Nambakin Ngejimbar Transmisi Lokal, Disperindag Bali Nureksa Pasar Tradisional
- 19 Juni 2020
- 14:06 WITA
- News
DENPASAR,Balitopnews.com- Antuk tetujon nambakin ngangsan jimbarne pengelimbak COVID-19 saking transmisi lokal, Dinas Perindustrian lan Perdagangan (Perindag) Provinsi Bali nureksa makudang pasar tradisional ring Kota Denpasar, Sukra (19/6/2020). Panureksan puniki matetujon ngemastikayang protokol kesehatan sekadi nganggen masker, kawentenan genah ngewajik tangan lan physical distancing memargi becik.
Tim sane kapimpin olih Kepala Dinas Perindag I Wayan Jarta ngawit panureksan ring Pasar Desa Adat Penatih. Ring pasar puniki, tim ngemangguh protokol kesehatan nambakin COVID-19 sampun memargi becik. Ring genah ngeranjing, pengemong pasar masang bilik disinfektan sane patut kalintangin olih krama sane ke pasar. Tiosan malih protokol taler kemargiang majeng pare pedagang sekadi ngangge masker, selop tangan lan makudang pedagang nyangkepin angga antuk face shield. Lintangan malih, pengemong pasar taler ngunggahang sistem kasutrepti maundag antuk masang wewates plastik anggen ngewatesin pedagang lan sang sane matumbasan. Antuk tetujon nganutin protokol maedohan, pedagang ring amben kakesah olih garis pewates. Nenten wantah asapunika pengemong pasar sering ngontakan rekaman sane medaging tetulad indik COVID-19 lan upanaya nambakin.
Kepala Pasar Desa Adat Penatih Made Arta sane nampa Tim Disperindag Bali maosan saking ngelimbakne COVID-19 ring Kota Denpasar, dane sampun ngunggahang protokol sane makeret ring wewidangan pasar. Kaangkenin, upanaya anggen nguratiang krama lan pemilet utsaha ring pasar nenten aluh. Dumun makeh sane maboya santukan awigne meweh lan ngerauhang nenten inang. Sakemaon kasuwen rase eling mentik lan kramane urati ngelaksanayang protokol kesehatan utamane ring wewidangan pasar. Pasar Desa Pakraman Penatih wenten 87 pedagang, jam operasional ngawit galah 05.00 wita. Rikala gering COVID-19, pengemong pasar ngelaksanayang 4 penyemperotan disinfektan nyabran wuku.
Kawentenan sane pateh taler kepangguh ring genah kaping kalih sane katureksa Tim Disperindag Bali yaitu Pasar Rakyat Kerta Waringin Sari Desa Angabaya. Pasar sane sampun ngamolihang predikat SNI puniki ngunggahang protokol makeret majeng krama lan pedagang pasar. Duk ngeranjing pasar, krama patut ngangge masker lan ngelintangin bilik disinfektan. Pare pedagang taler ngunggahang protokol sane makeret. Tiosan ngangge masker lan selop tangan, makudang pedagang taler ngangge face shield. Pengemong pasar ngenterang genah pedagang kantos nganutin standar protokol kesehatan COVID-19.
Pateh sareng sane kaodar Kepala Pasar Desa Adat Penatih, Kepala Pasar Rakyat Kerta Waringin Sari I Made Sukrasena maosang indik nangun kauratiang krama ring wewidangan pasar maproses. Santukan kasengguh ngamewehin, dumun makeh sane memengkung ten ngangge masker.
"Sakemaon pungkuran dane sampun urati. Napi malih pungkuran kasus transmisi lokal ring wewidangan pasar ngemakehan dane ngangsan urati," ucapne.
Kepala pasar ring pasar makakalih punika nyumbungan lan nyuksemayang antuk sapangrauh Tim Disperindag Bali. Indik puniki pinaka cihna kauratian sane ngardi dane egar.
Saking panureksan punika, Kadis Perindag Provinsi Bali Wayan Jatra nyaksi makakalih pasar tradisioanal punika sampun becik ngemargiang protokol kesehatan nambakin COVID-19. Manut Jarta, panureksan puniki makilitan antuk tren ngemakehan transmisi lokal ring klaster pasar tradisional sane memargi pungkuran. Jarta ngawewehin, pemargi puniki pinaka cihna dukungan majeng Gugus Tugas Percepatan Penanganan COVID-19 Provinsi Bali sane maupanaya nambakin gering puniki. Jarta nyumbungan inovasi sane kemargiang ring majakalih pasar tradisional puniki inggih punika antuk masang plastik pewates pedagang lan sane matumbasan. Manut dane pemargi punika becik lan kaaptiang presida nambakin COVID-19.
Ring galah punika dane taler ngaptiang mangda pengemong pasar nangiang satgas penanganan kauratian ngemargiang protokol kesehatan COVID-19.
“Yening sampun dados satgas, dane pacang ngangsan purun ngelemekin yening wenten sane memengkung,” ucapne.
Manut dane, upanaya nambakin COVID-19 rauh saking eling makasami angga ring wewidangan pasar.
“Majeng pedagang yening ngarsayang sungkan sampunan maksa angga meadolan. Kenten taler konsumen sane matumbasan taler nganutin protokol kesehatan sekadi ngangge masker lan ngewasuh tangan ring genah sane kasadiayang. Untengne, rauh bersih medal taler bersih kantos inang maka sami,” dane ngawewehin.
Ring panureksan puniki Kadis Perindag Bali nyukserahang 100 pcs masker majeng suwang-suwang pasar. Panureksa pasar tradisional pacang sering kemargiang mangda COVID-19 presida katambakin. (Gix)
Komentar