Pj Gubernur Bali Sayaga Nyuksésang Pemilu Warsa 2024
- 05 Februari 2024
- 21:02 WITA
- News
DÉNPASAR, Balitopnews.com - Pj. Gubernur Bali S.M. Mahéndra Jaya negesang sampun sayaga nyuksésang parikrama Pemilihan Umum (Pemilu) warsa 2024. Indiké punika kabaosang ri kala rapat koordinasi sareng angga Forkopimda di Ruang Rapat Gedung Gajah, Jayasabha, Dénpasar, Soma Paing Warigadéan, 5 Fébruari 2024.
Pj. Gubernur Mahéndra Jaya mapica apresiasi antuk utsaha lan sinergitas angga Forkopimda mikamkamin parikrama Pemilu, makadi ngawal logistik, data pemilih, pengamanan, kantos utsaha mangda jagaté sutrepti. “Titiang ngaturang dahat suksma majeng angga Forkopimda. Tiang mapangapti pamargi Pemilu labda karya manut uger-uger sané kasungkemin,” baos Mahéndra Jaya.
Mahéndra Jaya ngwewehin, iraga sareng sami patut tragia antuk pakibeh politiké. Patut ngukuhang sinergitas, nincapang pengawasan mangda nentén wénten selah ngmargiang parilaksana kaon sané ngawinang buut utawi konflik. “Sané maduwé hak pilih mangda rauh ka TPS,” baos Mahéndra Jaya.
Pangdam IX/Udayana, Mayjén TNI Harféndi, S.I.P., M.Sc mapangapti Pemilu mamarga antar. Pangdam sampun masikian sareng kepolisian, nyiagayang 3.401 anggota. Ketua Komisi Pemilihan Umum (KPU) Bali, I Déwa Agung Gedé Lidartawan nguningang, wénten 3.269.516 pemilih, krama lanang 1.617.276 pemilih pria lan 1.652.240 krama istri. TPS akéhnyané 12.809 wénten ring 9 kabupatén/kota, 57 kecamatan, lan 716 désa.
Déwa Lidartawan ngaptiang pangrauh krama maduwé hak pilih ngancan nincap ka TPS. KPU Bali maduwé target 83% krama maduwé hak pilih rauh ka TPS. Rapat Koordinasi rahina dibi taler karauhin Wakil Ketua DPRD Provinsi Bali Dr. I Nyoman Sugawa Korry, Wakapolda Bali Brigjén Pol Dr I Gusti Kadé Budhi Harryarsana, S.I.K., S.H., M.Hum., Wakil Kepala Kejaksaan Tinggi Bali I Déwa Gedé Wirajana, S.H., M.H, Ketua Bawaslu Provinsi Bali I Putu Agus Tirta Suguna, kepala OPD ring Pemprov Bali, lan angga Forkopimda lianan. (Rls/Btnc)
Komentar