Matemu Menteri Pariwisata lan Ekonomi Kreatif, Gubernur Koster Negesan Bali Durung Mungkah Pariwisata
- 17 Juni 2020
- 22:06 WITA
- News
GIANYAR, Balitopnews.com - Gubernur Bali Wayan Koster negesan Bali durung mewali mungkah kran pariwisata napi malih anggen sapangrauh turis internasional. Santukan, Bali mamgkin kantun nguleng ring upanaya ngagelisin gering Covid-19 napialih pungkuran puniki kasus transmisi lokal makehan.
Indik punika kaodar Gubernur Koster duk nampa kunjungan kerja Menteri Pariwisata lan Ekonomi Kreatif (Menparekraf) RI Wishnutama Kusubandio ring Restoran Bebek Tepi Sawah, Ubud, Gianyar, Buda (17 Juni 2020)
Yadiastun asapunika manut Gubernur Koster, Pemprov Bali ngarencanayang makudang pemargi protokol nyanggra kahuripan anyar (new normal) taler parencana malih pidan lan sapunapi ngemargiang protokol duk kabungkahne baga pariwisata.
“Nyaksi kawentenang ring Bali, manut tetincap Covid–19 sane kantun dinamis, kantun makeh ring makudang wewidangan ring Bali, raris saking sisi kesehatan titiang sareng tim Gugus Tugas Percepatan Penanganan Covid – 19 (Provinsi) nyaksi lan ngambil pemargi Bali sepatutne durung patut lan durung sutrepti ngunggahang protokol kesehatan antuk konteks baga pariwisata. Sakemaon sampun kasiagayang pemargi protokol kesehatan yening baga pariwisata kabungkah," tegea Gubernur saking desa Sembiran Buleleng puniki
Kaabih Wagub Tjokorda Oka Artha Ardana Sukawati lan Sekda Provinsi Bali Dewa Made Indra, Gubernur Koster nguningan indik parencana baga-baga kabungkah sektor pariwisata Bali. Sinalih tunggil ngawit 9 Juli pariwisata pacang kabungkah utamane wantah anggen ngemargiang krama lokal Bali ring makudang baga. Yening kawentenang sutrepti, raris kalanturang ring Agustus majeng wisatawan domestik nusantara lan majeng wisatawan internasional karencanayang kabungkah ring September.
“Malih pisan titiang negesan, puniki wau parencana boya galah pasti pacang kalaksanayang. Dados utawi nentenne puniki kalaksanayang pacang ngandelang kawentenan lan dinamika tetincap Covid–19 ring sekalane, utamane transmisi lokal ring Bali. Titiang dahat ngungguhang prinsip alon-alon indik pariwisata, lan Bapak Menteri taler medue pikayun sane pateh. Sampunan kantos dados pikobet kaping kalih sane pastika meweh kaenterang," Gubernur Koster majeng para juru warta.
Ring galah mangkin Pemprov Bali miwah Pemkab/ Pemkot se-Bali manut Gubernur Koster satya nguleng ring ngeterang pengelimbak gering kantos kawentenanne kaucap yukti-yukti becik lan nenten malih wenten transmisi lokal.
"Asiki indik mabuat sane mangkin sane patut kalaksanayang inggih punika sapunapi iraga nangun kawentenan Bali sane yukti-yukti becik, sutrepti saking Covid–19. Lan punika ngandelan kauratian kramane ngemargiang protokol nambakin gering puniki. Pare pemilet jasa pariwisata ten mamengkung, krama ten mamengkung, puniki patut katreptian sinarengan mangda Bali gelis sutrepti lan pemerintah taler sampun nyiagayang pemargine,” pinunas Gubernur.
Tiosan raris Menparekraf RI Wishnutama Kusubandio nyumbungab majeng penyanggra protokol nyanggra pemargi kahuripan anyar sane sampun karencanayang lan kasiagayang olih makasami pemerintah daerah ring Bali lan pare pemilet baga pariwisata, sane kasaksiang sekantun kunker. Pateh sareng Gubernur Bali, Menteri sane medue pungkusan Wishnutama puniki taler nguningan mabuatne kasutreptian Bali antuk setata urati.
"Titiang nyumbungan antuk kasiagayang Bali, janten patut sampun sekadi punika. Kasiagayang saking suwe, indik ngunggahang duk malih kabungkah. Iraga patut uning ngewangun kapercayan wisatawan, pariwisata punika bisnis kepercayan, iraga patut presida ngewangun lan nangian kasutreptian pare pemilet lelungan wisata duk wenten ring Bali. Nah, punika pengelantur sedurung kabungkah anggen lokal punika iraga review malih sinarengan,” tegesne apisanan nunas pare pemilet jasa wisata anggen nukung program sami sane karencanayang pemerintah rikala ngunggahang protokol nambakin covid-19.
Tiosan malih, Kapolda Bali Irjen Pol Petrus R. Golose nukung makasami program sane kamargiang pemerintah pusat lan daerah.
“Titiang sayaga ngabih pemargi program-program sane kalaksanayang jajaran pemerintah pusat lan daerah," sineb dane. (Gix)
Komentar