:02 WITA
- News
DENPASAR,Balitopnews.com - Sajeroning nyaga kalestarian Budaya Bali wiadin kalestarian palemahan Bali, Pemerintah provinsi Bali ngaptiang samian angga nyarengin ngremba. Modal Utama Pariwisata Bali wantah palemahan ipun mategepan antuk budaya sane mautama, mawinan pariwisata Bali banget ngandelang kalestarian palemahan wiadin budaya Bali.
Parindikan punika kabaosang Kepala Dinas Pariwisata Provinsi Bali. Tjok Bagus Pemayun, ri kala nyobyahang indik program Kontribusi wisatawan majeng pelaku industri ring kantor pariwisata Dinas Pariwisata (Dispar) Provinsi Bali, Sukra (3 Februari 2023).“Tetujon mupulang para pelaku industri pariwisata puniki wantah sajeroning nyokong program kontribusi wisatawan pamekas wisatawan mancanegara mangda sayan gelis, gumantinnyane mapaiketan sareng Perda No 1 warsa 2020 indik Kontribusi Wisatawan, miwah Pergub No 27 warsa 2020, baosnyane.
Kawijakan puniki kalaksanayang saantukan pinaka destinasi wisata, perekonomian Bali wantah ngandelang pariwisata. Nenten madue sumber daya alam minyak bumi wiadin gas sakadi provinsi sane tiosan . Pemerintah Provinsi taler durung ngamolihang signifikan pendapatan saking jasa pariwisata. APBD Bali wantah ngandelang pajak kendaraan bermotor.
Tjok Bagus taler maosang yening, kawijakan Gubernur Bali puniki pinaka cihna uratian majeng pariwisata Bali sane madue tagline ‘pariwisata budaya’ sane berkualitas saha bermartabat .
Sangkaning punika, Dane maosang wisatawan asing sane rauh wiadin masesanjan ring Bali kaaptiang nyarengin ngremba, pinaka cihna uratian majeng palemahan, wiadin budaya Bali, mangda kawentenane rajeg.
“Puniki sifatnyane sukarela, nenten wenten pemaksaan. Wisatawan ngaremba langsung melarapan antuk scan barcode aplikasi We Love Bali sane sampun kasediayang ring hotel-hotel, mobil transport, daya tarik wisata, restoran miwah sane tiosan, sane wenten ring sajebag Bali, saha salanturnyane prasida transfer nominal sane kasumbangang,” baosnyane.
Tiosan punika, kawijakan kontribusi pariwisata puniki sampun kamedalang daweg 29 Juli 2022, saha kawijakan puniki nenten memberatkan pelaku wiadin industri pariwisata. Para pelaku wiadin industri pariwisata puniki wantah nyokong saha ngiringang para wisatawan mangda nyarengin ngaremba sajeroning nyaga palemahan, budaya Bali mangda prasida nincap dados destinasi.
“Titiang nureksain, kontribusi wisatawan puniki 5 persen saking target sane agengnyane 4,5 yuta wisatawan asing ka Bali, minakadi jagi prasida nyumbang Rp 31,5 miliar PAD Bali ring warsa 2023 puniki. Puniki wantah asumsi sinambi jagi nglaksanayang evaluasi satunggil wuku, rumasuk payment gateway,” baosnyane.
Ketua Tim Percepatan Kontribusi Pariwisata, I Gusti Agung Rai Suryawijaya nlatarang, anggannyane sampun nglaksanayang testimoni majeng makudang wisatawan. Dane maosang, wisatawan nyanggra becik. “Wisatawan antuk kedeh ageng ngwantu selami kontribusi punika kawigunayang antuk transparan,” baos Agung Rai sane taler pinaka Ketua PHRI Badung ini.
Gung Rai maosang yening, Gubernur Koster sajeroning ngwangun Bali kadasarin visi Nangun Sat Kerthi Loka Bali, nitenin antuk fundamental sajeroning ngardi pariwisata sane madue kualitas saha mawiguna. Sangkaning punika, kabuatang kesadaran kolektif sajeroning nyaga pariwisata budaya sane kaduenang Bali.
“Ring pat warsa kapamucukan Bapak Gubernur Koster, ekosistem pariwisata dahat kauratiang melarapan antuk ngwangun infrastruktur terkoneksi minakadi ring darat, laut, miwah udara. Napi malih, ngwangun objek wisata, sakadi Turyapada Tower, Pusat Kebudayaan Bali, penataan kawasan Besakih, kantos rencana ngwangun paramount ring Jembrana. Puniki wantah utsaha sane mabukti saking Gubernur Koster sajeroning ngardi Bali the Best Destination in the World,” baosnyane.
Panyokong taler kauningayang olih Ketua Indonesia Hotel Manager Association (IHGMA) Bali, Yoga Iswara. Kontribusi puniki kahanane sukarela majeng wisatawan emosi kepedulian sajeroning nyaga alam, budaya, wiadin palemahan Bali manda berkelanjutan.
“Puniki nenten amongan saking krama wiadin pemerintah Bali, nanging samian angga, rumasuk wisatawan. Kahannyane sane sukarela puniki sajeroning nyarengang wisatawan sane madue emosi khusus, sajerong merestorasi Bali. Puniki pinaka pidabdab sane dahating utama,” baosnyane.
Anggannyane ngicen conto makudang parindikan ring Bali sane sandang kauratiang. Mawit saking kawentenan toya bersih, luu, miwah nyaga kawentenan toyane mangda nenten kantos telas. Manutnyane, parindikan puniki muatang komitmen samian angga sajeroning nyujur Bali mangda sayan becik. “Nah puniki sane iraga sarengang melarapan antuk nyarengang wisatawan ngaremba nyaga Bali,” baosnyane.
Katakenin mapaiketan ring kawijakan puniki sane gelis kamargiang, saantukan pariwisata Bali wau pulih saking pandemi Covid-19, Yoga Iswara nuekang yening kawijakan puniki nenten maksa. Nanging kahanannyane wantah sukarela.
“Kawijakan puniki tetujone mangda wisatawan madue emosional khusus, madue keterikatan khusus sareng Bali, saha program sane kakaryanin saking kontribusi puniki kalaksanayang antuk transparan. Minakadi majeng wisatawan wiadin krama, Titiang nureksain puniki jagi prasida kamargiang. Saantukan akeh panegara tiosan nganggen sistem kadi puniki. Sakadi ring Maldive, ring Jepang, wiadin panegara tiosan. Ring Indonesia, pamekas ring Bali wau ngawitin kontribusi wisatawan antuk sukarela,” baosnyane. (Rls/Btnc)
Komentar