Pj Gubernur Bali Ngangsokang Inovasi lan Digitalisasi Nincapang Pendapatan Daérah
- 03 Februari 2024
- 22:02 WITA
- News
DÉNPASAR, Balitopnews - Penjabat (Pj) Gubernur Bali S.M. Mahéndra Jaya ngangsokang Badan Pendapatan Daérah (Bapenda) Provinsi Bali nincapang pendapatan asli daérah (PAD) lianan ring pajak kendaraan bermotor. “Titiang ngaturang parama suksma antuk utsaha semeton nincapang PAD. Antuk pikolih puniki iraga sareng sami ngancan optimis ring warsa 2024,” atur Pj Gubernur Bali ri kala simpang ring Kantor Bapenda Bali, Wraspati Pon Wariga, 1 Fébruari 2024.
Mahéndra Jaya banget nyaratang inovasi mangdané Pemprov Bali nénten ngandelang pajak kendaraan bermotor kémanten. Wénten peta jalan sané ngentenin Bali maduwé parencana ageng nyujur warsa 2045 zero emission utawi nol emisi bahan bakar fosil. “Majanten sampun wénten utsaha ngirangang motor sané minyakné fosil. Ngiring sareng sami mikayunin sapunapi aab jagat sané jagi rauh ngenénin indik bahan bakar fosil puniki,” teges Mahéndra Jaya.
Manut Mahéndra Jaya, patut turéksanin indik penerimaan daérah mangda dangan nglaksanayang évaluasi yéning targét pendapatan ngancan ngirangang. Patut ngandelang digitalisasi mangda kramané aluh ngmargiang swadharma naur pajak. Ri kala simpang ka Kantor Bapenda Bali, Pj Gubernur Mahéndra Jaya polih nuréksanin piranti ring Kantor Bapenda Bali lan UPT Samsat Dénpasar sané genahnyané masikian.
Kepala Bapenda Bali, I Madé Santha negesang, manut pakéling Pj. Gubernur mangda ngucukang transformasi pelayanan majalaran digitalisasi. “Pamarginé palet-paletan kantos makasami nganggén digital,” baos Madé Santha. Dané nguningang, inovasi sané sampun kamargiang luiré Program Samsat Ibu Jari sané ngawinang wajib pajak prasida naur pajak saking HP. Wénten taler Samsat online kantos Samsat keliling. “Indik tata cara naur pajak sampun kaintegrasiang. Wénten pamargi door to door, ngwangun kanti sareng BUMDés, LPD, lan koperasi mangda kramané nampek ngrereh genah naur pajak,” atur Madé Santha. (Rls/Btnc)
Komentar