Dewa Indra : Pisaarat Sopir Truk Ngeranjing ke Bali Mangda Makta Suket Rapid Tes Manut Sareng SE Kepala BNPB Pinaka Ketua Pelaksana GTPP Covid-19 Nomor 7 warsa 2020 pinanggal 6 Juni 2020, lan Surat Dirjen Perhubungan Laut Nomor : Um.002/39/18/OJPL/2020
- 19 Juni 2020
- 12:06 WITA
- News
DENPASAR, Balitopnews.com -Ramia kaorti ring media, nyatusan sopir logistik sane pacang nyeberang ke Bali mrotes ring Terminal Sritanjung, Kecamatan Kalipuro, Banyuwangi. Dane mrotes awig-awig indik pisarat nyangkepin sewalapatra kesehatan marupa rapid test sane karasa mael.
Pare sopir maambulan lan nenten kayun nyeberang ke Bali. Dane wantah melinggih lan giak-giak mrotes awig pemerintah Provinsi Bali sane nyaratan pare sopir logistik mangda makta sewalapatra rapid test yening kayun ngeranjing ke Bali. Pare sopir nekepin genah medal Terminal Sritanjung pinaka cihna protes.
Nyawis indik punika, Sekda Provinsi Bali Dewa Made Indra maosan indik sesikut pisarat nyihnayang sewalapatra pakeling uji rapid test antuk pikolih nenten reaktif majeng sang sane malelungan ring dalam negeri pinaka awig nasional sekadi sane mungguh ring Surat Edaran Kepala Badan Nasional Penanggulangan Bencana. Pinaka Ketua Pelaksana Gugus Tugas Percepatan Penanganan Covid-19 Nomor 7 warsa 2020 pinanggal 6 Juni 2020 lan sewalapatra Dirjen Perhubungan Laut Nomor : Um.002/39/18/OJPL/2020 pinanggal 22 Mei 2020.
Manut Ketua Harian Gugus Tugas Percepatan Penanganan (GTPP) Covid-19 Provinsi Bali puniki Pemerintah Provinsi Bali ring upanaya ngenterang penyebaran Covid-19 taler ngunggahang awig-awig sane pateh sareng awig-awig nasional, inggih punika ngemargiang pisarat bebas Covid-19 majeng sang sane malelungan nyujur Bali.
"Majeng sang sane malelungan ke Bali sane ngangge moda transportasi udara mangda nyihnayang sewalapatra pakeling uji test PCR antuk pikolih negatif. Majeng sang sane malelungan nyujur Bali ngangge transportasi darat/laut mangda nyihnayang sewalapatra pikeling uji rapid test antuk pikolih nenten reaktif," baosne
Pejabat saking Buleleng puniki maosan, indik ngemargiang awig Pemerintah Provinsi Bali puniki sampun kakawitin nyobyahang melarapan media cetak, online, pemasangan baliho lan ngirim surat majeng asosiasi angkutan logistik/ manajemen perusahaan angkutan darat miwah marerembug melarapan parum-parum sareng angga-angga sane patut ring Pelabuhan Ketapang Banyuwangi.
"Pisarat sewalapatra pikeling rapid test antuk pikolih nenten reaktif ring Pelabuhan Penyeberangan Ketapang-Gilimanuk sampun kalaksanayang olih GTPP Covid-19 Provinsi Bali masikian sareng GTPP Covid-19 Kabupaten Jembrana saking April 2020," ucap Dewa Indra.
Yadiastun kaangkenin, pemargi awig punika kantun ngangge standar ganda. Sang sane malelungan antuk ngangge pelinggihan newek lan angkutan umum, rapid testne kemargiang newek. Sakemaon majeng angga pelinggihan angkutan logistik (sopir lan kernet-red), rapid testne kemargiang olih GTPP Covid-19 Provinsi Bali masikian sareng GTPP Covid-19 Kabupaten Jembrana.
"Angga pelinggihan logistik kautamayang santukan mikayunin indik kasutreptian ngebekin sarana logistik majeng masyarakat, miwah durung kasadiayang rapid test newek ring Pelabuhan Ketapang," hatur dane.
Dewa Indra negesan, rapid test majeng angga pelinggihan logistik ring pelabuhan penyeberangan Ketapang Gilimanuk olih GTPP Covid-19 Provinsi Bali lan GTPP Covid-19 Kabupaten Jembrana saking madyaning April kantos pinanggal 17 Juni 2020 sampun nelasan 44.637 pcs rapid test.
"Sami awig indik pisarat malelungan ring masan gering Covid-19 puniki nyaratan krama sami sani malelungan mangda nyangkepin angga antuk sewalapatra test PCR antuk pikolih negatif /rapid test antuk pikolih nenten reaktif lan test punika kemargiang newek olih sang sane malelungan, boya kaayahin utawi kaicen miwah kasadiayang olih GTPP Covid-19," sineb Dewa Indra.(gix)
Komentar