Ketua Dekranasda Provinsi Bali Putri Koster Midabdabin Pamargin Fashion Show "Adi Warna Wastraloka"

  • 06 Juni 2023
  • 22:06 WITA
  • News
Ketua Dekranasda Provinsi Bali Putri Koster Midabdabin Pamargin Fashion Show "Adi Warna Wastraloka"

DENPASAR,Balitopnews.com - Sajeroning midabdabjn pamargin Fashion Show Dekranasda Provinsi Bali "Adi Warna Wastraloka" sane jagi kalaksanayang ring Lotus Pond GWK tanggal 10 Juni sane jagi rauh, Ketua Dewan Kerajinan Nasional Daerah (Dekranasda) Provinsi Bali Ny. Putri Koster ngamucukin rapat koordinasi sane ngrauhang pamilet pameran miwah 14 desainer saking Bali ring Gedung Gajah, Jaya Sabha, Denpasar, Anggara (6/6).

Ring galahe punika, Ny. Putri Koster maosang ring para desainer Bali mangda nganggen busana pinaka objek sane kapisuguhang. 

"Pinaka karya lokal, busana saking desainer Bali sane malakar antuk kain tenun tradisional khas Bali marupa endek kaaptiang prasida dados karya sane kakaryanin miwah kakawitin saking kayun hening madasar kalascaryan, mawinan prasida ngardi tetujon saking pamargin fashion show puniki, minakadi nguningayang karya lokal sepisanan prasida ngadautin karya desainer sane salanturnyane prasida kaanggen  olih krama lokal, pamekas anggen pepayasan sane becik listu ayu sane mawit saking Bali, mawinan ring  salanturnyane Bali prasida dados pusat mode sane kakasubang ring jagate,” baos Ketua Dekranasda Bali Ny. Putri Koster.

 Ny. Putri Koster ngawewehin mangda parikrama pameran miwah fashion show antuk parade produk busana puniki nglantur kawentenanipun. Parikrama taler maprakanti sareng makudang angga sane mapaiketan, mawinan prasida tumbuh saha nglimbak kawentenane, minakadi ring pemanfaatan tenaga kerja, mawesana becik ring perputaran ekonomi wiadin majeng kasukertan kramane.

"Mawit mangkin ngiring makarya baju wiadin busana sane prasida kaanggen  olih krama Bali, pamekas ring Bali, Indonesia wiadin dunia, nenten kaanggen ri kala wenten fashion show kewanten nanging taler prasida rauh ring pasar masyarakat menengah, atas wiadin masyarakat bawah. Busana sane kakaryanin mangda nenten busana formal kewanten, nanging prasida taler makarya sane semi formal,” baos Ny. Putri Koster.

Kepala Dinas Perindustrian dan Perdagangan Provinsi Bali, I Wayan Jarta sane taler ngrauhin parikrama maosang yening pagelaran busana sane ngunggahang unteng "Adi Warna Wastraloka" puniki jagi misuguhang 9 rancangan busana adat pengantin Bali karya Turah Mayun miwah Naluri Manca wiadin 140 rancangan busana modern malakar kain tenun tradisional antuk saking 14 desainer, antuk akeh uleman 1.300 diri.

Sajeroning nyokong pamargin parikrama, Dinas Perindustrian dan Perdagangan Provinsi Bali maprakanti sareng instansi sane mapaiketan minakadi  Dinas Perhubungan, Satpol PP, Dinas Kehutanan dan Lingkungan Hidup, Dinas Kominfos Bali, Protokol miwah intansi sane tiosan.(Rls/Btnc) 


TAGS :

Komentar