Nyanggra Wisatawan Tiongkok Sesampun Pandemi, Wagub Cok Ace Ngaptiang Tata Pariwisata Bali
- 20 Februari 2023
- 22:02 WITA
- News
DENPASAR,Balitopnews. com - Wakil Gubernur Bali Prof. Tjok. Oka Sukawati ngamucukin pamargin Rapat Persiapan Tata Kelola Destinasi Pariwisata Provinsi Bali kasarengin OPD mapaiketan sareng angga pariwisata magenah ring Ruang Rapat Praja Sabha, Kantor Gubernur Bali, Denpasar, ring rahina Soma (20/2/2023).
Ngawitin pamargin paruman, Guru Besar saking ISI Denpasar punika nlatarang indik makudang gatra, silih tunggilnyane mapaiketan sareng pangrauh wisatawan Tiongkok ka Bali. Manutnyane, wisatawan Tiongkok ring kuantitas majanten patut kapikayunin becik saantukan setata dados silih tunggil wisatawan pinih akeh sane rauh ka Bali. “Mawinan kapatutang sayuwakti midabdabin becik samian parindikan, minakadi ring regulasi kantos panyokong tiosan, mawinan target kunjungan sane kapikukuhang olih Pemerintah Pusat miwah Daerah prasida kakardinin,” baosnyane.
Kadasarin antuk kawentenane sadurung Pandemi Covid-19, Wagub Cok Ace nglanturang gatra sane pinih mabuat mapaiketan sareng wisatawan Tiongkok daweg dumun minakadi pikobet “Jual Beli Kepala” wisatawan sane kalaksanayang olih makudang-kudang oknum agen perjalanan ring Tiongkok. Nyanggra kabungkahnyane pasar Tiongkok Warsa 2023, Dane maosang mupulang makudang pemangku kepentingan sajeroning muputang pikobet punika.
“Titiang taler miragi kawentenan makudang pakeeng, tiosan pakeeng saking krama Indonesia nanging taler saking wisatawan Tiongkok napi malih kantos saking Konjen Tiongkok ring Bali. Saantukan parindikan punika taler mawesana kaon majeng para wisatawan sane nenten prasida nyantenang Bali sane becik,” pawewehnyane.
Majeng OPD sane mapaiketan ring Pemprov Bali, Dane ngicen instruksi mangda ngamedalang tindakan tegas yening kantun wenten praktik-praktik sakadi punika ring Bali. Sane pinih mabuat, mangda tangar sapunapi pikobet punika nenten kapanggihin malih ring Bali. “Majeng stakeholder pariwisata, minakadi HPI utawi ASITA mangda ngwantu nguningayang parindikan-parindikan sane nenten kaaptiang ring lapangan. Antuk punika kolaborasi pantaraning pemerintah, sektor pariwisata miwah krama prasida digelis ngruruhang pamargi majeng pikobete puniki,” baosnyane.
Ring panguntat arahannyane, Wagub Cok Ace sane taler pinaka Guru Besar ISI Denpasar maosang yening Pemprov Bali setata mapikayun ngardi Pulo Balo pinaka genah wisata sane utama. Mawinan, manutnyane sakancan widang patut kabecikang. “Pemprov Bali nenten uleng sajeroning mecikang infrastruktur wiadin srana panyokong pariwisata, nanging taler midabdabin sistem-sistem sane nenten anut sareng nilai pariwisata Bali sane madasar antuk budaya, nganutin visi misi Provinsi Bali galahe mangkin, Nangun Sat Kerthi Loka Bali,” baosnyane.
Parikrama taler karauhin olih Kepala Dinas Pariwisata Bali Tjok Bagus Pemayun, Kepala Dinas Perindustrian dan Perdagangan Provinsi Bali I Wayan Jarta, Kepala Satuan Polisi Pamong Praja Provinsi Bali Dewa Nyoman Rai Dharmadi, miwah para pelaku pariwisata minakadi saking PHRI, HPI, ASITA, IHGM, BHA miwah Kelompok Ahli Pembangunan Provinsi Bali Bidang Pariwisata.(Rls/Btnc)
Komentar