• Home
• News

Webinar Visit Indonesia Tourism Officer (VITO) Australia ,Cok Ace Nguningan Bali Ngelaksanayang CHS Protokol Kesehatan Baga Pariwisata

• 17 Juni 2020
• 21:06 WITA
• News

DENPASAR, Balitopnews.com - Wakil Gubernur Bali Tjokorda Oka Artha Ardana Sukawati micayang pemahbah apisan dados juru raos ring acara Webinar Kemenparekraf sareng Visit Indonesia Tourism Officer (VITO) Australia sane mamurda ‘Re- Inventing Bali What will be better in Bali after Covid’, ring Ruang parum Wagub Bali, Buda 17 Juni 2020.

Wagub Bali nguningan mangkin jagate kantun meweh santukan olih gering Covid-19, taler ring Bali. Bali ring pengawitne nenten wenten kasus kabaos positif kantos raris ring pinanggal 4 Maret kasus positif Covid-19 ngawit wenten ring Bali. Saking punika pasien positif ring Bali nincapan kantos 741 kasus (manut cakepan pinangg 14 Juni 2020), antuk sane kenak 63, 9 %. Pasien positif ring Bali wantah 1, 9% saking angka positif nasional antuk sane padem santukan Covid-19 dahat kedik.

Bali setata maupanaya nambakin pengelimbak Covid-19 antuk ngelaksanayang sinergitas minakadi sareng angga sane wenang lan kasarengin olih kauratian kramane. 

Wagub Cok Ace ngawewehin wenten 3 indik utama saking 11 kriteria sane katetepan pinaka sikut uger-uger majeng awewidangan mungkah wewidanganne indik ngeruruh ekonomi. Sinalih tunggilne nedunan bebaosan positif kantos 50 % suwe nyane 14 rahina saking makasami pasien kaorti positif sedurungne. 

Sekadi wewidangan tiosan ring Indonesia, Bali taler sampun ngelaksanayang makudang-kudang strategi antuk upanaya ngirangin pengelimbak Virus Covid 19. Tiosan ngelaksanayang sinergitas sareng makasami jejaring sane wenten, Bali taler ngemargiang Gugus Tugas Gotong Royong sane kasarengin pecalang desa adat ring Bali, raris pare pecalang puniki sane nureksa arus medal ngeranjing kramane miwah nyaga kauratian krama nganutin protokol kesehatan.

Cok Ace sane taler Ketua PHRI Bali puniki ngawewehin Pemerintah Provinsi Bali taler ngelaksanayang panureksan reket ring genah-genah ngeranjing Bali. Sinalih tunggilne antuk pisarat ngamolihang PCR negatif majeng penumpang pesawat terbang sane pacang rauh ke Bali. Tiosan punika penumpang pesawat taler patut nagingin Health Alert Card (HAC) sane nyihnayang indik kesehatan penumpang miwah krama sane presida katakenin duk emergency.    

Ring mitigasi pasien rikala gering Covid 19, Pemerintah Provinsi Bali sampun nyiagayang 14 rumah sakit sane sayaga lan wikan ngeterang pasien Covid-19. Rumah sakit puniki taler kajangkepin antuk ruang isolasi manut standar kesehatan sane wenten. Nenten wantah punika, Bali taler medue 3 laboratorium inggih laboratorium Sanglah, Warmadewa lan Udayana sane presida ngelaksanayang lintang saking 500 PCR test serahinane. 

Yening nyingak saking sapangrauh wisatawan dura negara, ring warsa 2019 sapangrauh wisatawan Australia ke Bali dahat makeh lan Australia pinaka pasar sane ageng majeng Bali. Munggwing asapunika Cok Ace dahat ngaptiang mangda wisatawan Australia presida mewali ngerauhin Bali.

Saking baga pariwisata, Bali sampun nyiagayang protokol kesehatan ring makasami baga kepariwisataan sane nguleng ring 3 indik utama inggih punika Cleanliness, Health and Safety (CHS). Antuk ngemargiang CHS puniki kaaptiang Bali pacang mewali presida dados puser pariwisata jagat yening benjangan Bali jagi kabungkah majengk pariwisata. 

Indik sane pateh taler kauningin olih Deputi Bidang Pengembangan Pemasaran II Kemenparekraf Nia Niscaya, manut dane pemerintah sampun nyiagayang pemargi saking ngunggahang CHS ring Bali, raris Indonesia Tourism Development Corporation (ITDC) Nusa Dua pacang dados tatulad ngemargiang CHS. Penyanggra ngemargiang CHS setata kemargiang raris kelanturang antuk ngicen ajah-ajah CHS majeng buruh pariwisata miwah simulasi pemargine miwah benjangan kemargiang ring makudang destinasi wisata sane wenten. (gix)