Gubernur Koster Nyarengang Krama Bali Nyokong Nyoman Paul ring Indonesian Idol 2023
- 20 April 2023
- 13:04 WITA
- News
DENPASAR,Balitopnews.com - Melarapan antuk kahanan kekeluargaan, Gubernur Bali Wayan Koster nrima pangrauh Nyoman Paul Fernando Aro sareng kulawarga ring Jaya Sabha, Denpasar rahina Wraspati Umanis, Ugu tanggal 20 April 2023 semeng.
Paul sane ring galahe mangkin mayusa 22 warsa, pinaka kontestan Indonesian Idol 2023 sane sampun prasida ngranjing babak Top 4. Kasarengin Salma Salsabila, Rony, miwah Nabila Taqiyyah, Nyoman Paul jagi mawali nyihnayang kawagedannyane ring panggung Indonesian Idol 2023 sajeroning ngruruh posisi Top 3 sane jagi kalaksanayang ring rahina Soma tanggal 1 Mei 2023. Sangkaning punika, Ipun ngaptiang ring krama Bali pamekas Gubernur Bali Wayan Koster mangda pamarginipun ring Indonesian Idol prasida mamargi antar saha dados kebanggaan Bali prasida ngamolihang juara.
"Titiang newek ngaturang suksma majeng bapak Gubernur sane sampun nyanggra pangrauh titiang sareng kulawarga saha nglungsur pangrastiti mangda titiang prasida ngamolihang juara ring Indonesia Idol," baos anak lanang sane naenin manados pemain sepak bola profesional ring Indonesia puniki.
Salanturnyane, anak lanang saking Buleleng puniki maosang yening sokongan saking krama Bali dahat kabuatang napi malih panureksan ipun taler nganggen voting saking kramane.
Gubernur Bali Wayan Koster maosang dahat nyokong Nyoman Paul sane ring galahe mangkin kantun mautsaha ring Indonesian Idol. Parindikan puniki taler prasida kaanggen tetuladan majeng para yowana Bali sane tiosan. Gubernur saking Desa Sembiran, Tejakula, Buleleng puniki ngangken bangga antuk prestasi sane kapolihang olih Paul.
"Titiang rumasa bangga, napi malih Paul asli Buleleng. Saantukan Titiang taler saking Buleleng. Cutetnyane mugi setata sukses, astungkara Titiang jagi setata ngicen sokongan," baosnyane.
Makapanguntat, Gubernur Koster ngelingang majeng Paul sadurung mawali nglaksanayang karantina mangda ngrajing ring Top 3 mangda setata ngrastitiang saha pedek tangkil ring Pura Agung Besakih napi malih galahe mangkin pujawali Ida Bhatara Turun Kabeh.
Sadurungnyane, Paul duet sareng Bunga Citra Lestari (BCL) nembangang geding Menghapus Jejakmu duen Noah, ring babak Top 5 Indonesian Idol 2023 rahina Soma (10/4) wengi sane ngawinang ipun prasida ngranjing Top 4. (Rls/Btnc)
Komentar