Nlatarang Pikaryan Petang Warsa, Ny. Putri Koster Ngolemin TP PKK, Dekranasda, PAKIS, miwah PAI Sajebag Bali

  • 24 Februari 2023
  • 20:02 WITA
  • News
Makarya Fokus, Tulus miwah Lurus Ny. Putri Koster sampun mabukti prasida ngwantu krama wiadin prasida nyokong Program Pembangunan Masyarakat Bali

Makarya Fokus, Tulus miwah Lurus Ny. Putri Koster sampun mabukti prasida ngwantu krama wiadin prasida nyokong Program Pembangunan Masyarakat Bali

DENPASAR, Balitopnews.com - Selami petang warsa langkung ngabih Gubernur Bali Wayan Koster, dahat makeh program wiadin parikrama sane kapikamkam olih Ny. Putri Koster. Tiosan manados pendamping, majanten makudang-kudang jabatan taler kagamel, minakadi ex officio inggih punika Ketua TP PKK Provinsi Bali miwah Ketua Dewan Kerajinan Nasional Daerah (Dekranasda) Provinsi Bali, wiadin jabatan sane tiosan sakadi  Manggala Utama Paiketan Krama Istri (PAKIS) Provinsi Bali miwah Ketua DPD Perhimpunan Anggrek Indonesia (PAI) Provinsi Bali.  

Pinaka cihna pertanggungjawaban antuk pamikaryannyane, Ny. Putri Koster nlatarang napi kewanten sane kalaksanayang salami petang warsa puniki ring ajeng 3.500 uleman sane dados stakeholders saking papat organisasi punika. Minakadi TP PKK Kabupaten/Kota miwah Desa sajebag Bali, Ketua Dekranasda Kabupaten/Kota se-Bali, Manggala PAKIS se-Bali, miwah samian anggota PAI Daerah Provinsi Bali ring acara sane ngunggahang unteng “Ketua Tim Penggerak PKK, Ketua Dekranasda, Manggala Utama PAKIS MDA, Ketua Perhimpunan Anggrek Indonesia Provinsi Bali Menyapa”, magenah ring Lapangan Puputan Margarana, Renon, Denpasar, rahina Sukra (24 Februari  2023).

Ring acara sane ngunggahang unteng  "Bergerak, Bekerja, Berbagi" punika, Ketua BKOW Provinsi Bali Ny. Tjok. Putri Hariyani Ardhana Sukawati, Ketua Gatriwara DPRD Bali Ny. Ningsih Wiryatama, makudang-kudang organisasi wanita sakadi Dharma Wanita Provinsi Bali, Dharma Pertiwi, Jalasenastri, Pia Ardhya Garini, Persit Kartika Chandra Kirana, Bhayangkari, Adhyaksa Dharmakarini, Ikatan Bidan Indonesia miwah Kepala OPD ring Lingkungan Pemprov Bali, Ny. Putri Koster maosang yening parikrama puniki  matetujon menyapa utawi nincapang karumaketan miwah nyobyahang ring kramane ngeninin indik makudang program wiadin parikrama sane sampun kalaksanayang selami puniki, minakadi parikrama TP PKK, Dekranasda, PAKIS miwah PAI. 

Anak istri sane ketah kabaosang Bunda Putri puniki maosang yening ring pangawit kapikukuhang antuk ex officio pinaka Ketua TP PKK Provinsi Bali miwah Ketua Dekranasda Provinsi Bali, akeh parindikan sane sandang kabecikang saha makudang program sane sandang kamargiang. “Sangkaning punika TP PKK miwah Dekranasda majanten patut wenten program miwah anggaran, punika sane sandang utsahayang pisan,” baosnyane ring galahe punika.

Bunda Putri ngangkenin, selami sawetara limang warsa ngiringang Gubernur Wayan Koster, program sane kalaksanayang setata kaadungang sareng  visi misi Provinsi Bali Nangun Sat Kerthi Loka Bali, Melarapan Pola Pembangunan Semesta Berencana, Nyujur Bali Era Baru. “Gubernur Bali utawi  Bali sareng kramannyane, Titiang pinaka rabi taler nyarengin ngaremba  mawinan prasida sakadi kepakan sayap burung sane antuk sareng-sareng mangumbara nyujur pangapti ngwangun krama Bali,” pawewehnyane.

Manut sareng visi misi Provinsi Bali, parikrama makudang organisasi sane kasayubin taler uleng majeng pewangunan fisik wiadin krama Bali, saha pangupaya nglestariang seni, adat, tradisi, agama wiadin kaluihan palemahan Bali rauhing ring budaya lokal tetamian anak lingsire rihin.

