Pj. Gubernur Bali Mahéndra Jaya Ngamargiang ‘Program Pungutan Wisatawan Asing’
- 12 Februari 2024
- 22:02 WITA
- News
DÉNPASAR, Balitopnews.com - Penjabat (Pj) Gubernur Bali S.M. Mahéndra Jaya ngmijilang program Pungutan Wisatawan Asing (PWA) anggén nglestariang kebudayaan lan palemahan jagat Bali,Soma Wagé Julungwangi, 12 Fébruari 2024.
Program puniki kamijilang ring Hotél Puri Santrian Sanur antuk ngédéngang telapak tangan ka layar LED olih Pj Gubernur Bali kasarengin antuk Kadisparda Bali Tjokorda Bagus Pemayun, Ketua Gabungan Industri Pariwisata Indonesia (GIPI) Bali Ida Bagus Agung Partha Adnyana, Ketua Badan Promosi Pariwisata Daérah (BPPD) Provinsi Bali sapisanan Ketua PHRI Bali Prof. Tjokorda Oka Artha Ardhana Sukawati, Dirut PT. BPD Bali Nyoman Sudharma, lan Kepala Perwakilan BI Provinsi Bali R. Érwin Soeriadimadja.
Acara puniki pinaka cihna ngmargiang PWA sané kakawitin ring rahina Buda Umanis Julungwangi, 14 Fébruari 2024 jam 00.00 WITA. Ngawit galah punika, turis dura negara sané malancaran ka Pulau Dewata kakenén dudukan maageng Rp. 150.000. Mangda dudukan mamargi antar, turis dura negara kapikélingin naur dudukan sadurung luas ka Bali malarapan cashless masarana aplikasi Love Bali utawi aplikasi tiosan sané kacumawisang.
Mahéndra Jaya maosang, ngamijilang program PWA pinaka utsaha ngukuhang pondasi pariwisata Bali madasar antuk budaya. Pemerintah Provinsi Bali sampun ngrincikang utsaha-utsaha nglestariang kebudayaan lan palemahan jagat Bali. “Sakémaon utsaha-utsaha sané kalimbakang kantun kirang riantukan katunan indik fiskal ring APBD Provinsi Bali,” baos Mahéndra Jaya. Manut dané, kantun akéh program sané patut kamargiang anggén ngrawat utawi menin tetamian lontar, situs budaya, adat istiadat, lan kesenian. Nglestariang palemahan jagat Bali patut utsaha sumeken anggén muputang buut sampah, penghijauan, pengendalian, lan pemanfaatan tata ruang wilayah. Kantun akéh utsaha patut kamargiang nincapang kualitas pelayanan lan pamargin pariwisata.
Mahéndra Jaya ngaptiang program PWA prasida nincapang fiskal Pemprov Bali mangda prasida akéh ngmargiang utsaha perlindungan kebudayaan lan palemahan jagat Bali, rumasuk mecikang daya tarik wisata, infrastruktur jalan, tur nincapang promosi pariwisata. Dané nénten mangetang indik launching PWA sané mepét ring galah ngmargiang dudukan majeng turis dura negara puniki. Riantukan petugas patut hati-hati mangdané dudukan puniki nénten ngwetuang pikobet ring turis dura negara.
“Ri sampun ngmargiang simulasi, iraga sareng sami enten pacang metuang pikobet ting turis dura negara sané ngranjing ka Bali. Santukan sapuput ngmargiang penerbangan doh, ngranjing ring Bali ipun antré naur VoA, prosés imigrasi, béa cukai, tur kawewehin antré naur PWA,” baos Mahéndra Jaya. Nika mawinan ngubah Peraturan Gubernur apang naur PWA nénten kalaksayang ring pintu masuk Bali, nanging mabayahan sadurung berangkat lan ring genah end point (hotél lan déstinasi wisata).
Mahéndra Jaya taler nguningang dasar hukum ngmargiang PWA inggih punika Undang-Undang Nomor 15 Tahun 2023 indik Provinsi Bali, pasal 8 ayat (3) lan (4) sané raris kaatur ring Peraturan Daérah Provinsi Bali Nomor 6 Tahun 2023 indik Pungutan Bagi Wisatawan Asing untuk Pelindungan Kebudayaan dan Lingkungan Alam Bali, lan Peraturan Gubernur Bali Nomor 2 Tahun 2024 indik Tata Cara Pembayaran Pungutan Bagi Wisatawan Asing.
Pemprov Bali taler mautsaha nincapang kualitas pelayanan lan penyelenggaraan kepariwisataan. Utsaha nincapang keamanan lan kenyamanan wisatawan, Pemprov Bali sampun nglantik anggota Satpol PP Khusus Pariwisata. Satpol PP Khusus Pariwisata maduwé amongan ngwantu micayang informasi lan pertolongan majeng wisatawan tur ngwantu pemetaan potensi kerawanan lan nyarengin ngrereh pamargi yéning wénten wicara.
Muputang sambutanné, Mahéndra Jaya sané naening dados Staf Khusus Méndagri Bidang Keamanan dan Hukum ini mapica aprésiasi lan parama suksma santukan program PWA prasida kamargiang ring tanggal 14 Fébruari 2024. Dané percaya program punika sida mamargi becik. Manut dané, turis dura negara sané kayun plesiran ka Bali nyihnayang angga greret naur PWA.
Ketua GIPI Bali Ida Bagus Agung Partha Adnyana muji Pj Gubernur Bali sané sumeken ngmargiang program PWA tur nyarengin komponen pariwisata mligbagang pikamkamé puniki. “Dinané mangkin iraga mapupul deriki ngrauhin acara dahat mabuat. Pinaka babak baru ngawangun séktor pariwisata sané sustainable,” baos Agung Partha. Dané ngaptiang dana sané kapupulang saking program PWA prasida kakelola transparan lan akuntabel. Turis dura negara sané malila cita ka Bali pastika mikolihang manfaat saking dana sané kasumbangang. (Rls/Btnc)
Komentar