Menteri Pariwisata Ekonomi Kreatif Apresiasi Kesiapan Bali Nangun Kepercayan Publik ring Baga Pariwisata Ekonomi Kreatif
- 18 Juni 2020
- 12:06 WITA
- News
GIANYAR, Balitopnews.com - Menteri Pariwisata lan Ekonomi Kreatif Wishnutama Kusubandio nyumbungan kasiagayang Pemerintah Provinsi Bali rikala nangun kepercayan publik ring sektor pariwisata lan ekonomi kreatif. (17 Juni 2020)
"Sektor pariwisata pinala bisnis sane ngunggahang kepercayan kantos raris disampun wisatawan percaya jagi rauh, mawisata antuk sutrepti ring Bali," baos Menparekraf Wishnutama Kusubandio duk matemu sareng Gubernur Bali I Wayan Koster ring Restoran Bebek Tepi Sawah, Ubud, Buda (17 Juni 2020)
Wishnutama taler nyumbungan Pemprov Bali sane sampun siaga ngemargiang protokol kesehatan ring wewidanganne, sakemaon dane taler negesan protokol kesehatan patut kasiagayang dumun mangda polih ngewangun kepercayan publik anggen mewali mawisata ring Pulau Dewata.
Duk kunjungan kerja ring Bali, Menparekraf kaabih Gubernur Bali I Wayan Koster, Wakil Gubernur (Wagub) Bali Tjokorda Oka Artha Ardhana Sukawati (Cok Ace), Kapolda Bali Irjen Pol Dr Petrus Reinhard Golose, Dirut ITDC Abdulbar M. Mansoer, Managing Director The Nusa Dua I Gusti Ngurah Ardita, miwah jajaran pimpinan saking Kementerian Pariwisata lan Ekonomi Kreatif.
Menparekraf taler ngogokan Pemprov Bali ngelaksanayang tigang undag mungkah makudang baga ring Bali. Disampun undag kapertama mungkah kaucap becik antuk ngemargiang protokol kesehatan sane makeret. Dane ngaptiang undag selanturne presida gelis kalintangin.
"Munggwing asapunika titiang nunas majeng pare pemilet pariwisata lan ekonomi kreatif mangda gelis ngelaksanayang punika. Kantos makasami proses tahapan presida kareview lan iraga presida gelis ngeranjing ring undag-undag selanturne," ucap dane.
Ring galah sane pateh Gubernur Bali I Wayan Koster negesan, dane sampun nyiagayang tigang tahapan anggen ngemargiang protokol kesehatan nyanggra kenormalan anyar. Undag kapertama pacang kelaksanayang ring 9 Juli 2020.
"Titiang marencana yening kawentenanne becik 9 Juli pacang ngawit kabungkah anggen mageginan ring Bali ring makudang baga setiosan pendidikan lan pariwisata," baos dane.
Undag kaping kalih pacang kalaksanayang ring Agustus 2020 yening undag kapertama becik lan sutrepti. Raris pacang kelanturang ke undag kaping kalih majeng wisatawan nusantara. Disampun undag kaping kalibh memargi becik kelanturang ke undag kaping tiga antuk ngawit mungkah destinasi majeng wisatawan mancanegara ring September 2020.
"Sakemaon niki wantah parencana boya galah ngemargiang. Dados utawi nenten manut saking tetincap kawentenan lan dinamika COVID-19 utamane tetincap transmisi lokal ring Bali," teges dane.
I Wayan Koster taler negesan, indik punika sampun manut pewarah Presiden lan Menparekraf indik reopening Bali mangda kelaksanayang alon-alon dan nenten kadropon.
"Sampunan kantos wenten gering undag ping kalih ring Bali, yening iraga kedropon. Santukan punika bacang baya lan dahat abot," dane matur.
Gubernur Bali malih negesan kawentenan gering COVID-19 ring Bali kantun dinamis. Kantos rahina mangkin, transmisi lokal jakti akeh ring makudang wewidangan sekadi Denpasar, Badung lan Gianyar.
"Munggwing saking sisi kesehatan titiang nyaksi Bali durung becik anggen ngelaksanayang normal anyar ring baga pariwisata," sineb dane. (Gix)
Komentar