Kick Off SERAMBI 2023, Wagub Tjok Ace Nyarengang Krama Nukarang Jinah ring Layanan Resmi Perbankan
- 27 Maret 2023
- 21:03 WITA
- News
DENPASAR,Balitopnews.com - Wakil Gubernur Bali Prof. Tjokorda Oka Artha Ardana Sukawati sane kasarengin olih Kepala Perwakilan Bank Indonesia Provinsi Bali Trisno Nugroho ngawitin pamargin Semarak Berkah Ramadhan miwah Idul Fitri (Kick Off SERAMBI) 2023 sane kacihnayang antuk penekanan layar digital, ring Kantor Perwakilan Bank Indonesia Provinsi Bali, Soma (27 Maret 2023)
Ring aturnyane, Wagub Tjok Ace ngajiang becik parikrama Kick Off SERAMBI 2023 sane kaaptiang prasida ngicen pangweruhan krama Bali mapaiketan sareng penukaran uang layak edar nyanggra pakeling rahina Idul Fitri.
Wagub Bali ngawewehin ring warsane puniki Bank Indonesia nyediayang penukaran uang layak edar ngarepin lebaran warsa 2023 sayan nincap saihang sareng lebaran ring awarsa sane sampun lintang. Panincap punika mapaiketan sareng pertumbuhan perekonomian sane sayan becik saha nenten wenten malih penetapan status PPKM olih pemerintah saha tradisi mudik sane kalaksanayang olih kramane ri kala Idul Fitri. Sangkaning punika, Bank Indonesia jagi ngicen pelayanan penukaran uang melarapan perbankan ring samian Provinsi sajebag-Indonesia, rumasuk ring Provinsi Bali.
“Majeng krama Bali sane jagi nukarang jinah anggen Idul Fitri utawi lebaran warsa 2023, titiang ngaptiang mangda nukarang jinah ring Perbankan/genah sane katunjuk olih Bank Indonesia. Krama sampunang osah saantukan Perwakilan Bank Indonesia Provinsi Bali jagi nyediayang pabuat kawentenan jinah layak edar,” pawewehnyane.
Parindikan sane pateh taler kabaosang Trisno Nugroho sajeroning sambrama wacanannyane, Dane maosang yening parikrama ekonomi sane sayan becik ring Pulo Bali sane mawesana majeng panincap pabuat majeng uang tunai. Sangkaning punika titiang mroyeksiang pabuat majeng uang tunai selami Ramadhan 2023 minakadi Rp. 2.985 miliar utawi nincap 5% saihang ring warsa 2022. Tiosan punika, majeng pabuat penukaran uang titiang mungkah layanan penukaran ring 206 jaringan kantor bank sane wenten ring samian wewidangan Bali saha layanan penukaran ring fasilitas publik sakadi Layanan ring pusat keramaian, kas keliling bersama, miwah Layanan Kas Peduli Mudik ring Terminal Mengwi wiadin Padangbai.
“Titiang mautsaha mastikayang kawentenan jinah Rupiah majeng pabuat krama ring samian wewidangan Bali ring periode bulan Ramadhan warsa 2023 puniki, sane prasida nagingin pabuat kramane, pecahan sane anut, just in time saha kawentenane layak edar,” baosnyane.
Trisno Nugroho taler ngaptiang melarapan antuk parikrama SERAMBI 2023 puniki krama jagi prasida kaicen edukasi mangda Cinta Bangga Paham Rupiah pamekas mapaiketan sareng tata cara pengelolaan jinah. Parindikan puniki anut sareng pangarsa jinah sane sayan nincap selami Ramadhan mawinan titiang ngelingang kramane mangda “Belanja Bijak Menggunakan Rupiah” pinaka pangupaya nees panincap pangarga barang/inflasi.
Kick Off SERAMBI 2023 ring rahina semengne kadagingin antuk parikrama pelepasan mobil kas keliling sane jagi ngiderin Bali ngicen pelayanan penukaran uang nyanggra rahina Idul Fitri 1444 Hijriah.(Rls/Btnc)
Komentar