Dewa Indra Teges Pemprov Sayaga Nukung Rapid Test Massal ring Bali
- 19 Juni 2020
- 22:06 WITA
- News
DENPASAR, Balitopnews.com - Pemargi rapid test massal lan makeh pinaka sinalih tunggil pemargi nambakin Covid-19 sane kamanah becik santukan presida ngicen gegambaran pare pasien lan presida gelis katambanin.
Asapunika kaodar olih Sekda Provinsi Bali Dewa Made Indra duk parum evaluasi ‘Pengendalian Covid-19 pada Cluster Baru’ antuk virtual melarapan aplikasi zoom meeting, ring Denpasar, Sukra (19 Juni 2020).
“Utamane ring cluster-cluster anyar genah transmisi lokal sane ngangsan makeh kepanggih pungkuran puniki,” tegesne.
Manut dane, saking pinanggal 4 Juni wenten kekisid trend paweweh kasus positif Covid-19 ring Bali. Santukan saking pinanggak punika kasus transmisi lokal ngemakehan ngaonan paweweh kasus sedurungne sane makehan olih imported case kabakta olih PMI sane wau rauh ring Bali.
“Persentase paweweh kasus transmisi lokal saking galah punika makehne 63,91persen lan ngangsan ngemakehan," hatur dane ring parum sane taler karauhin olih pare Sekda saking Kota Denpasar, Kabupaten Badung, Kabupaten Buleleng, Kabupaten Klungkung lan Kabupaten Gianyar, miwah pare gugus tugas saking suwang-suwang kabupaten/kota inucap.
Sekda sane taler pinaka Ketua Harian Percepatan Penanggulangan Covid-19 ring Bali puniki maosan yening paweweh transmisi lokal sane ngangsan makehan pungkuran puniki santukan ngangsan makeh tes lan tracing olih pemerintah.
“Yening indik prosedur indik puniki kepatutan olih pemerintah pusat, santukan pacang ngangsan makeh krama sane kalalahin virus Corona kauningin lan gelis ketambanin," ucap dane.
Tiosan saking punika, ngemakehin test taler pacang ngelisin puputne gering puniki, pastika sampun antuk ngemangguh krama sami sane kalalahin Covid-19.
“Rapid test massal pacang gelis muputan gering puniki antuk ngeterang krama sami sane kalalahin," tegesne.
Puniki taler pinaka upanaya pemerintah mangda gelis mewaline kahuripan normal lan ekonomi kramane.
Nyaksi kawentenan pungkuran puniki indik transmisi lokal makeh wenten ring cluster pasar, Sekda Dewa Indra nunas kabupaten/ kota mangda ngelaksanayang rapid test massal ring pasar.
"Laksanayang rapid test, yening pikolihne reaktif gelis laksanayang SWAB. Titiang saking Pemprov sadia nukung rapid test kit miwah genah ngekeb," tegesne.
Semalihne manut dane, yening genah ngekeb kirang, Pemprov sayaga ngefasilitasi, minakadi antuk masikian sareng hotel utawi sapunapi.
Dane ngodar tiosan ngelaksanayang test ring cluster pasar, petugas taler nunas ngelaksanayang pemetaan, minab wewidangan ring dija sane minab kalimbak antuk ngelaksanayang tracing pedagang lan krama sane ngerauhin pasar.
“Yening sampun kapetaan, iraga presida uning genah-genah sane minab presida kalalahin,” dane ngawewehin.
Tiosan ngelaksanayang test massal ring cluster pasar, dane taler nunad otoritas mangda nyobyahan majeng pare pedagang lan krama sane ngerauhin pasar indik protocol kesehatan.
“Titiang nunas mangda Disperindag ngarembug sareng kepala pasar nyobyahang protocol kesehatan. Majeng pasar sane kaemong olih desa adat, pare petugasne mangda ngarembug sareng Bendesa Adat,” tegesne.
Dewa Indra malih ngawewehin, manut instruksi Gubernur Bali, wewates rapid test massal puniki ring penyineb Juni, majeng Kota Denpasar yening presida ring penyineb wuku puniki.
“Sapunapi je pikolih saking rapid test massal puniki, ngiring tampa. Sakemaon niki margi pinih becike mangda pastika. Kadi cuci gudang, yening sami keni iraga gelis ngambil pemargi selanturne," sineb dane. (Gix)
Komentar