Bulan Bahasa Bali Kalaksanayang Kantos ring Desa-Desa

  • 25 Februari 2023
  • 21:02 WITA
  • News
pamargin Bulan Bahasa Bali ring Desa Batuagung, Jembrana Bali daweg tanggal 25 Februari 2023

JEMBRANA,Balitopnews.com - Bulan Bahasa Bali pinaka silih tunggil program utama Gubernur Koster sane matetujon ngicen genah majeng pangupaya nglestariang Aksara, Sastra wiadin basa Bali ring tengahing krama manut daging Peraturan Gubernur Bali No.80 Tahun 2018. 

Antuk ngunggahang unteng Segara Kerthi, Campuhan Urip Sarwa Prani sane mapiteges Segara pinaka pangawit saha pamuput kauripan samian sane maurip. Pamargin Bulan Bahasa Bali ka-V Warsa 2023 kalaksanayang ring sakancan genah kantos ring desa-desa wiadin  ring desa adat.

Sakadi pamargin Bulan Bahasa Bali ring Desa Batuagung, Jembrana Bali daweg tanggal 25 Februari 2023. “Bulan Bahasa Bali kalaksanayang satunggil warsa. Mapaiketan sareng lomba sane kamargiang majanten nganutin cecumpon forum desa. Ring awarsa sane sampun lintang kalaksanayang lomba mapidarta, masatua miwah nyurat aksara Bali. Yening ring warsane puniki Wimbakara Nembangang Sekar Alit tingkat dewasa,” baos Nyoman Sudarma, Perbekel Desa Batuagung.

Pamilet wimbakara wantah ngangganin suang-suang banjar ring Desa Batuagung sane akehnyane 9 Banjar Adat antuk akeh adiah kantos dasa yuta  rupiah. “ Jayanti  kapertama kapolihang olih Banjar Taman, Jayanti-2 saking Banjar Sawe miwah Jayanti ka-3 saking Banjar Palungan Batu,” baos Sudarma.

Tios ring punika Tim Desa Kerti Bali Sejahtera (KBS) Batuagung Jembrana taler ngaremba pamargin Bulan Bahasa Bali ring Desa  Batuagung. Parindikan puniki pinaka silih tunggil pamargin program saking Tim KBS Desa Batuagung sane maprakanti sareng perangkat Desa Batuagung minakadi Program Perlindungan miwah Penggunaan Bahasa, Aksara wiadin Sastra Bali rauhing pamargin Bulan Bahasa Bali.(Rls/Btnc)


TAGS :

Komentar