Ketua Dekranasda  Bali Ny Putri Koster Nyelehin  Kios Dekranasda  ring Wewidangan Wiyata Graha-Manik Mas Besakih

  • 13 April 2023
  • 19:04 WITA
  • News
Ketua Dekranasda  Bali Ny Putri Koster Nyelehin  Kios Dekranasda  ring Wewidangan Wiyata Graha-Manik Mas Besakih

KARANGASEM,Balitopnews.com - ,Ketua Dewan Kerajinan Nasional Daerah (Dekranasda) Provinsi Bali Ny. Putri Suastini Koster nyelehin kawentenan kios Dekranasda sané magenah ring wewidangan Wiyata Graha-Manik Mas, Besakih-Karangasem rahina Wraspati tanggal 13 April 2023.

Kapanggihin ring selagan parikrama punika, majeng angga media, Ny. Putri Koster nlatarang yening saking Pemerintah Provinsi Bali, ngaptiang Dekranasda Provinsi Bali mangda midabdabin becik kawentenan kalih kios, sapunapi mangda misuguhang produk kerajinan sané nyihnayang kerajinan Karangasem sané kakelola olih UMKM Karangasem. 

 “Pinaka Ketua Dekranasda Titiang kasarengin Bapak Kadisperindag Provinsi Bali nyelagang galah nyelehin kawentenan kalih kios sané kaicen majeng Dekranasda. Kios puniki ring salanturnyane jagi kadagingin antuk produk-produk sandang miwah kerajinan handicraft khas karangasem, sakadi songket, endek, gringsing utawi anyaman khas Karangasem," baosnyane.

Bunda Putri Koster taler maosang yening ring galahe mangkin anggannyane sedeng midabdabin desain interiornyane mangda makakalih kios punika manados conto primer sajeroning misuguhang produk-produk kàrya krama Karangasem. “Antuk punika titiang ngaptiang mangda pengrajin miwah UMKM Karangasem manados tuan ring genahnyane," baosnyane. 

Tiosan punika majeng awak media, Bunda Putrì taler maosang indik pamikayunnyane sajeroning nyobyahang kawentenan Bunga Kasna sané pinaka maskot Kabupaten Karangasem majeng krama sané rauh ka Besakih. Para pedagang ring salanturnyane prasida ngadol bunga kasna ring suang-suang kiosnyane, mawinan wenten panampen kramane yening durung numbas bunga kasna durung nangkil ka Besakih. 

 “Astungkara mugi pangapti sané becik prasida kadagingin, sané majanten madasar antuk pangremba saking samian angga pamekas Pemerintah sareng krama, sajeroning nincapang kasukertan krama," baos Bunda Putri Koster

Ring galahe punika, Bunda Putrì taler nyelehin kawentenan kios-kios pedagang sané tiosan, saha ngicen edukasi majeng para pedagang mapaiketan sareng kawentenan endek, songket miwah sané tiosan.(Rls/Btnc)


TAGS :

Komentar