Muputang Prakara Pertanahan, Gubernur Koster Ngamolihang Penghargaan saking Menteri ATR/Kepala BPN RI
- 07 Maret 2023
- 22:03 WITA
- News
JAKARTA, Balitopnews.com - Menteri Agraria dan Tata Ruang / Kepala Badan Pertanahan Nasional Republik Indonesia, Panglima TNI Marsekal TNI (Purn) Hadi Tjahjanto ngicen Piagam Penghargaan majeng Gubernur Bali, Wayan Koster daweg rahina Anggara Paing, Wuku Medangkungan tanggal 7 Maret 2023 ring Jakarta, saantukan Gubernur Bali, Wayan Koster katureksain sampun mautsaha ageng sajeroning muputang prakara pertanahan melarapan antuk pamargin Reforma Agraria ring Provinsi Bali.
Penghargaan sane kapolihang olih Gubernur Bali, Wayan Koster katerima olih Sekretaris Daerah Provinsi Bali, Dewa Made Indra sajeroning Rapat Kerja Nasional Warsa 2023 sane ngunggahang unteng ‘Peningkatan Investasi melarapan Transformasi Digital miwah Kepastian Hukum ring Bidang Tata Ruang wiadin Pertanahan’.
Pidabdab ngarepin prakara utawi Konflik Pertanahan melarapan antuk pamargin Reforma Agraria ring Provinsi Bali sane sampun puput kalaksanayang olih Gubernur Bali,Wayan Koster, minakadi :
1) Muputang prakara konflik agraria sane wenten saking warsa 1960 ring Desa Sumberklampok, Kecamatan Gerokgak, Kabupaten Buleleng sane jimbarnyane 612 hektare, antuk kramane ngamolihang 458 hektare tegep antuk sertifikatnyane saha Pemerintah Provinsi Bali ngamolihang 154 hektare. Sertifikat kasukserahang daweg tanggal 18 Mei 2021 miwah ring tanggal 22 September 2021;
2) Muputang prakara agraria sane wenten saking warsa 1920 ring Kelurahan Tanjung Benoa, Badung sane jimbarnyane 2,5 hektare, minakadi wenten 90 Sertifikat, antuk sertifikat kasukserahang daweg tanggal 30 Mei 2022;
3) Muputang prakara agraria saking warsa 1970 ring Kali Unda, Kelurahan Semarapura Kangin, Klungkung sane jimbarnyane 1,3 hektare minakadi wenten 69 Sertifikat, antuk sertifikat kasukserahang daweg tanggal 19 Juni 2022;
4) Muputang prakara agraria sane wenten saking warsa 1956 ring Desa Adat Buleleng, Kabupaten Buleleng sane jimbarnyane 2,8 hektar sane kabuatang majeng 72 KK, antuk sertifikat tanah kasukserahang daweg tanggal 3 Agustus 2022;
5) Muputang prakara agraria saking warsa 1970 ring Kelurahan Semarapura Klod Kangin, Klungkung sane jimbarnyane 1,1 hektare, minakadi wenten 64 Sertifikat, antuk sertifikat kasukserahang daweg tanggal 25 September 2022. (Rls/Btnc)
Komentar