Karauhin antuk Ibu Negara, Ny Putri Koster Ngamiletin Acara HKG PKK Ka-51 Warsa 2023
- 17 Mei 2023
- 18:05 WITA
- News
MEDAN,Balitopnews.com - Ketua Tim Penggerak PKK Provinsi Bali, Ny Putri Suastini Koster, ngrauhin langsung pakeling Hari Kesatuan Gerak Pembinaan Kesejahteraan Keluarga (HKG PKK) ka-51 Warsa 2023. Parikrama sane karauhin olih Ibu Negara Ibu Iriana Joko Widodo, Ibu Wury Ma’ruf Amin, miwah para anggota Organisasi Aksi Solidaritas Era Kabinet Indonesia Maju (OASE KIM) punika kalaksanayang ring Hotel Santika Premiere Dyandra, Kota Medan, Provinsi Sumatera Utara, ring rahina Buda, (17 Mei 2023)/semeng.
Parikrama taler karauhin olih TP-PKK Pusat, Provinsi miwah Kabupaten sajebag Indonesia sane ngunggahang unteng "Bergerak bersama menuju keluarga sejahtera dan tangguh mewujudkan Indonesia tumbuh.”
Ring sambrama wacanannyane, Ibu Iriana ngaturang rahajeng majeng samian tim penggerak PKK. Ibu Iriana taler maosang yening gerakan PKK patut ngutamayang prinsip kerja partisipatif.
“Malih apisan Titiang ngaturang rahajeng Hari kesatuan gerak PKK. Gerakan PKK puniki tumbuh saking undagan pinih alit ring tengahing krama, antuk ngutamayang prinsip kerja partisipatif mawinan muatang pangremba saking samian krama,” baos Ibu Iriana.
Ring galahe punika, Ibu Iriana taler mabebaosan sareng makudang kader PKK. Ibu Iriana taler ngajiang becik pangaat utawi semangat para kader PKK sane sampun makarya sabecik-becikne. Napimalih PKK puniki pikaryannyane abotan sareng pegawe negeri, nenten ngamolihang gaji saha nenten naenin lesu.
"Napimalih yening wenten lomba, kader-kader (PKK,red) majanten antuk pangaat sane dahat ageng,”baos Ibu Iriana.
Salaturnyane, Ibu Iriana mabebaosan sareng silih tunggil kader PKK mapesengan Ibu Gandaria sane sampun nyarengin PKK saking warsa 1978. Ibu Gandaria maosang jagi setata maingkupan ring gerakan PKK kantos ipun werda.
Ring selagan parikrama HKG PKK, taler kadagingin launching program Keluarga Indonesia Bebas Stunting (KIBAS) olih Ketua Umum TP PKK Pusat Tri Tito Karnavian.
Parikrama raris kalanturang antuk pabligbagan pantaraning Pelindung Utama TP-PKK Iriana Joko Widodo sareng makudang kader PKK sane sampun saking suwe nyarengin PKK, saha kapuputang antuk parikrama pemotongan tumpeng olih Iriana Joko Widodo kasarengin olih Tri Tito Karnavian, Ny. Wury Ma'ruf Amin, Walikota Medan Muhammad Bobby Afif Nasution miwah Kahiyang Ayu M Bobby Afif Nasution.
Ring galahe punika, Ny. Putri Koster rauh kasarengin antuk Ketua TP PKK Kabupaten/Kota se-Bali miwah angga pengurus teras TP PKK Bali.
Pinaka mitra pemerintah madasar antuk visi Nangun Sat Kerthi Loka Bali melarapan pola pembangunan semesta berencana nyujur Bali era Baru, Ny. Putri Koster kasarengin TP PKK sampun akeh ngaremba saha kasanggra becik olih makudang angga, mapaiketan sareng pangupaya nincapang kasukertan kulawarga. Sakasi parikrama sosial PKK Menyapa dan Berbagi, HATINYA PKK, Penggak PKK, Pasar Murah/Pasar Rakyat miwah pangupaya penanganan stunting wiadin pelestarian budaya ring Pulo Dewata. Ny. Putri Koster taler sering nyobyahang program pemerintah melarapan radio wiadin televisi melarapan antuk manados narawakya "44 Tonggak Peradaban Bali Era Baru".(Rls/Btnc)
Komentar