Nyelehin Pos Terpadu Mudik Lebaran 2023 ring Gilimanuk, Gubernur Koster Nedunang Dishub Bali Nyokong Personil Gabungan Ngarepin Pemudik
- 19 April 2023
- 16:04 WITA
- News
GILIMANUK,Balitopnews.com - Gubernur Bali Wayan Koster, kasarengin Kapolda Bali Irjen Pol Putu Jayan Danu Putra, nyelehin langsung ring Pos Terpadu Lebaran 2023 Pelabuhan Gilimanuk, Kabupaten Jembrana daweg rahina Buda (19 April 2023) siang.
Gubernur ring galahe punika manggihin langsung kepadatan arus mudik saking pelabuhan Gilimanuk sane jagi nyeberang ka Pelabuhan Ketapang, Banyuwangi, Jawa Timur.
Gubernur Koster maosang, kahanan ring H-3 rahina Lebaran ring Gilimanuk, yadiastun ngranjing kategori sangat padat nanging kantun kapanggihin aman saha kondusif. " Majanten ring Lebaran warsane puniki kapanggihin ngakehang, nanging tata kelola wiadin strategi sane kalaksanayang olih angga mapaiketan ring Pelabuhan Gilimanuk sampun kapanggihin becik. Wenten 32 plus satu kapal sane kasiagayang sajeroning ngangkut penumpang," baos Gubernur sinambi maosang, Pemerintah Provinsi Bali nedunang Dinas Perhubungan Provinsi Bali sane maprakanti sareng makudang angga sajeroning nyokong arus mudik wiadin arus balik mangda prasida antar.
Sangkaning punika Gubernur Koster taler ngaptiang sistem sane sampun kalaksanayang galahe mangkin ring salanturnyane kaaptiang kantun kamanggehang ring periode arus mudik wiadin arus balik ring Gilimanuk. " Mangda para pemudik sane jagi nglaksanayang Idul Fitri saha jagi mapupul sareng kulawarganyane prasida antar ring perjalanan, " Baos anak lanang saking Sembiran, Kabupaten Buleleng.
Ring galahe punika, Kapolda Bali Irjen Pol Putu Jayan Danu Putra nlatarang indik pangupaya nees kawentenan kemacetan olih personil gabungan minakadi melarapan antuk strategi buka tutup alur lalu lintas, pengalihan arus lalu lintas, kantos nyediayang kantong parkir saha meng-klasterkan wiadin mengatur jenis kendaraan sane jagi kakanalisasi. " Bapak Kapolri maosang (antuk daring, red) yening wenten makudang genah sane patut kauratiang ring periode mudik Lebaran 2023 puniki silih tunggilnyane ring Pelabuhan Gilimanuk nyujur Ketapang, Jawa Timur. Puniki dados uratian samian angga, "baos Kapolda.
Kapolda Bali taler nuekang sajeroning nambakin galah penyeberangan (port time) sane sue, mangda nenten wenten penumpukan calon penumpang wiadin kemacetan ring wewidangan Pelabuhan Gilimanuk. " Titiang sampun maprakanti sareng angga mapaiketan, sakadi nyediayang 32 kapal ri kala kahanan padat plus satu kapal ageng ngwantu ngirangin kepadatan penumpang, " baosnyane.
Irjenpol Jayan Danu Putra taler nlatarang majeng kendaraan kecil jagi kagenahang dumun ring Terminal Kargo Pelabuhan Gilimanuk tiosan kaulengang majeng pembelian tiket. " Sajeroning nees kawentenan antrean ring margine, paling ten wenten genah sadurung wenten pergerakan ka Pelabuhan, "baosnyane. " Bapak Kapolri taler nuekang majeng pikobet keselamatan sampun katureksain samian parindikan, minakadi kawentenan kapal, keselamatan penunjang tiosan sakadi life jacket mangda setata katureksain, "baosnyane.
Ring selagan parikrama punika, Gubernur Wayan Koster taler ngesengin makudang pemudik sane kapanggihin antre ngranjing ka kapal penyebrangan. Silih tunggilnyane Herman, Pemudik saking Jember antuk domisili ring Kota Denpasar. Herman sane mudik sareng istri miwah pianak ipun nganggen sepeda motor maosang, yadiastun kawentenan arus mudik sane padat saha muatang galah jam-jaman mangda prasida munggah ring kapal penyeberangan nanging kawantu antuk kawentenan sistem sane kalaksanayang ring Pelabuhan Gilimanuk.
Gubernur Koster taler ngelingang mangda setata nyaga kesehatan saha nyaga keselamatan selami perjalanan. "Alon-alon ring margi, mugi antar kantos rauh ring genah tetujon suang-suang, " baos Gubernur.
Gubernur Koster kasarengin Kapolda Bali taler antuk simbolis nyukserahang makudang bingkisan marupa ajengan miwah vitamin majeng personil sane majaga mangda setata semangat saha setata manggih kahanan kenak nglaksanayang tugas.
Pengadaan Pos Terpadu Lebaran 2023 taler karuntutin antuk Operasi Ketupat Agung sane kalaksanayang ring tanggal 17 April kantos 1 Mei 2023 puniki nyarengang 5.524 personel gabungan minakadi 2.754 personel Polri, 1.000 personel Kodam IX/Udayana, saha sisannyane saking instansi mapaiketan sane tiosan, sakadi Dinas Perhubungan, Dinas Kesehatan, BMKG, Basarnas,Pertamina, Jasa Raharja, Jasa Marga, Satpol PP, miwah Mitra Kamtibmas tiosan.
Parikrama punika taler karauhin olih Danrem 163/Wira Satya Brigfjen TNI Agus M. Latif Direktur Transportasi Sungai, Danau, dan Penyeberangan (TSDP) Junaidi, Kepala Dinas Perhubungan Provinsi Bali IGW Samsi Gujarat, Kepala Dinas Kesehatan Provinsi Bali I Nyoman Gede Anom miwah Kasat Pol PP Provinsi Bali, Dewa Nyoman Rai Dharmadi.(Rls /Btnc)
Komentar