Nangiang Branding Usada Bali, Ny. Putri Koster Ngelingang Mangda Nguratiang Kemasan wiadin Karesikan Produk

  • 19 April 2023
  • 21:04 WITA
  • News
Nangiang Branding Usada Bali, Ny. Putri Koster Ngelingang Mangda Nguratiang Kemasan wiadin Karesikan Produk

DENPASAR,Balitopnews.com- Ketua TP PKK Provinsi Bali Ny. Putri Suastini Koster nguratiang kawentenan Pelayanan Kesehatan Tradisional Bali (usada Bali) sane pinaka silih tunggil saking  44 Tonggak Peradaban Penanda Bali Era Baru. Sajeroning nangiang branding usada Bali, Ny. Putri Koster ngelingang indik mabuatnyane kemasan wiadin karesikan produk. Parindikan punika katuekang antuk Dane ri kala dados narawakya ring  taping program Dialog Pagi Kompas TV Dewata, Buda (19 April 2023). 

Tiosan ring Ny. Putri Koster, taping sane kalaksanayang ring Studio Kompas TV Dewata taler ngrauhang kalih narawakya   minakadi Koordinator Kelompok Ahli Pembangunan Pemerintah Provinsi Bali Prof. Dr. drh. I Made Damriyasa, M.S miwah Prof. Dr. rer.net. I Made Agus Gelgel Wirasuta, M.Si. Apt pinaka Kelompok Ahli Bidang Pendidikan, Kesehatan, Jaminan Sosial miwah Tenaga Kerja. 

Anak istri sane ketah kabaosang Bunda Putri puniki nlatarang yening para lingsire dumun namiang makeh pisan tamba tradisional sane sampun mabukti. "Panglingsir iraga sareng sami kaloktah madue kawagedan ring tamba tradisional. Parindikan puniki kaunggahang ring daging cakepan lontar sane durung samian kauningin saha katelebang daging ipun," Baosnyane. Manut Bunda Putri, napi sane katamiang olih para panglingsire patut kalestariang saha prasida katangiang malih nganutin panglimbak jaman. Makudang parindikan manutnyane patut kaanutang minakadi ring kemasan produk wiadin karesikan utawi higienis. "Puniki dahat mabuat saantukan tamba tradisional majanten prasida masaing sareng tamba sane tiosan. Antuk kemasan sane becik, tamba jagi sayan dangan kawigunayang saha karesikan ipun taler prasida kapastikayang," Baosnyane. 

Bunda Koster taler maosang indik panyarengan TP PKK Bali sajeroning nyobyahang kawentenan tamba tradisional pinaka silih tunggil pamargi nees kawentenan zat kimia. Silih tunggil sasaran 10 Program Pokok PKK minakadi kesehatan. Sangkaning punika, TP PKK pinaka partner pemerintah majanten jagi nyokong program ring widang kesehatan. Mapaiketan sareng  gerakan pemanfaatan obat tradisional, TP PKK ngaptiang mangda kramane prasida ngawigunayang natarnyane pinaka  genah tanaman obat keluarga (toga). Mapaiketan sareng program Pemprov Bali, toga prasida kawigunayang pinaka P3K ring wewidangan kulawarga. Napi malih, yening kawentenannyane akeh, toga prasida kadadosang lakaran makarya tamba tradisional Bali.

Tiosan integrasi program, TP PKK Bali taler nglaksanayang sosialisasi melarapan media sakadi televisi wiadin radio. "Majanten antuk setata nyarengang  para ahli sane waged ring widangnyane," Baosnyane. 

Prof. Damriyasa nlatarang bantang-bantang indik  44 Tonggak Peradaban Bali Era Bali sane pinaka  implementasi saking Visi Nangun Sat Kerthi Loka Bali. "44 poin punika pinaka penanda Bali Era Baru. Pamikolih pikaryan saking Bapak Gubernur Wayan Koster," baosnyane. Cutetnyane, 44 tonggak peradaban puniki kahanannyane komprehensif, mapaiketan sareng tigang parindikan sane  fundamental minakadi alam, manusia miwah budaya. 

Dane taler maosang, Pelayanan Kesehatan Tradisional Bali dados silih tunggil tonggak penanda Bali Era Baru. Gubernur Koster ngicen uratian ageng majeng layanan pengobatan tradisional saantukan Bali madue kawibuhan daging  jagat sane prasida kawigunayang olih samian krama Bali pinaka tamba herbal. "Krama Bali unggul ring widang usada. Yening prasida katitenin saha kalimbakang, tiosan becik majeng  kesehatan taler mawesana becik majeng widang ekonomi. Puniki kauningin pisan olih Bapak Gubernur,” baosnyane. Dane maosang makudang pidabdab sane kaambil sajeroning nglimbakang layanan kesehatan tradisional. Ring widang yuridis, sampun kamedalang Peraturan Gubernur Bali Nomor 55 Warsa 2019 indik Pelayanan Kesehatan Tradisional Bali. Salanturnyane, Pemprov Bali taler sedeng ngwangun Pusat Pengolahan Pasca Panen Tanaman Obat (P4TO) sane wenten ring  Rendang, Baturiti miwah Pengotan. Pemprov Bali taler kantun ngutsahayang mungkah jurusan pengobatan tradisional ring silih tunggil  lembaga pendidikan. Prof.Damriyasa jagi sumeken pisan midabdabin widang puniki saantukan madue potensi ageng sane kaduenang Pulo Dewata. Yening nenten sumeken kapidabdabin, kaosahang jagi kaambil olih anak tiosan. 

Negepin  atur saking Damriyasa, Prof. Gelgel maosang yening layanan kesehatan tradisional ring samian wewidangan ngasilang USD 4,4 triliun ring warsa 2020 saha satunggil warsa katarka nincap 10 persen. Dane maosang, melarapan potensi ageng sane kaduenang, Daerah Bali madue selah nincapang pendapatan saking Layanan Kesehatan Tradisional sane kiintegrasiang sareng widang pariwisata. 

Dane raris ngicen conto indik pamikolih Bali sajeroning ngarepin Covid-19 melarapan ngawigunayang usada arak. Saking pawilanganipun, sane mangkin pemerintah prasida hemat anggaran saantukan pemulihan pasien sayan gelis melarapan wantuan usada arak. Dane maosang, kawentenan usada arak mawit ri kala ngwacen lontar cukil daki sane madaging kawigunan arak wiadin  rempah ngicalang sungkan sane masaih sareng Covid. "Ring lontar wantah kabaosang pinyungkan pernapasan kewanten, saha kakilitang sareng kawentenan virus punika. Puniki dados  penemuan mabuat pisan, baosnyane. Ring pamuput aturnyane, Prof. Gelgel nyarengang krama mangda setata nyelehin saha nglimbakang usada Bali. Mangda ring benjang pungkur nenten kantos nyesel risampune potensi puniki kaambil olih krama dura negara.(Rls/Btnc) 


TAGS :

Komentar