Ngrauhin AIBD Awards, Wagub Cok Ace Nyukserahang Penghargaan majeng Stasiun Penyiaran Korsel KBS
- 23 Mei 2023
- 22:05 WITA
- News
BADUNG,Balitopnews.com - Wakil Gubernur Bali Tjokorda Oka Artha Ardana Sukawati katuran galah nyukserahang penghargaan Kategori Siaran Program Radio Terbaik Untuk Perdamaian majeng KBS Korea saantukan sampun ngamolihang jayanti ring program siarannyane sane mamurda To Fly Again, ring acara Gala Dinner Asia Pacific Institute for Broadcasting Development (AIBD) International Awards ring Grand Hyatt Resort, Nusa Dua, Badung, Anggara Wage Sinta tanggal 23 Mei 2023.
Ring sambrama wacanannyane, Wagub sane ketah kabaosang Cok Ace puniki ngajiang becik saantukan Bali kapilih manados genah pamargin KTT AMS ka 18. "Ngangganin krama Bali saha ngangganin Pemerintah Provinsi Bali, Titiang ngaturang swasti prapta ring Bali majeng para pamilet KTT. Mugi Bali prasida ngicen iyusan becik mangda parikrama puniki prasida mamargi antar saha ngawetuang program wiadin kawijakan sane prasida nincapang penyiaran sajebag Asia Pasifik," baos Wagub.
Wagub Cok Ace taler ngaptiang mangda parikrama puniki prasida kaanggen genah sajeroning ngrumusang makudang-kudang pakibeh ring media penyiaran, mligbagang sareng sareng antuk gotong-royong midabdabin pikobete punika.
"Mugi kaluihan palemahan, budaya wiadin krama ipun ring Bali prasida setata nincapang pariwisata Bali. saha majanten prasida ngawetuang panampen becik majeng para pamilet, mawinan prasida metu pikayunan jagi rauh malih ka Bali ring benjang pungkur," baos Wagub Cok Ace.
Direktur Utama LPP TVRI, Iman Brotoseno maosang, patemon AMS sane kalaksanayang ring Bali taler pinaka pahan saking pangupaya media penyiaran nyokong pemulihan ekonomi nasional utaminipun ring widang akomodasi, pariwisata, wiadin UMKM. Dane taler ngamolihang galah nyobyahang kawentenan Bali antuk makatah kaluihannyane ring ajeng pamilet gala dinner punika.
Lembaga Penyiaran Publik (LPP) TVRI maprakanti sareng AIBD pinaka tuan rumah pamargin KTT Media se-Asia Pasifik ka-18 nglaksanayang AIBD International Awards pinaka cihna apresiasi majeng pangremba media se Asia Pasifik. Wenten makudang-kudang kategori penghargaan sane kaicen majeng para jayanti minakadi : nominasi Best TV Programme kapolihang "THAILAND TODAY" sane kasiarang ring NBT THAILAND; Green Tech and Sustainability kapolihang olih KBS KOREA antuk programnyane GENDER EQUALITY A REALITY; Outstanding Leadership kapolihang olih H.E. Has Samath; Penghargaan Exceptional Merit kapolihang olih Chan Vivathl; miwah nominasi Strategic Partner kapolihang olih KCC KOREA & KISDI MSIT.(Rsl /Btnc)
Komentar