Cok Ace : Protokol Seni Mangda Galang majeng Sami
- 18 Juni 2020
- 20:06 WITA
- News
DENPASAR, Balitopnews.com - Wakil Gubernur Bali Tjokorda Oka Artha Ardhana Sukawati dados juru raos ring seminar Menata Ulang Format Gelar Seni Pertunjukan Masa Pandemi Covid-19 Tahun 2020, ring Gedung Citta Kelangen, ISI Denpasar, Respati 18 Juni 2020.
Wagub Cok Ace sane taler Guru Besar ring ISI Denpasar, ngemanahin patut mligbagin sapunapi konsep balih-balihan sane kalaksanayang ring masan gering yening benjangan pariwisata Bali pacang malih kabungkah yadiastun antuk maundag.
"Santukan saking rauh covid-19 puniki wenten makudang protokol kesehatan sane patut kaigumin. Munggwing asapunika antuk kesenian sane encen ring sasolahanne ngerauhang krama akeh lan antuk pepayasan sane patut kaanggen, puniki patut kabligbagin sareng," ucap dane.
Manut Cok Ace, ISI Denpasar presida nangian tim alit anggen maosan protokol kesehatan sane pacang kemargiang ring balih-balihan kantos format protokol kesehatan punika presida kaanggen olih pariwisata mangda dados baga saking ngemargiang protokol kesehatan sane wenten ring wewidanganne. Kantos protokol seni punika presida kaenterang olih para sang sane wikan mangda setata ngutamayang taksu saking seni punika
"Dadosne protokol seni nenten kaenterang olih pariwisata, sakemaon protokol seni kaentetang olih sang sane wikan ring seni," baosne.
Munggwing asapunika Wagub Cok Ace nunas daging pikayun saking pare pemilet seni, utamane indik protokol kesehatan ring kesenian balih-balihan.
“Meled manah titiang tontonan sane kaicen medue taksu sakemaon taler nenten mayanin, penonton an pare pregina taler aman, dadosne ngiring kayunin niki sinarengan lan sumeken," sineb dane.
Tiosan raris budayawan Prof. Dr. I Wayan Dibya nguningan format seni balih-balihan mangda gelis kepanggih, santukan saking kawentenan gering Covid-19 sampun madingan makudang geginan sane sampun memargi ring jagat seni, utamane ring seni balih-balihan.
Manut dane seni balih-balihan taler pinaka seni komunikasi pemilet lan penonton. Munggwing asapunika yening komunikasi puniki kaicalan taksu seni punika pacang ical.
Profesor Dibya nguningan makudang pikayun indim format anyar ring seni balih-balihan, kapertama format seni balih-balihan kantun kelaksanayang live antuk protokol kesehatan sane makeret.
Kaping kalih, ring kawentenan punikk materi saking kesenian punika mangda kaobah kedik sekadi ring sasolahan kecak, calonarang lan tiosan mangda manut protokol kesehatan.
Kaping tiga, indik sasolahan presida nyekala utawi virtual kantos raris kantun wenten komunikasi sareng pare penonton.
Munggwing asapunika dane ngaptiang seminar puniki presida ngerauhin pikayun becik rikala nyurat format anyar seni balih-balihan ring masan gering covid-19.
Rembug puniki taler ngerauhang juru raos Assitant Show and Entertaiment Manager Bali Safari and Marine Park Kadek Agus Ardana, miwah makudang angga sane pinaka para sang sane wikan ring kesenian sane taler ngicen pikayun ring rembug punika. Tiosan punika taler kelaksanayang peluncuran buku “Purana Seni Perjalanan Panjang Berliku” olih Rektor ISI Denpasar Prof .Dr. I Gede Arya Sugiartha.(gix)
Komentar