Gubernur Koster Ngambil Sumpah lan Janji PNS Pemprov Bali Melarapan Teleconference
- 13 April 2020
- 17:04 WITA
- News
DENPASAR Balitopnews.com - Gubernur Bali Wayan Koster ngelantik lan ngambil sumpah/ janji PNS ring wewidangan Pemerintah Provinsi Bali melarapan media elektronik utawi teleconference ring ruang rapat Jana Kertih Kantor Badan Kepegawaian Daerah Provinsi Bali, Denpasar, Soma, (12 April 2020)
Indik punika nganut ring Surat Edaran BKN No. 10/SE/IV/2020 indik Pelantikan dan Pengambilan Sumpah/Janji PNS atau Sumpah/Janji Jabatan melarapan media elektronik/teleconference ring Masa Status Keadaan Tertentu Darurat Bencana Wabah Penyakit Akibat Virus Corona.
Manut ring uger-uger Pasal 39 PP Nomor 11 warsa 2017, kabaosan calon PNS sedurung kajodi dados PNS patut kaambil sumpah/ janji.
“Santukan sampun galahne kalantik pare PNS santukan kawentenan sane nenten becik kemargiang antuk online,” baos Gubernur.
Dane ngaptiang pare PNS anyar puniki presida mekarya sumeken trepti, urati, patut nincapan profesionalisme lan ngemargiang swadharma sane becik.
“Titiang ngaturang angayu bagya majeng pare pegawai negeri sipil sane wau lan taler sane munggah pangkat, punika prestasi sane patut kaapresiasi,” baos Gubernur Koster.
766 diri pemilet pelantikan rauh saking CPNS formasi warsa 2018 minakadi 296 diri tenaga kesehatan lan 470 diri tenaga kependidikan. Tiosan punika, pengambilan sumpah/ janji taler kasarengin 6 diri lulusan IPDN lan 10 diri PNS tiosan sane durubg kaambil sumpah/janjine, dadosne makasami wenten 782 diri pemilet.
Tiosan malih Gubernur Bali, unteng pengambilan sumpah wantah karauhin limang diri sane ngewalinin PNS sane ngewalinin limang agama, rohaniawan, Sekretaris Daerah Dewa Made Indra, Kepala BKD Provinsi Bali Ketut Lihadnyana, Kepala BPSDM Provinsi Bali I Gede Darmawa lan panitia akidik.
Pemilet tiosan nyarengin melarapan antuk aplikasi video conference ring 80 genah ring Bali. Nyabran genah sampun kapastikayang semakeh nyane 15 diri pemilet. Pemilet sami duk kaambik sumpah/ janji PNS puniki taler patut ngigumin protokol kesehatan sekadi ngangge masker lan nenten menampekan (physical distancing).
Sekda Dewa Indra maosan CPNS sane sampun galahne kalantik mangda gelis kalantik.
“Indik puniki nenten presida kaungkuran santukan yening lintang saking kalih warsa nenten kalantik kaucap iraga iwang olih awig-awig,” baos dane sane dumun pinaka Kalaksa BPBD Provinsi Bali.
Manut dane, yadiastun ring kawentenan nambakin COVID 19, pemargi pelantikan presida kalaksanayang manut protokol sane sampun katetepan BKN.
“Pelantikanne wantah simbolis antuk tetep saling maedohan utawi physical distancing raris PNS sane tiosan ring genah suwang-suwang nyarengin pelantikan antuk online. I Wau iraga sareng sami nyingakin ring kelir dane nyarengin ring genahne suwang-suwang antuk trepti,” baos Sekda Dewa Indra sane taler Ketua Harian Gugus Tugas Percepatan Penanganan Covid-19 ring Provinsi Bali.
Ring galah punika taler kaeduman SK munggah pangkat periode 1 April 2020 majeng 510 PNS ring wewidangan Pemerintah Provinsi Bali sane kawalinin Kepala Dinas Kesehatan Provinsi Bali dr. Ketut Suarjaya. (Balitopnews.com/md/rls)
Komentar