Bali Pacang Ngawewehin 2 Lab Ngagelisin Pikolih Uji Swab-PCR
- 17 Juni 2020
- 17:06 WITA
- News
DENPASAR, Balitopnews.com. Sekretaris Daerah Provinsi Bali pinaka Ketua Harian Gugus Tugas Percepatan Penanganan Covid-19 Provinsi Bali Dewa Made Indra mimpin parum optimalisasi laboratorium lan ngagelisan pikolih uji Swab-PCR sareng instansi makilitan melarapan daring, Buda 17 Juni 2020.
Dewa Indra maosan 3 sasih memargi gering corona durung taler nyihnayang pacang ical saking jagate. Yening kacingak saking makehne, kasus Covid-19 nincapan sane rauh saking transmisi lokal. Indik puniki nyihnayang kantun makeh krama sane kirang ngemargiang protokol kesehatan.
Antuk tetujon ngicen ayah-ayah sane becik utama nyane nguningan pikolih swab mabasis PCR saking laboratorium majeng pasien sane pungkuran puniki memargi alon santukan kasus sane ngangsan nincap, Ketua Harian Gugus Tugas Percepatan Penanganan Covid-19 Provinsi Bali Dewa Made Indra nguningan benjangan pacang wenten 2 rumah sakit sane kajangkepin laboratorium uji Swab-PCR inggih punika Rumah Sakit Bali Mandara lan UPTD. Balai Laboratorium Kesehatan Provinsi Bali, sane pacang ngawit kemargiang ring pengawit Juli sane rauh.
Antuk mawewehne kawentenan laboratorium uji Swab-PCR ring Bali, kaaptiang presida nincapan gelisne tim medis ngamedalan pikolih uji Swab-PCR sane raris taler ngicen ngangsan gelisne sirkulasi ayah-ayah majeng pasien utama nyane sane nedeng kakekeb.
"Mawewehne kasus Covid-19 ring Bali sampunan kantos ngicalan semangat. Sakemaon sampunan taler santukan kalintang gupuh raris lali ring angga. Becikne iraga nyimbangan swadharma, amongan lan taler kawentenan dewek mangda setata kenak antuk ngedum galah tenaga medis mejaga ngeterang Covid-19 sareng kantine. Tiosan saking punika mangda gelis proses rauh pikolih uji Swab-PCR majeng pasien, form input lan form sesaduan mangda satu," Dewa Indra ngawewehin.
Kepala Dinas Kesehatan Provinsi Bali dr. Ketut Suarjaya maosan saking 3 sasih pungkuran (April, Mei lan Juni) kemanten makasami conto sane sampun kauji lab 21.723 antuk tetincap kasus saking 2 sasih sane rauh saking traching contacts. Dadosne benjangan dane madue parencana strategis ring ngelisan pikolih laboratorium antuk sasaran alur pasien medal ngeranjing rumah sakit lan ngeterang kasus anyar presida kaoptimalisasi.
Memargine 3 laboratorium sane wenten antuk kapasitas 24.640 asasih (RSUP Sanglah 3 alat antuk presida uji Swab-PCR 600 serahina, RSPTN Udayana 2 alat sane presida uji Swab-PCR 200 serahiba lan Warmadewa 1 alat sane presida uji Swab-PCR 60 serahina ngerauhan pare tenaga medis ring rumah sakit ngunggahang sistem priority (gutamayang-red) majeng pasien kantun katambanin kakekeb, ODP, PMI lan ABK sane wau rauh miwah sang malelungan sane kaucap emergency utawi kedinasan.
Nyaksi ngangsan makeh transmisi lokal sane memargi ring makudang genah (kabupaten/ kota) rumah sakit type B benjangan kaapti medue laboratorium uji Swab-PCR newek antuk sarana prasarana lan sumber daya manusia sane luwih taler patut medue dokter spesialis patologi klinik.
Ring galah pungkuran kabupaten Badung pacang ngelaksanayang rapid tes massal ring Desa Ayunan, Mengwi. Indik puniki kemargiang anggen munggel rantai pengelalah lan pengelimbak virus corona ring kramane. Antuk rapid tes krama pacang uning indik kawentenan dewekne kantos presida katambakin olih angga sami.
Ring penyineb paruman rapat Dewa Made Indra taler nunas mangda nenten wenten conto sane meneng. Yening wenten matumpuk conto santukan makehne pasien sepatutne tenaga medis inucap sane matugas patut ngingsiran conto ke laboratorium tiosan, kantos pikolih uji Swab-PCR nenten pacang suwe. Indik puniki taler matetujon mangda nenten ngerauhang pikobet ring hilir utama nyane genah ngekeb. (gix)
Komentar