Nyanggra Petinggi Provinsi Hainan, Wagub Cok Ace Nyobyahang Tradisi wiadin Budaya Bali ring Ubud
- 19 Februari 2023
- 12:02 WITA
- News
GIANYAR, Balitopnews.com - Wakil Gubernur Bali Prof. Tjokorda Oka Artha Ardana Sukawati (Cok Ace) nyanggra Delegasi Provinsi Hainan sane kamanggalain olih Sekretaris Komite Provinsi Hainan Shen Xiaoming magenah ring Puri Agung Ubud, Ubud, Gianyar rahina Redite (19 February 2023).
Ring galahe punika, Wagub Cok Ace nyobyahang indik kasenian miwah kebudayaan Bali sane kantun kamargiang olih kramane ring kauripan serahina. Dane nlatarang, yening Ubud pinaka silih tunggil desa sane pinih kasenengin olih wisatawan sane rauh ka Bali. Napi malih Ubud naenin dados silih tunggil wewidangan ngranjing lima besar Desa Terbaik versi majalah Travel and Leisure New York daweg warsa 2021.
“Sangkaning punika, mawinan Titiang nguningayang kawentenan desan titiang ring Yang Mulia sepisanan sinambi nyantenang kabudayan Bali sane kantun maurip kantos mangkin ,” baos Wagub Cok Ace.
Guru Besar ISI puniki taler nlatarang yening Puri Ubud, genah para Raja Ubud dumun saha sapratisentanannyan. Dane nlatarang yadiastun gelar Raja sampun nenten kawigunayang ring Indonesia sesampune mahardika, nanging pakilitan paiketan sareng kramane kantun rumaket pisan. “Mawinan Puri Ubud taler kabaosang pinaka silih tunggil sentral kebudayaan ring Ubud. Napi malih makudang Presiden Indonesia sampun naenin rauh ka Puri Ubud sakadi Presiden Bapak Soekarno, Presiden IV Bapak Abdurrahman Wahid, Presiden V Ibu Megawati Soekarno Putri, Presiden VI Susilo Bambang Yudhoyono miwah Presiden RI galahe mangkin Joko Widodo,” pawewehnyane.
Wagub Cok Ace ngaptiang melarapan antuk sapangrauhnyane ka Ubud prasida nincapang karumaketan pantaraning Bali sareng Hainan. “Titiang ngaptiang pangrauh Yang Mulia ka Ubud prasida naler kaanggen mromosiang Bali," Baosnyane.
Parindikan sane pateh taler kabaosang olih Penglingsir Puri Ubud sane sepisanan pinaka rakan Dane Wagub Cok Ace Tjokorda Putra Sukawati. Manutnyane pakilitan pasemetonan pantaraning Bali sareng Tiongkok sampun kawangun saking dumun. Conto sane dangan kapanggihin minakadi saking wewangunan ring Puri Ubud, akeh motif ukiran sane keni pawesana olih Tiongkok. “Iriki kabaosang Patra Cina. Napi malih warna emas miwah merah sajeroning ukiran punika akeh keni pawesana saking kebudayaan Tiongkok,” baosnyane sinambi maosang kantun akeh budaya Bali sane keni iyusan Tiongkok.
Mawit kabungkahnyane Ubud majeng turis asing, manutnyane Ubud dados pusat seni wiadin budaya ring Bali. Sangkaning punika ageng pangaptine delegasi prasida nyobyahang seni wiadin budaya Bali ring Hainan. “Titiang ngaptiang ring benjang pungkur prasida kalaksanayang kolaborasi makarya parikrama budaya ring suang-suang panegara, mawinan titiang iriki dahat ledang manados host,” baosnyane.
Rasa angob majeng kasenian wiadin budaya Bali nenten surud-surud kabaosang olih Shen Xiaoming. Ring galahe punika taler nguningayang yening pangrauhnyane ka Ubud wantah mawit saking tetimbang Duta Besar China untuk Indonesia Lu Kang. “Daweg pangrauhnyane ka Jakarta makudang rahina sane sampun lintang, Dane maosang ring titiang yening mapikayun nyantenang kaluihan seni wiadin budaya Bali majanten patut rauh ka Ubud, saha ring galahe mangkin pamutuse punika majanten pinaka pamutus sane dahat becik,” baosnyane.
Napi malih, Dane nlatarang sangkaning kadautnyane ring Ubud, ngawinang galah kunjungannyane kawewehin malih. “Risampune nyantenang parikrama seni wiadin budaya iwau, Titiang nenten wenten kayun mawali saha mapikayun mangda prasida sue iriki ,” pawewehnyane.
Parindikan sane pateh taler kabaosang olih Wagub Cok Ace miwah Penglingsir Puri Ubud Tjokorda Putra Sukawati, Shen Xiaoming sane taler ngaptiang pangrauh delegasi ka Ubud prasida nyobyahang pariwisata Bali ring krama tiosan pamekas kawentenan Ubud. “Titiang majanten dahat ledang nguningayang pangrauh titiang galahe mangkin majeng krama ring Hainan saha nyarengang kramane mangda rauh ka Bali pamekas ka Ubud,” pamuputnyane.
Sadurung ngrauhin Puri Ubud, rombongan delegasi taler polih galah ngrauhin Museum Puri Lukisan Ubud sinambi nyantenang koleksi museum wiadin makarya guratan aksara lontar sane kalanturang antuk mamargi ka Puri Ubud. Ring galahe punika taler karauhin olih Konsul Jenderal Republik Rakyat Tiongkok untuk Bali Zhu Xinglong miwah Kepala Dinas Pariwisata Provinsi Bali Tjok Bagus Pemayun.
Komentar