Majeng TP PKK, Dane ngangkenin  yening Sosialisasi wiadin parikrama Sosial dados fokus program sajeroning nyujur tetujon PKK minakadi kulawarga bagia  miwah sukerta saha ngardi prati santana sane madue laksana luih. Majeng Dekranasda, sakadi kawigunannyane sajeroning ngicen pangweruhan wiadin pengawasan, anggannyane ngangkenin setata mautsaha nyaga saha nglestariang kawibuhan seni, budaya, wiadin kearifan lokal sane katamiang olih leluhur. Silih tunggilnyane minakadi kalestarian wiadin panglimbak kain tenun ikat Bali (songket wiadin endek) saha nyarengang krama mangda tresna ring  produk pikaryan pengerajin Bali. PAKIS Bali, taler kabaosang setata mautsaha nglestariang seni, budaya wiadin agama Hindu ring Bali. Desa Adat pinaka kekuatan ageng ring Bali miwah PAKIS Bali pinaka pahannyane jagi setata mautsaha nyarengang krama istri mangda setata nyaga pakem-pakem adat, tradisi wiadin agama ring Bali. Majeng PAI Bali, manutnyane uleng sajeroning nglestariang flora Bali, pamekas anggrek Bali. Mawinan ring salanturnyane anggrek asli Bali prasida ngiasin natar krama Baline.

Mapaiketan sareng program pembangunan wiadin pelestarian sane sampun kalaksanayang selami petang warsa puniki, Dane ngaturang suksma antuk pangremba samian angga, pamekas Ketua TP PKK Kabupaten/Kota rauhing undagan Kecamatan miwah Desa, Ketua Dekranasda, Manggala PAKIS MDA, anggota PAI wiadin OPD Provinsi Bali rauhing samian angga sane nyarengin nyokong program kerjanyane pinaka kanti Pemerintah Provinsi Bali. 

Ring salanturnyane, Bunda Putri ngaptiang mangda sinergitas puniki prasida katitenin becik wiadin katincapang malih sajeroning nyokong  program kerja ring warsa 2023 puniki, tiosan ring inter organisasi nanging taler   intra organisasi mangda tetujon sane kaaptiang prasida kakardin. “Tiosan punika, pangremba anak istri empat organisasi sane kamanggalain antuk titiang taler sajeroning nyarengang kramane nyokong program-program pemerintah,” pawewehnyane sinambi maosang anak istri prasida dados penggerak ring unit pinih alit minakadi kulawarga. “Saking kulawarga makapangrihin, raris ring lingkungan kramane, Bali kantos Indonesia, anak istri prasida dados penggerak, punika sane kabaosang the power of Ibu-Ibu,” cetusnya.

Ring acara punika, taler kasukserahang wantuan antuk simbolis 40 Dus PMT majeng Balita sane kasukserahang olih  Kepala Dinas Kesehatan Provinsi Bali dr. I Nyoman Gede Anom, penyerahan 40 paket susu majeng Ibu Hamil sane kasukserahang olih Ketua Pengurus Daerah IBI Bali Luh Putu Sukarini, kasukserahang wantuan bibit Ayam rauhing pakan miwah bibit tanaman sayuran 2.000 puwun olih Kepala Dinas Pertanian dan Ketahanan Pangan Provinsi Bali I Wayan Sunada majeng Ketua TP PKK Kota Denpasar Ny. Antari Jaya Negara, penyerahan bantuan bibit tanaman 200 puwun olih Kepala Dinas Kehutanan dan Lingkungan Hidup Provinsi Bali I Made Teja majeng Ketua TP PKK Kota Denpasar, miwah kasukserahang antuk simbolis wantuan Aksi Sosial majeng 200 diri krama tuara minakadi petang dasa diri krama lansia, Ibu Hamil, Penyandang Disabilitas, Kader PKK miwah Balita marupa petang ton beras suang-suang 20kg, 200 krat adeng suang-suang 1 krat, 320 Kotak Susu majeng Balita antuk suang-suang polih 8 kotak, miwah 320 Kotak Susu majeng Lansia, Ibu Hamil Penyandang Disabilitas miwah Kader PKK antuk suang-suang ngamolihang 2 kotak.

Tiosan punika, ring parikrama punika taler wenten pemeriksaan Kesehatan miwah Kesehatan mata gratis, vaksinasi booster saha pembagian 200 kaca baca gratis olih Dinas Kesehatan Provinsi Bali. Ring panguntat parikrama taler karamianin antuk Fashion Show olih designer kebanggaan Bali minakadi Body and Mind, Taksu Design, Ipong miwah Lusi Damai saha pamisuguhan  bondres sajeroning ngibur kramane.(Rls/Btnc) 


TAGS :

Komentar